ഈ വേദിക്കാണ് പ്രാധാന്യം.

                                                       

12/01/2020

                                                          

ഇവിടെയാണ് ഞാനും അനിയത്തി റാണിയും ശാസ്ത്രീയ സംഗീതപഠനത്തിൻറെ ഭാഗമായുള്ള അരങ്ങേറ്റം നടത്തിയത്.

തൃക്കൂർ മഹാദേവക്ഷേത്രത്തിൻറെ ഭാഗമാണ് ഈ വേദി.

അന്നു ഞങ്ങൾ മോഹനരാഗത്തിലുള്ള നിന്നുകോരി വർണവും തമരുമമരുമനയുംമിഴിയുമെന്ന പദവും കല്യാണി രാഗത്തിലുള്ള വാസുദേവയനി വടലിനയീതോ എന്ന കീർത്തനവും ആലപിച്ചു.

ഒരുപാട് കാലം മുമ്പേ ആയിരുന്നു അത്.

ഏറെപ്പേരുണ്ടായിരുന്നു ഞങ്ങൾ കുഞ്ഞുങ്ങളെ കേൾക്കാൻ...

പാട്ടു കഴിഞ്ഞപ്പോൾ സദസ്സിൽ നിന്നും ഒരാൾ കുറെ ഓറഞ്ചു വാങ്ങി തികഞ്ഞ വാൽസല്യത്തോടെ ഞങ്ങൾ ഇരുവർക്കും സമ്മാനിച്ചു. അയാൾ പ്രാന്തനെന്നാണ് ആ നാട്ടിൽ അറിയപ്പെട്ടിരുന്നത്.

ആദ്യത്തെ സംഗീതവേദി, അന്ന് കിട്ടിയ ആദ്യ സമ്മാനം..

അടുത്തിടെ ആ വേദിയിൽ വെറുതെ പോയിരുന്നു.. വെറുതേ..

എൻറെ കുഞ്ഞനിയത്തി ഭാഗ്യ, ഞാനും കണ്ണനും

                                 

07/01/2020

09/01/2020

ഭാഗ്യ അനായാസം ഡ്രൈവ് ചെയ്യുമ്പോൾ...
സന്തോഷവും അഭിമാനവും കൂടുതൽ എനിക്കാണ്..

                                                        ഞാനും കണ്ണനും

30/01/2020

(05/01/2020) കെ.കെ.ടി.എം കോളേജിൽ

                                                             

04/01/2020

06/01/2020

വീണ റാംജിയുമൊത്ത്

പ്ളാസ്റ്റിക് നിരോധനം, മരട് പൊളിക്കൽ, ഒരുപാട് ശരിക്കും അറിയാൻ തുടങ്ങുകയാണ്, ഇതൊരു കപ്പിൻറെ വഞ്ചനയാണ്. അലൻ താഹ

04/01/2020

പ്ളാസ്റ്റിക് നിരോധനം വന്നതിനു ശേഷമാണ് ഒരു കല്യാണത്തിനു പോയത്.

സ്റ്റീൽ ഗ്ളാസ്സിൽ വെള്ളം.

നാല് പായസത്തിന് നാലു പ്ളാസ്റ്റിക് ലെയേർഡ് ഡിസ്പോസിബിൾ കടലാസ് ഗ്ളാസ്സുകൾ ചോദിച്ചു വാങ്ങുന്നവർ, കുറഞ്ഞത് അത്തരം രണ്ട് ഗ്ളാസ്സെങ്കിലും ചോദിച്ചു വാങ്ങുന്നവർ, വാഴയിലയിൽ പായസങ്ങൾ വിളമ്പി മേടിച്ചു നക്കി നക്കി കഴിക്കുന്നതു കണ്ടു...

എനിക്കിഷ്ടമായി..

ഇലയിൽ നിന്ന് കൈകൊണ്ട് പായസം വടിച്ചു നക്കി കഴിക്കാൻ മനുഷ്യർ മറന്നിട്ടില്ല. അത്രയൊന്നും മനുഷ്യർ മാറീട്ടില്ല..

                                                 

                                                           

11/01/2020

മരട് പൊളിക്കൽ

അങ്ങനെ സ്ഫോടകവസ്തുക്കൾ കൊണ്ട് നിർമ്മിതികൾ തകർക്കപ്പെടുന്നു.... എത്ര മനുഷ്യാദ്ധ്വാനം..എത്ര കെട്ടിട നിർമ്മാണ പദാർത്ഥങ്ങൾ, എത്ര മനുഷ്യരുടെ വീടുകൾ...

എല്ലാം അവസാനിക്കുന്നു.

