മുറുക്കാന്‍, ബീഡി, സിഗരറ്റ്, ഗുഡ്ക ....

( കുടുംബമാധ്യമത്തിലെ സ്വകാര്യത്തില്‍ 2013 മെയ്  31   നു  പ്രസിദ്ധീകരിച്ചത്. )

മെയ് മുപ്പത്തൊന്നെന്ന്  പറഞ്ഞാല്‍ അന്താരാഷ്ട്ര  പുകയില വിരുദ്ധ ദിനമാണ്.  ആരോടെല്ലാമാണ് ഈ ദിവസത്തെപ്പറ്റി ഓര്‍മ്മിപ്പിക്കേണ്ടതെന്ന് ആലോചിക്കുകയായിരുന്നു, ഞാന്‍. അച്ഛനോട്,  സഹോദരന്മാരോട്, ഭര്‍ത്താവിനോട്, മക്കളോട്, കൊച്ചുമക്കളോട്, സന്തുബന്ധുക്കളോട്, സുഹൃത്തുക്കളോട്, പരിചയക്കാരോട് ....ഇവരില്‍ ആരെങ്കിലുമൊക്കെ ഉണ്ടാവില്ലേ പുകയിലയെ ഗാഢഗാഢം പുണരുന്നവര്‍... മുറുക്കാനായും  ബീഡിയായും സിഗരറ്റായും ഗുഡ്കയായും തമ്പാക്കായും  തീവ്രമായ ആസക്തിയോടെ ചുംബിക്കുന്നവര്‍.... . മൂക്കുപൊടിയായി സുഗന്ധമാസ്വദിക്കുന്നവര്‍..

1987  ലാണ് വേള്‍ഡ് ഹെല്‍ത്ത് ഓര്‍ഗനൈസേഷന്‍ പുകയില വിരുദ്ധ ദിനത്തെപ്പറ്റി ആലോചിക്കാന്‍  തുടങ്ങിയത്. അന്ന്  ഇരുപത്തിനാലു മണിക്കൂര്‍ നീണ്ടു നില്‍ക്കുന്ന പുകയില ഉപവാസവും പുകയിലയുടെ ഉപയോഗം സൃഷ്ടിക്കുന്ന ആരോഗ്യപ്രശ്നങ്ങളെ പറ്റിയുള്ള അവബോധവുമായിരുന്നു  പ്രധാന വിഷയം  .  1988 ഏപ്രില്‍ 7 ന് ആയിരുന്നു ആദ്യത്തെ  നോ സ്മോക്കിംഗ് ഡേ. അന്നേ ദിവസമാണ് തുടര്‍ന്നുള്ള എല്ലാ വര്‍ഷങ്ങളിലും  മെയ് 31ന് പുകയില വിരുദ്ധ ദിനമായി ആചരിക്കാനുള്ള തീരുമാനമുണ്ടാകുന്നത്. ഒരു ആഷ് ട്രേയില്‍ കുത്തിനിറുത്തിയ  പുതുപുഷ്പങ്ങളാണ് ഈ ദിവസത്തിന്‍റെ പ്രതീകം. 1988 നു ശേഷം എല്ലാ വര്‍ഷവും ഒരു  പുതിയ മുദ്രാവാക്യം ഈ ദിനത്തില്‍  ലോകാരോഗ്യ സംഘടന മുന്നോട്ടു വെയ്ക്കുന്നുണ്ട്. പുകയിലയുടെ ഉപഭോഗവുമായി ബന്ധപ്പെട്ട  വിവിധ പ്രശ്നങ്ങള്‍ തന്നെയായിരിക്കും ഈ  മുദ്രാവാക്യങ്ങളുടെ കാതല്‍. 