രാജ്യത്ത് നിലവിലുള്ള കെട്ടിട നിർമ്മാണ നിയമങ്ങളെ വെല്ലുവിളിച്ച് നടത്തുന്ന നിർമ്മിതികൾ ഒഴിവാക്കുക തന്നെ വേണം. കെട്ടിടത്തിന് അനുമതി നല്കുന്നവരും ഡിസൈൻ ചെയ്യുന്ന സാങ്കേതിക വിദഗ്ധരും കെട്ടിടം വില്പനക്ക് വെക്കുന്നവരും സൂക്ഷ്മമായി ശ്രദ്ധിക്കേണ്ടുന്ന കാര്യമാണ് കെട്ടിടം നിയമവിധേയമാണോ എന്നുള്ള ഉറപ്പുവരുത്തൽ..

അത് ചെയ്യാതെ ഒത്തിരി മനുഷ്യരെ, നഗരത്തിലെ ഒരു പ്രധാന ഭാഗത്തെ ഇങ്ങനെ ശിക്ഷിച്ചിട്ട് ആരെയാണ് നമ്മൾ നന്നാക്കാൻ ശ്രമിക്കുന്നത്?

കെട്ടിടനിർമ്മാണ പദാർത്ഥങ്ങൾ പുനരുപയോഗിക്കാനാവുമോ എന്നൊരു സാധ്യത അന്വേഷിച്ചിരുന്നോവെന്ന് അറിയില്ല എനിക്ക്. ഇല്ലെങ്കിൽ നമ്മൾ ചെയ്യുന്നത് കൊടിയ അബദ്ധമാണ്. ദുരുപയോഗം ചെയ്യാനുള്ള കെട്ടിട നിർമ്മാണ പദാർത്ഥങ്ങൾ ഇല്ല എന്ന അവസ്ഥയെ നമ്മൾ എന്ന് തിരിച്ചറിയും ?

എത്ര അദ്ധ്വാനമാണ് ഓരോ കെട്ടിടവും എന്നറിയുന്നതുകൊണ്ട് അവ പൊളിഞ്ഞു വീഴുന്നതു കാണുമ്പോൾ എനിക്ക് വല്ലാതെ സങ്കടം വരും...


                                       

06/01/2020

                                             
ഞാൻ ഒരുപാട് പേരെ ഇപ്പോൾ ശരിക്കും അറിയാൻ തുടങ്ങുകയാണ്...

അവരുടെ സൗഹൃദവും സ്നേഹവും അനുഗ്രഹവും ഞാൻ ആഗ്രഹിച്ചിരുന്നു. അവരുടെ നല്ല ഓർമ്മകളിൽ ഞാനുണ്ടാവണമെന്ന് കരുതി പ്രയത്നിച്ചിരുന്നു. രാഷ്ട്രീയത്തിലെ അഭിപ്രായവ്യത്യാസങ്ങൾ വ്യക്തി സ്നേഹ ബന്ധങ്ങളിൽ പ്രശ്നമുണ്ടാക്കേണ്ടതില്ലെന്ന് വിചാരിച്ചിരുന്നു.

ഇപ്പോൾ എനിക്ക് ശരിക്കും ഭയമാവുന്നു. അത് ഞാൻ വെറുതേ എഴുതുകയല്ല.

ഞാൻ സൗഹൃദവും സ്നേഹവും അനുഗ്രഹവും ആശിച്ച പലയിടങ്ങളിലും ഒളിച്ചു വെയ്ക്കപ്പെട്ടിരുന്ന തുറുകണ്ണുകളും രക്തദാഹമുള്ള വക്ത്രഗഹ്വരങ്ങളും നഖങ്ങളും ദംഷ്ട്രകളും തേറ്റകളും പ്രത്യക്ഷപ്പെട്ടു കഴിഞ്ഞു. അവയിൽ കൊല്ല്, ചീന്ത്, പുറത്താക്ക് എന്നീ അലർച്ചകൾ, ജാതി മത വംശ രാഷ്ട്രീയ ശുദ്ധികളുടെ പ്രഖ്യാപനങ്ങൾ...

ജാതിമതദേശപരിഗണനകളുടെ വേരുകളില്ലാത്തവരാണ് ഞാനും എൻറെ നെഞ്ചിൽ പറ്റി നില്ക്കുന്നവരും..

ഞങ്ങളുടെ കെറ്റിലിലും വെള്ളം തിളച്ചു തുടങ്ങുകയാണോ...  

                                                       

13/01/2020

ഇതൊരു കപ്പിൻറെ വഞ്ചനയാണ്

ഇതൊരു കപ്പിൻറെ വഞ്ചനയാണ്. പച്ച നിറമുള്ള ഒരു സ്റ്റോൺവെയർ കപ്പിൻറെ വഞ്ചന.

കുറെക്കാലം മുമ്പേയുള്ള ഓഫീസ് ജോലിക്കാലത്ത്...

ഭയങ്കര തിരക്ക് പിടിച്ച ഒരു ദിവസത്തെ ജോലികൾ ഒന്നൊതുക്കി, ഞാൻ റൂമിലേക്ക് മടങ്ങിയതാണ്.

കാപ്പിക്ക് വില കൂടുതലായതുകൊണ്ട് ഞാൻ ചായ കുടിച്ചു ശീലിച്ചു കഴിഞ്ഞിരുന്നു. ആർഭാടങ്ങൾ ഓരോന്നായി കുറക്കണമെന്ന ജീവിതനിയോഗത്തിലായിരുന്നു അക്കാലം ഞാൻ.

നല്ല തണുപ്പുള്ള ജനുവരി മാസമാണ്, ദില്ലിയിൽ.

മുറിയിലെത്തി, മസാലയൊക്കെയിട്ട്, കൃത്യം പാകത്തിൽ പാല്പൊടിയും ചായവെള്ളവും പഞ്ചസാരയും ചേർത്ത് ചായ ഞാൻ പച്ചക്കപ്പിലേക്ക് പകർന്നു.

ഉയരം കുറഞ്ഞ മോഡയിലിരുന്ന് ചായ കുടിക്കാൻ പോവുകയാണ്. കപ്പ് കൈയിലെടുത്ത് ചുണ്ടോട് ചേർത്ത നിമിഷം... ആ കപ്പ് അതിൻറെ പിടി മാത്രം എൻറെ കൈയിൽ അവശേഷിപ്പിച്ച് ഡിം എന്ന് താഴേക്കൂർന്നു വീണുടഞ്ഞു തകർന്നു.

ചായ കുടിക്കാൻ കൊതിച്ചിരുന്ന എനിക്ക് ഒരു തുള്ളി ചായ പോലും കിട്ടിയില്ല.

ചില പച്ചക്കപ്പുകൾ ഇങ്ങനേമുണ്ട്.

                                                               

22/01/2020

കോടതികളിൽ നിന്ന് മറ്റൊന്നും പ്രതീക്ഷിച്ചില്ല, അലൻ, താഹ കേസിലായാലും...

പൗരത്വ ഉൽക്കണ്ഠകളുമായി ബന്ധപ്പെട്ട കേസുകളിലായാലും...

വെറുപ്പിൻറെ വിവിധ തരം വീഡിയോ ഓഡിയോ ആവിഷ്കാരങ്ങളുമായി ഇപ്പോൾ ഒരുപാടു പേർ എന്നോടു സംസാരിക്കുന്നുണ്ട്. അവരെല്ലാം അപരരെ ചെയ്യാനാഗ്രഹിക്കുന്ന കാര്യങ്ങൾ കേൾക്കുമ്പോൾ എനിക്ക് മനസ്സിലാവുന്നത് അനേകമനേകം ഹിറ്റ്ലറുമാരും മുസ്സോളിനിമാരും അങ്ങനെയുള്ള ഏകാധിപത്യ പ്രവണതകൾ ഓരോ ഇഞ്ചിലും പോറ്റിവളർത്തുന്നവരും ഒരുപാടുണ്ടെന്ന് തന്നെയാണ്.

അപരരെ വെറുക്കുക, അതികഠിനമായി ശിക്ഷിക്കണമെന്ന് ആഗ്രഹിക്കുക, ഇഞ്ചിഞ്ചായി വധിക്കണമെന്ന് അലറുക... പേടിയാവുകയാണ് കേൾക്കുമ്പോൾ..

വെറുപ്പ് നമ്മെത്തന്നെ പൊള്ളയാക്കുന്ന, നമ്മെത്തന്നെ തിന്നു തീർക്കുന്ന അഗ്നിയാണ്...

വരുന്ന ദശകം.. നമ്മള്‍ പെണ്ണുങ്ങളുടേതാവണം... ആയേ തീരൂ....

  മാതൃഭൂമി

03/02/2020
                                                                  

വിവാഹവും കുടുംബജീവിതവുമാണ് സ്ത്രീകള്‍ ഏറ്റവുമധികം വിജയിക്കേണ്ട ഒരേയൊരു മേഖല എന്ന തെറ്റിദ്ധാരണയില്‍ കഴിയേണ്ട കാലമല്ല ഇത്.
സ്വാതന്ത്ര്യസമരകാലത്ത് ഗാന്ധിജി ഇക്കാര്യം സ്ത്രീകളേ ഓര്‍മ്മിപ്പിച്ചിരുന്നു. നമ്മുടെ രാജ്യം ഒത്തിരി കാര്യങ്ങള്‍ ഇപ്പോള്‍ നമ്മളോരോരുത്തരോടും ആവശ്യപ്പെടുന്നുണ്ട്. അഴിമതിയിലും കെടുകാര്യസ്ഥതയിലും സ്വാര്‍ത്ഥ താല്‍പര്യങ്ങളിലും അക്രമങ്ങളിലും മുങ്ങിമരിച്ചു പോകുന്ന രാജ്യത്തിന്റെ നിലവിളി സ്ത്രീകളും കേള്‍ക്കാനുള്ളതാണ്. പ്രതികരിക്കാനുള്ളതാണ്. സ്ത്രീകള്‍ ലക്ഷ്യബോധത്തോടെ സമരത്തിലേര്‍പ്പെട്ടാല്‍ മാറ്റങ്ങള്‍ വരിക തന്നെ ചെയ്യും. പൊതുജീവിതം പെണ്ണിനും ഉറപ്പായി ഉണ്ടാവണം. ആ തീരുമാനമെടുക്കാനുള്ള കെല്‍പ്പ് ഇനിയും കൂടുതല്‍ സ്ത്രീകള്‍ക്കുണ്ടാവട്ടെ.