പുകയിലയുടെ ഉപയോഗം കടുത്ത ആരോഗ്യപ്രശ്നങ്ങള്‍ സൃഷ്ടിക്കുന്നുണ്ട്.  മദ്യപാനി പ്രത്യക്ഷമായ ആരോഗ്യപ്രശ്നങ്ങള്‍ ഉണ്ടാക്കുമ്പോള്‍ പുകയിലയുടെ അടിമ പരോക്ഷമായ പ്രശ്നങ്ങളാണ് സൃഷ്ടിക്കുന്നത്. അതുകൊണ്ട് പ്രശ്നത്തിന്‍റെ ഗുരുതരാവസ്ഥ  അറിയാന്‍ വൈകുകയും അറിഞ്ഞാല്‍പ്പോലും അതങ്ങനെയല്ലെന്ന് വാദിയ്ക്കുകയും പ്രശ്നത്തിനെ നിസ്സാരമാക്കി അവതരിപ്പിക്കുകയും ചെയ്യാന്‍ പലരും താല്‍പര്യപ്പെടുന്നു. പുകയിലയുടെ കോര്‍പ്പറേറ്റ്   ഉല്‍പ്പാദകരും ഗവണ്‍മെന്‍റുകളും ഇക്കാര്യത്തില്‍ എപ്പോഴും ഒന്നിച്ചായിരിക്കും. കാരണം  പണം കോടികളായി  മറിയുന്നിടമാണല്ലോ അത്. പുകയിലയുടെ ഉപയോഗം ആരോഗ്യത്തിനു ഹാനികരം  എന്ന മുന്നറിയിപ്പ് ഉല്‍പന്നങ്ങളുടെ പാക്കറ്റുകളില്‍ അച്ചടിച്ച് വന്‍കിട പുകയില മുതലാളിമാര്‍ കൈ കഴുകുന്നു. ഗവണ്‍മെന്‍റാകട്ടെ  സിനിമകളിലെ സിഗരറ്റ് വലി രംഗങ്ങളില്‍ അത്തരം മുന്നറിയിപ്പുകള്‍ സ്ക്രീനില്‍ കാണിക്കുന്നു.  ഒന്നോ രണ്ടോ സിനിമാതാരങ്ങളോട് ചില്ലറ ചോദ്യങ്ങള്‍ ചോദിക്കുകയും  പൊതുസ്ഥലങ്ങളില്‍ പുകവലി അരുതെന്ന് നിയമമുണ്ടാക്കുകയും അത്  തെറ്റിക്കുന്നവരെ കഴിയുന്നതും കാണാത്ത മട്ടിലിരിക്കുകയും ചെയ്യുന്നു.  എല്ലാം അതീവ സാധാരണയായ ഒട്ടും ആത്മാര്‍ഥതയില്ലാത്ത വഴിപാടുകള്‍ മാത്രം... 

പുകയില ഉല്‍പന്നങ്ങളുടെ  ഉപഭോഗത്തില്‍ ലോകരാഷ്ട്രങ്ങളില്‍  രണ്ടാം സ്ഥാനം നേടിയിട്ടുള്ള ഇന്‍ഡ്യയിലെ പുരുഷന്മാരില്‍ മുപ്പത് ശതമാനം പേര്‍ പുകവലിക്കാരാണ്.  സ്ത്രീകളില്‍ ഏകദേശം അഞ്ചു ശതമാനം പേര്‍ പുക വലിക്കുന്നുണ്ട്. ഏകദേശം പത്തുലക്ഷം ഇന്ത്യാക്കാരെങ്കിലും എല്ലാ വര്‍ഷവും  പുകയിലയുടെ നീരാളിപ്പിടുത്തത്തിലമര്‍ന്ന് മരണത്തെ  മാലയിട്ടു സ്വീകരിക്കുന്നു. ഇന്ത്യയില്‍ ഉത്തരാഖണ്ഡുകാരാണ് ഏറ്റവും വലിയ ബീഡി വലിയന്മാരെങ്കില്‍ കാശ്മീരികളാണ് ഏറ്റവും കൂടുതല്‍ സിഗരറ്റ് പുകയ്ക്കുന്നത്.  കേരളത്തിന്‍റ കാര്യമാണെങ്കില്‍  ഇന്ത്യയിലെ  ഏറ്റവും കേമരായ കുടിയന്മാര്‍ എന്നതു പോലെ പുകയില ഉപഭോഗത്തിന്‍റെ കാര്യത്തിലും നമ്മള്‍ തന്നെയാണ്   ഒന്നാമത്. നമ്മുടെ പുരുഷന്മാരില്‍  മൂന്നിലൊരാള്‍ ഏതെങ്കിലും തരത്തില്‍ പുകയില ഉപയോഗിക്കുന്നുണ്ട്. സ്വന്തം ശമ്പളത്തിന്‍റെ ഒമ്പത് ശതമാനം പുകയില മുതലാളിമാര്‍ക്ക്  ആദരപൂര്‍വം  കാഴ്ച വെക്കുന്നവരാണ് നമ്മള്‍ മലയാളികള്‍. 

   