സ്ത്രീകളില്‍ ഭൂരിപക്ഷം പേരുടേയും ജീവിതത്തില്‍ വല്ലാത്ത കരിനിഴല്‍ വീഴ്ത്തുന്ന ഒന്നാണ് ചെറിയ പൂവാലശല്യത്തില്‍ തുടങ്ങി ബലാത്സംഗത്തിലും കൊലപാതകത്തിലും വരെ എത്തുന്ന ലൈംഗിക പീഡനങ്ങള്‍. ലൈംഗികമായും അല്ലാതേയുമുള്ള താഴ്ത്തിക്കെട്ടലുകള്‍ പെണ്ണുങ്ങളില്‍ തൊണ്ണൂറ്റഞ്ച് ശതമാനവും മൗനമായി സഹിക്കും. എത്ര വിദ്യാഭ്യാസമുണ്ടായാലും ഉയര്‍ന്ന ജോലി ചെയ്താലും ഈ തൊണ്ണൂറ്റഞ്ച് ശതമാനം സ്ത്രീകളും നിശ്ശബ്ദത കൈവെടിയില്ല. കൂടുതല്‍ സ്ത്രീകള്‍ അതിക്രമങ്ങളെ തിരിച്ചറിഞ്ഞ്, അക്രമം നടത്തുന്നതിനനുകൂലമായി നില്‍ക്കുന്ന എല്ലാറ്റിനോടും ഒന്നിച്ച് നിന്ന് പൊരുതുന്ന ദശകമാവട്ടെ കടന്നു വരുന്നത്. സ്ത്രീകള്‍ ഒന്നിച്ചു നിന്നാല്‍ എല്ലാ അക്രമങ്ങള്‍ക്കും പരിധി ഉണ്ടാകും. ആ തിരിച്ചറിവിലേക്ക് സ്ത്രീകള്‍ മുഴുവനും ഉണരുന്ന കാലം വരട്ടെ.

ഇന്ത്യയില്‍ ഒട്ടും വിദ്യാഭ്യാസമില്ലാത്ത, ഉടുതുണിക്ക് മറുതുണിയില്ലാത്ത, ഭക്ഷണം കഴിക്കാനില്ലാത്ത കിടപ്പാടമില്ലാത്ത പരമദരിദ്രരായ അനേകം കോടി മനുഷ്യരുണ്ട്. അവരുടെ സ്വപ്‌നങ്ങളെ കണ്ടില്ലെന്ന് നടിക്കുന്നത് ഘോരമായ ഒരു കുറ്റകൃത്യമാണ്. അവരുടെ സ്വപ്‌നങ്ങള്‍ക്ക് ധനികരുടേതായ ന്യായസംഹിതകള്‍ ചമച്ച് ആ സ്വപ്ന ങ്ങളെ റദ്ദാക്കുന്നതില്‍ നിന്നും സ്ത്രീകള്‍ വിട്ടുനില്‍ക്കേണ്ടതുണ്ട്. ആ വിട്ടുനില്‍ക്കല്‍ സ്ത്രീകളുടെ കടമ പോലുമാണ്. കാലങ്ങളായി പല കാര്യങ്ങളില്‍ നിന്നും ക്രൂരമായി അകറ്റി നിറുത്തപ്പെട്ടവരാണ് സ്ത്രീകള്‍. അകറ്റപ്പെട്ടതിന്റെ വേദന സ്ത്രീകള്‍ അറിയുന്നില്ലെങ്കില്‍ മറ്റാരാണ് അതറിയുക?


ഇപ്പോള്‍ വിവിധതരം ഉപാധികളോടെ അംഗീകാരത്തിന്റെ ചില ഒറ്റപ്പെട്ട ശ്രമങ്ങള്‍ ഉണ്ടാകുന്നുണ്ട്. അതോടെ സ്ത്രീകളുടെ നില കേമമായി... കെങ്കേമമായി .. സ്ത്രീകള്‍ ബഹിരാകാശത്തെത്തിക്കഴിഞ്ഞു എന്നും മറ്റും വികാരം കൊള്ളുന്നത് ഒട്ടും ശരിയാവില്ല. ഒന്നോ രണ്ടോ സ്ത്രീകള്‍ ഏറെ ബുദ്ധിമുട്ടി ഒരു പദവിയിലെത്തിയാല്‍ പോരാ. ഇന്ത്യയില്‍ മനുഷ്യാന്തസ്സ് പോലുമില്ലാതെ നരകിക്കുന്ന അനവധി സ്ത്രീകള്‍ ഉള്ളപ്പോള്‍ ഒന്നോ രണ്ടോ സ്ത്രീകളുടെ ഉയര്‍ന്ന പദവിയില്‍ അഭിരമിക്കാന്‍ അത്ര കാര്യമായി ഒന്നുമില്ല തന്നെ. സ്ത്രീകളുടെ മനുഷ്യാന്തസ്സ് ഉയര്‍ത്തുന്ന തിനായുള്ള പ്രവര്‍ത്തനങ്ങളിലും നമ്മള്‍ പെണ്ണുങ്ങള്‍ ഒറ്റക്കെട്ടാവേണ്ടതുണ്ട്.

രാഷ്ട്രീയപ്പാര്‍ട്ടികളുടേയും മതസംഘടനകളുടേയും ജാതി സംഘടനകളുടേയും പേരില്‍ സംഘടിക്കുന്ന എല്ലാ സ്ത്രീകളും മറക്കരുതാത്ത ഒരു കാര്യമുണ്ട്. പീഡനങ്ങള്‍ക്ക്, എന്നും എതിരാവണം സ്ത്രീകള്‍ ... അതായിരിക്കണം സ്ത്രീകളുടെ ഒരുമ.
ഞങ്ങളുടെ സ്ത്രീകള്‍ ഞങ്ങളുടെ പീഡകരെ എപ്പോഴും പിന്താങ്ങുമെന്ന് ഒരു പാര്‍ട്ടിയും ഒരു സംഘടനയും കരുതാനുള്ള അവസരം സ്ത്രീകള്‍ നല്കരുത്. പെണ്ണിന്റെ അഭിമാനത്തിന് അമൂല്യമായ വിലയുണ്ടെന്ന് പെണ്ണുങ്ങളല്ലേ പറയേണ്ടത്?
ഒരുമിച്ച് നില്ക്കുന്ന ആത്മാഭിമാനികളായ പെണ്ണുങ്ങളെ സ്വപ്നം കണ്ടുകൊണ്ട്... പുതുവര്‍ഷത്തെ വരവേല്‍ക്കാം........

ചൊക്ളി 9

03/02/2020

 

(ഒമ്പത്)

നേരം വെളിച്ചാവുമ്പോളേക്കും ഒക്കേറ്റ്നും ഒരു വെളിവായി. അന്തോണി മാപ്ള മാത്രല്ല തൃസ്സ്യക്കുട്ടീം ഗോപാലേട്ടനും സര്വേടത്തീം
കേട്ടോരും അറിഞ്ഞോരും ഒക്കെ വന്നു. കുശത്ത്യോളും ചെട്ടിച്ച്യോളും വന്നു. ആകെക്കൂടി എരമ്പായി.

വാര്യത്ത് ആരൂല്യാന്നാ മൊയ്തീൻ വിചാരിച്ചേ.. അതങ്ങനല്ലാന്ന് ചെട്ടിച്ച്യോള് കണ്ടുപിടിച്ചു. രവീടെ അമ്മേം പെങ്ങളും അവടെ കെടപ്പ്ണ്ട് ന്ന് അങ്ങന്യാണ് അറിഞ്ഞത്..

ഇപ്പോ എല്ലാര്ക്കും എല്ലാം വെളിവായി. അവര് എൻഡ്രിൻ ന്ന് പറേണ വെഷാണ് കുടിച്ചത് ന്ന് വരെ ചെട്ടിച്ച്യോള് വെറ്തേ നോക്കി കണ്ടുപിടിച്ചു കളഞ്ഞു. പോലീസും പട്ടാളോം ഒന്നും വരേണ്ട കാര്യല്ല അത് പറയാൻ. ചെട്ടിച്ച്യോള് ന്നെ മതി. അവരടെ എടേല് എൻഡ്രിൻ കുടിച്ചോരും ചത്തുകെട്ടു പോയോരും കൊറെണ്ടാരുന്നു. കണ്ട് പരിചയള്ളവർക്ക് പെട്ടെന്ന് അറിയാമ്പറ്റുംന്നാ ചെട്ടിച്ചികള് പറയണത്.

രവീടെ വിവരോന്നുല്ലാണ്ട് വാരര് മാഷ് പരോശനാരുന്നു. സത്യാണ്. പോലീസിനേം മുഖ്യമന്ത്രീനേം എന്ന് വേണ്ട ആര്യൊക്കെയാണ് കണ്ടേ, ആര്ടെ അട്ത്തൊക്ക്യാണ് ദണ്ഡം പറഞ്ഞേ.. ഒരു കയ്യും കണക്കുംല്ലാണ്ട് ഓടിനട്ക്കേര്ന്ന് പാവം. എന്നാലുങ്ങനെ മോനേക്കാണാൻ പറ്റാണ്ട് വെഷം കുടിക്കണ്ടി വന്നല്ലോന്ന് എല്ലരുക്കും നെഞ്ചു പൊട്ടി. ആങ്കുട്ടിണ്ടായിട്ടും പഠിച്ച്ട്ടും ജോലി കിട്ടീട്ടും വാരര്ക്ക് ഒരു കാര്യോണ്ടായില്ല. മോള് രമേ പാകം പോലെള്ള സമേത്ത് നല്ലോരു വാര്യത്തേക്ക് കെട്ടി അയച്ചിട്ടും ഗുണോന്നുണ്ടായില്ല. ചെല മനിഷേരടെ ജീവിതം അങ്ങന്യാണ്. നാട്ട്നടപ്പ് പറേണ കാര്യൊന്നും അവരടെ ജീവിതത്തില് കാണാമ്പറ്റ്ല്യാ...