സാക്ഷരതയില്‍  ഒന്നാമതല്ലെങ്കിലും 2007 ല്‍ തന്നെ ചണ്ഡീഗഡ്  സ്മോക് ഫ്രീ  ആയ ആദ്യ  ഇന്‍ഡ്യന്‍ സിറ്റി ആയിത്തീര്‍ന്നിരുന്നു.  ശ്രീ ഹേമന്ത് ഗോസ്വാമിയാണ്  ഇക്കാര്യത്തില്‍  ഏറ്റവും അധികം പ്രയത്നിച്ച ജനനായകന്‍.  ലംഘിക്കപ്പെടുന്ന ഓരോ   പുകയില വിരുദ്ധ നിയമത്തേയും  സസൂക്ഷ്മം  പരിശോധിച്ചുകൊണ്ട് ഇന്ത്യയിലെ ഓരോ രാഷ്ട്രീയ പാര്‍ട്ടിക്കും  കോര്‍പ്പറേറ്റ് പുകയില മുതലാളിമാര്‍ നല്‍കുന്ന സംഭാവനകളെ അദ്ദേഹം പരസ്യപ്പെടുത്തി. ചലച്ചിത്രങ്ങളിലെ പുകവലി രംഗങ്ങള്‍   ചെറുപ്പക്കാരെ എങ്ങനെ സ്വാധീനിക്കുന്നുവെന്ന അദ്ദേഹത്തിന്‍റെ പഠനമാണ് പരസ്യങ്ങളിലും സിനിമകളിലും പുകയിലെ ഉല്‍പന്നങ്ങളെ ഒഴിവാക്കാന്‍  ഗവണ്മെന്‍റിനു പ്രേരണയായത്.  ഇന്ത്യയിലെ പുകയില വിരുദ്ധ സമരത്തിന്‍റെ മുന്നണിപ്പോരാളിയായ  ഹേമന്ത് ഗോസ്വാമിയ്ക്ക്  2008 ലെ ഗ്ലോബല്‍ സ്മോക്ഫ്രീ പാര്‍ട്ടണര്‍ഷിപ്പ് അവാര്‍ഡ് ലഭിക്കുകയുണ്ടായി.

 സാമൂഹിക പ്രതിബദ്ധതയോടെ രോഗികളെ ചികില്‍സിക്കുന്ന ചില  ഡോക്ടര്‍മാരും ഇതു പോലെ  പുകയിലയുടെ ഉപഭോഗത്തെപ്പറ്റി  ഉല്‍ക്കണ്ഠ പുലര്‍ത്താറുണ്ട്. അവരുടെ മുന്നിലിരിക്കുന്ന രോഗികളുടെ അവസ്ഥയില്‍ നിസ്സഹായരായി  വേദനിക്കേണ്ടി വരുന്നതുകൊണ്ടാവാം അത്.  മുംബൈയിലെ ടാറ്റാ മെമ്മോറിയല്‍ ഹോസ്പിറ്റലിലെ ഡോ പങ്കജ് ചതുര്‍വേദി  പുകയില വിരുദ്ധ സമരത്തില്‍ തനിക്കു ലഭിച്ച  2013 ലെ വൈല്‍ക് ഫെഡ്  അവാര്‍ഡ്  സ്വീകരിച്ചുകൊണ്ട്  ഈ തീവ്ര വേദനകളെ  വികാരഭരിതമായി പങ്കു വെയ്ക്കുകയുണ്ടായി. ഇന്ത്യയെ  പോലെ ഒരു ദരിദ്ര രാജ്യത്ത് അനവധി മരണങ്ങള്‍ പോഷകഹാരക്കുറവുകൊണ്ടും ചികില്‍സിക്കാന്‍ പണമില്ലാത്തതുകൊണ്ടും സമയത്തിനു ഡോക്ടറുടെ അടുത്തെത്താനാവാത്തതുകൊണ്ടും സുലഭമായി സംഭവിക്കുന്നുണ്ട്.  പുകയിലയുടെ ഉപഭോഗം കൊണ്ടു  കാന്‍സര്‍ പോലെയുള്ള മാരക  രോഗങ്ങള്‍ക്ക് കൂടി അടിമകളായി തീരണമോ എന്ന് നമ്മള്‍  സ്വയം തീരുമാനിക്കണമെന്ന് അദ്ദേഹം പറഞ്ഞു. കാരണം രോഗത്തിന്‍റെ അതിതീവ്രമായ  വേദനയനുഭവിക്കുന്നത് നമ്മള്‍ മാത്രമാണ്. 

വൈക്കം മുഹമ്മദ് ബഷീര്‍ ഒരിക്കല്‍ മനുഷ്യനുണ്ടാവേണ്ട  വിവേചന ബുദ്ധിയെപ്പറ്റി , അക്കാര്യത്തില്‍  ദൈവത്തിനിടപെടാനാവാത്തതിനെപ്പറ്റി പറയുകയായിരുന്നു. തേങ്ങയും ഒതളങ്ങയും ദൈവം നല്‍കിയിട്ടുണ്ട്. തേങ്ങ ഉപയോഗിക്കുന്ന മാതിരി ഒതളങ്ങ ഉപയോഗിക്കാന്‍  മനുഷ്യന്‍ തീരുമാനിച്ചാല്‍ ദൈവം എന്തു ചെയ്യാനാണ്? അതുപോലെ വീടു പട്ടിണിയിലായാലും സാരമില്ല, പുകയില  മുതലാളിമാര്‍ക്ക് പണം  നല്‍കിയേ തീരു എന്ന് മനുഷ്യര്‍ തീരുമാനിച്ചാല്‍...