പോലീസ് വന്നു. ചൊക്ളി പേടിച്ച് വെറച്ച് നിക്കാരുന്നു. എന്തേലും ചോദ്ച്ച് എടങ്ങേറായ പിന്നെ ...പോലീസല്ലേ ജാതി..

മൂന്നു ശവോം നെരത്തി കെടത്തീപ്പോ ആലൂര് ദേശം മുഴുവനും നെഞ്ചത്തടിച്ചു നെലോളിച്ചു. ആ ദേശത്ത് ആദ്യായിരുന്നു അങ്ങനൊരു കാര്യം. ഒരു വീട് മുഴോനപ്പാടെ അങ്ങട്ട് ഇല്ലാണ്ടാവാ...പോലീസും ഗവർമെന്റും ഒക്കെ കാരണായിട്ട് ഒരു വീട് അങ്ങട്ട് തീർന്ന് പോവ്വാ...

പിന്നീടുള്ള കാലത്ത് കൃഷി മുടിഞ്ഞിട്ടും, പലിശ കേറീട്ടും, ജപ്തി വന്നിട്ടും ഒക്കെ അങ്ങനെ മരിക്കല് പതിവാവുന്ന് അപ്പോ ആരുക്കും അറീല്ലല്ലോ. അത് ഭാവീല് വരാമ്പോണല്ലേ ഉണ്ടാരുന്നുള്ളൂ.

പോലീസുകാര് രവിയേ എവിടെയാ വെച്ചേക്കണതെന്ന് ആര്ക്കും അറിയില്ല. ശവം എടുക്കാൻ വന്ന പോലീസിനും അറീല്ല. രവീടെ പെങ്ങള് രമേടെ ഭർത്താവ് വന്നില്ല. അയാള് ബന്ധം പിരിഞ്ഞ പോല്യാണെന്ന് അന്നേരത്താണ് ആലൂര് കാര്ക്ക് മനസ്സിലായ്ത്.

പോലീസ് ആംബുലൻസ് വിളിച്ച് ശവങ്ങള് പോസ്റ്റ്‌മാർട്ടത്തിന് കൊണ്ടോയപ്പോ മൊയ്തീനും ഗോപാലേട്ടനും ഒരു പഴേ സൈക്കളും ചവിട്ടി പോലീസാരടെ പഴേ ജീപ്പിന്റെ പിന്നാലേ പോയി.. വാര് ര് മാഷ്ടെ ഭാര്യവീട്ടീന്ന് വന്ന ഒരു ചെറുപ്പക്കാരനും ഭാര്യേം ഒന്ന് രണ്ട് വയസ്സന്മാരും ഒരമ്മൂമ്മേം ഏങ്ങിക്കരഞ്ഞോണ്ട് വാര്യത്തേക്ക് മടങ്ങി. ശവങ്ങള് ഇങ്ങട്ട് കൊണ്ടരും പറമ്പിലന്നെ ദഹിപ്പിക്കും...എന്തായാലും രവി വരാണ്ടിരിക്കില്യല്ലോ. അപ്പോ ദഹിപ്പിച്ചേടെങ്കിലും കാണാലോ...

ചൊക്ളി ദേവുഅമ്മേടെ കടേല് വന്ന് ഇരുന്നു. അവനാകെ ഒര് തളർച്ച്യായി. കൈയും കാലും പേരണില്ല. എങ്ങട്ടും പോവാനും ഇല്യ. മടുപ്പിലും വെഷമത്തിലും മൊഖം കനച്ചു വന്നു.

ദേവുഅമ്മ അന്നേരത്താണ് അവനോട്
ചായയിടാൻ പറഞ്ഞേ. ചായേണ്ടാക്കി അന്തോണി മാപ്ളേടെ ആടണ മേശപ്പൊറത്ത് കണക്കെഴ്തണ പൊട്ടിയ സ്ലേറ്റിൻറടുത്ത് വെച്ചപ്പോ മാപ്ള അവൻറെ തോളത്ത് കൈയമർത്തിപ്പിടിച്ചു.

എന്താണ്ടേയേന്ന് ചൊക്ളിക്കറീല്ല, പെട്ടെന്ന് അവൻ ഒറക്കെ നെലോളിച്ചങ്ങട്ട് കരഞ്ഞു. നീയ്യ് കുട്ട്യല്ലേ.. പോട്ടെടാ.. വെഷമിക്കല്ലേന്ന് മാപ്ള പറഞ്ഞതൊന്നും നെലോളിക്കണേൻറെടക്ക് ചൊക്ളി കേട്ട് ല്ല്യ.

അവൻ കൊറെ കരഞ്ഞു. പട്ടീടന്തി നിറുത്താണ്ട് ഓളിയിട്ട് അങ്ങട്ട് കരഞ്ഞു. മാപ്ളേടെ കണ്ണിലും വെള്ളം പൊട്ടി..രവീടെ കാര്യാണോ ചൊക്ളീടെ കാര്യാണോ എന്താ കാരണന്ന് അന്തോണി മാപ്ളക്കും തിരിഞ്ഞില്ല.

ചൊക്ളി 8

       

26/01/20

 

(എട്ട് )

ഏക്കോം തേക്കോം നിർത്തി ചൊക്ളി ചെകിടോർത്ത് പായേല് എണീട്ടിരുന്നു. ആരോ വേദനെടുത്ത് നെലോളിക്കണ പോല്യാണ് അവന് തോന്നീത്. ന്ലാവ് പോലെ മങ്ങിയ വെളിച്ചം മാത്രേ പാറേല് വീഴലുള്ളൂ. അവൻ പത്ക്കേപ്പത്ക്കേ പാറേന്നെറങ്ങി. വെതം കൊറഞ്ഞ കാലും നീട്ടി വെച്ച് ചെറിയ വെളിച്ചത്തില് കണ്ണു സൂക്ഷാക്കി ചൊക്ളി കരച്ചിൽൻറെ ദിക്ക് തപ്പി..

കരേണ ആളേ കണ്ടപ്പോ ചൊക്ളി വെറച്ചു. ശൂലപാണി വാര്യര്, പോലീസ് പിടിച്ചോണ്ട് പോയ രവീടെ അച്ഛനാ, നല്ലോരു വാര്യത്ത് കെടക്കേമ്മെ കെടന്ന് സുഗായി ഒറങ്ങണ്ട മനിഷേൻ, പച്ചപ്പാതിരക്ക്, റോട്ടില് കെടന്നുരുണ്ട് 'അയ്യോ' നെലോളിക്കണു.

ചൊക്ളി അട്ത്ത് ചെന്ന് 'വാരര് മാഷേ'ന്ന് വിളിച്ച്.

ശൂലപാണി വാരര് ആലൂര് സ്ക്കൂളിലെ മാഷേര്ന്ന്. ഇപ്പോ പെൻഷ്യനായി. രവീന്ന് ഒരു മോനും രമാന്ന് ഒരു മോളും. രവിയെ പോലീസ് പിടിച്ചോണ്ട് പോയപ്പോ ഭർത്താവ് മോളേ വാര്ത്ത്‌ കൊണ്ടന്ന് ആക്കി.. പിന്നെ വന്ന്ട്ടില്ല..അയ്യാക്ക് രവീടെ പേരും പറഞ്ഞ് പോലീസ് അയ്യാടെ വീട്ടീ വരണത് ഇഷ്ടല്ലാന്ന് ദേവുഅമ്മ്യാ ചൊക്ളിയോട് പറഞ്ഞതേയ്..

ചൊക്ളി പിന്നീം പിന്നീം വിളിച്ചു..

വിളിയേക്കണില്ല.. ഉരുളാണ് വഴീല് കെടന്നിട്ട്.. വല്ലാണ്ട് പരോശാന്ന് ആ ഉരുളല് കണ്ടപ്പോ ചൊക്ളിക്ക് തിരിഞ്ഞു. മൊയ്തീൻറെ വീടാണട്ത്ത്. ചൊക്ളി അങ്ങട്ടേക്ക് ഓടി..

'മൊയ്തീൻക്കാ'... 'മൊയ്തീൻക്കാ' ന്ന് രണ്ടു തൊള്ളയിട്ടപ്പൊ മൊയ്തീൻ വാതല് തൊറന്നു എറങ്ങി വന്നു.

വിവരറിഞ്ഞ് മൊയ്തീൻക്കയും നസീറീക്കേടെ എളേത് നവാസിക്കേം ചൊക്ളീടൊപ്പം പാഞ്ഞ്. പാഞ്ഞോണം പാഞ്ഞ് ശൂലപാണി വാര്യര്ടേ അട്ത്തെത്തി. വാര്യര് നെലോളി നിർത്തീട്ട് പട്ടീടന്തി കെതക്കാര്ന്ന്. ഒരന്തല്ലാത്ത കെതപ്പ്.. മൊയ്തീൻക്കാ വാര്യരെ എണീപ്പിക്കാൻ നോക്കി.. പറ്റ്ണില്ല. കൊഴഞ്ഞ് കൊഴഞ്ഞ് പോവ്വാണ്..

പെട്ടെന്ന് വാര്യര് ഒന്ന് പെടഞ്ഞ്..വായ ഒരു ലേശം തൊറന്ന്.. മൊയ്തീൻക്കേടെ കൈയീ കെടന്ന് ന്നെ അനങ്ങാണ്ടായി...

മൊയ്തീൻക്കേം നവാസിക്കേം 'എൻറള്ളോ'ന്ന് ഒറക്കെ നെലോളിച്ചപ്പോ ചൊക്ളീം വിളിച്ച് 'എൻറള്ളോ'ന്ന്.. വേറൊന്നും അന്നേരം കിട്ടീല്ല. ദേവുഅമ്മ വിളിക്കണ പോലെ 'ആലൂരപ്പാ'ന്നും ചൊക്ളി വിളിക്കാറ്ണ്ട്. അവരടെ അടുത്താവുമ്പോ...

മൊയ്തീൻക്കാ നവാസിക്കേടെ കൈയും പിടിച്ച് വാര്യംകെണറിൻറവിടേക്ക് പാഞ്ഞു. ചൊക്ളിക്ക് പേടി വന്നു. അവൻ വെയർത്തു. തന്നേള്ളൂ.. വാരര് മാഷ്ടെ
കൈ ഒന്നൂടി പിടിച്ചോക്കി. 'മാഷേ...വാരര് മാഷേ'ന്ന് വിളിച്ചോക്കി...അനക്കല്യ... പിന്നെ നിന്ന് ല്യ. അവൻ അവടന്ന് ഓടി..അന്തോണി മാപ്ളേടെ കടേടെ മുന്നില് കുത്തീരുന്ന് കെതച്ചു.

മൊയ്തീന് ആ പാതിരാനേ
രത്ത് പടച്ചോനോടന്നെ പെണക്കം വന്നു. ഊദ്രവിക്കണേന് കണക്കൊന്നൂല്ലേ.. വാര്യത്തെ ഉമ്മറത്ത് ലൈറ്റ് കത്തികെട്ക്ക്ണ്ട്. വാതല് തൊറക്കണില്ല. ആരും വിളിയേക്കണില്ല. കൊറച്ച് നേരം ഒച്ചേം വിളീം എട്ത്തിട്ട് മൊയ്തീൻ നവാസിൻറെ കൈയും പിടിച്ച് മറിയപ്പാറേല് തന്നെ തിരിച്ചെത്തി.

ചൊക്ളി അന്തോണി മാപ്ളേടെ കടേടെ മുന്നീത്തന്നെ ഇരിക്കാര്ന്നു. പാറേപ്പോയി കെടക്കാൻ അവന് പേടിയായി. മൊയ്തീൻക്കേം നവാസിക്കേം ആ കടവരാന്തേല് ഇരുന്നപ്പളാണ് അവൻറെ ശാസം നേരെയായത്.

നവാസിക്ക ഒറക്കം തൂങ്ങി വീണോണ്ടിര്ന്നു. ചൊക്ളിക്ക് ഒറക്കം വന്നേയില്ല. മൊയ്തീൻക്ക മിണ്ടണേയില്ലാന്ന് അവൻ കണ്ടു. അതും അവന് വല്യ വെഷമായി.

രാത്രി മൂന്നുമണിയായപ്പോ നേമവെടി പൊട്ടണ ഒച്ച കേട്ടു. ത് രപ്പേര്ത്തേവര്ടെ അമ്പലത്തീ പൊട്ടണ വെട്യാണ്. ദേവുഅമ്മ പറഞ്ഞ് തന്നെയാണ്. ആലൂര് പൊഴ ആ തേവരവടീം പോണ് ണ്ട്. അതാ ങ്ങനെ പൊഴേക്കൂടി നേമവെടിയൊച്ച കേക്കണത്...

മൊയ്തീൻക്ക എണീറ്റ് വല്യോരു കോട്ടുവായേം ഇട്ട് നവാസിക്കേം തട്ടിയെണീപ്പിച്ച് ട്ട് പറഞ്ഞു. 'നേമബെടിയൊച്ച കേട്ട്.. അന്തോണ്യാപ്ളേം ഗോവാലന്നായരേം ബിളിച്ച് ബരാടാ.. ചൊക്ളീം ബേണം. കോടംകരേലെ പോലീറ്റേഷനീ പറേണം. നീയല്ലേ ആദ്യം കണ്ട്..ഇബടെ ഇരി.. എല്ലാരായിട്ട് ബരാം'

മൊയ്തീൻക്ക പോയപ്പോ ചൊക്ളി തുള്ളിവെറച്ചു പോയി. പോലീസാരേ പേട്യാണ്.. രവീനേം അന്നേഴിച്ച് പോലീസാര് വന്ന് അങ്ങാടീല്ണ്ടാക്കിയ തൊയിരക്കേട് ചൊക്ളി മറന്നിട്ടില്യ. ആ രവീടെ അച്ഛനേണ് വാരര് മാഷ്...

ചൊക്ളിക്ക് കരച്ചല് വന്നു... ആരേ വിളിച്ചാ കരയാ.. അത് നും കൂടി ആരൂല്ലല്ലോ ചൊക്ളിക്ക്....

വല്ലാത്ത ഒരു ഗെഡുവന്നെ..