ദൈവം പ്രസാദിച്ചു വരം തരണമെന്ന്....

( കുടുംബമാധ്യമത്തിലെ സ്വകാര്യത്തില്‍ 2013 മാര്‍ച്ച്  8   നു  പ്രസിദ്ധീകരിച്ചത്. )

ഇക്കഴിഞ്ഞ ഫെബ്രുവരി  26 ന്  ആയിരുന്നു അഖില ലോക പ്രശസ്തമായ  ആറ്റുകാല്‍ പൊങ്കാല. പല തരത്തില്‍  കണ്ണഞ്ചിക്കുന്ന താരപ്രഭയുള്ളവരും,  പല തരം പോയിട്ട്  ഒരു തരത്തിലും യാതൊരു  പ്രഭയുമില്ലാത്തവരുമായ  മുപ്പത്തഞ്ച്  ലക്ഷം സ്ത്രീകള്‍ തിരുവനന്തപുരത്തെയാകമാനം  പിടിച്ചെടുത്തുകൊണ്ട്  ഇഷ്ടവരദായിനിയായ ആറ്റുകാല്‍  ദേവിയെ  പ്രാര്‍ഥിച്ച്   മണ്‍കലങ്ങളില്‍ പൊങ്കാല  നേര്‍ച്ചയിട്ടു.  കുടിവെള്ളമെത്തിക്കുന്ന പൈപ്പ് നാലിടത്ത്  പൊട്ടിയതുകൊണ്ട്  മെഡിക്കല്‍ കോളേജിലുള്‍പ്പടെ  ശസ്ത്രക്രിയകള്‍  നിറുത്തിവെക്കുകയും  ഏതാണ്ട്  അറുപതു മണിക്കൂറോളം  കുടിവെള്ളമില്ലാതെ  തലസ്ഥാന നഗരം  ദാഹിച്ചു പൊരിയുകയും ചെയ്തെങ്കിലും , പൊങ്കാല മഹോല്‍സവത്തി നെ ഈ ബുദ്ധിമുട്ട്  തരിമ്പും ബാധിച്ചില്ല.  വിവിധ  സംഘടനകളുടെ നേതൃത്വത്തില്‍ തികച്ചും കാര്യക്ഷമമായി  നടത്തപ്പെട്ട അന്നദാനവും കുടിവെള്ള വിതരണവും തന്നെയാവണം  അതിനു  കാരണം.  ജാതിമതഭേദമെന്യേ എല്ലാ ആരാധനാലയങ്ങളും പൊങ്കാലയര്‍പ്പിക്കാനെത്തിയ സ്ത്രീകള്‍ക്ക്  എല്ലാ  സഹായസഹകരണങ്ങളും ഒരു ലോഭവുമില്ലാതെ   നല്‍കുകയുണ്ടായി.  പൊങ്കാലയ്ക്കു ശേഷം എല്ലാ അവശിഷ്ടങ്ങളും  റെക്കോര്‍ഡ്  സമയത്തിനുള്ളില്‍  കുഴിച്ചു മൂടി  നഗരത്തെ തീര്‍ത്തും മാലിന്യമുക്തമാക്കിയ നഗരസഭയുടെ  സേവനവും  അതീവ സ്തുത്യര്‍ഹമായിരുന്നു.   അവിടവിടെ ഉണ്ടായ മാല പൊട്ടിക്കല്‍  പോലെയുള്ള ചുരുക്കം  ചില അത്യാഹിതങ്ങളൊഴിച്ചാല്‍  എല്ലാം ഭംഗിയായി  പര്യവസാനിച്ചു എന്നര്‍ഥം. 

അധിക  ശതമാനം സ്ത്രീകളും  എന്താവും ദേവിയോട് പ്രാര്‍ഥിച്ചിട്ടുണ്ടാവുക?  എന്‍റെ  കുട്ടികള്‍ക്കും ഭര്‍ത്താവിനും  നല്ലതു  മാത്രം വരുത്തണേ,  ഞങ്ങളുടെ ജീവിതത്തില്‍  ബുദ്ധിമുട്ടുകളും പ്രയാസങ്ങളും വരുത്തരുതേ,  നല്ല വീടുണ്ടാവണേ,  ധനമുണ്ടാവണേ, വീട്ടിലെല്ലാവര്‍ക്കും സദ്ബുദ്ധിയുണ്ടാക്കിത്തരണേ എന്നൊക്കെയാവും.  ഇതിപ്പോള്‍ ഏതു  ജാതിമതത്തില്‍ പെട്ട  സ്ത്രീകളായാലും ഇമ്മാതിരിയൊക്കെത്തന്നെയാവില്ലേ  പ്രാര്‍ഥിക്കുന്നത്?  രീതികളിലും ഭാഷയിലും  വ്യത്യാസമുണ്ടാവുമെങ്കിലും  ലോകമെമ്പാടുമുള്ള  ആകെ മൊത്തം  പെണ്‍പ്രാര്‍ഥനകളില്‍ അധിക  പങ്കും ഇങ്ങനെയൊക്കെ തന്നെയായിരിക്കണം.  അല്ലാതെ  മരം വെട്ടാനും മണലൂറ്റാനും  മന്ത്രിയാവാനും  തന്ത്രിയാവാനും ആയുധ വില്‍പനക്കും  ഒക്കെ എന്നെ സഹായിക്കണേ ദൈവമേ എന്നൊന്നും പ്രാര്‍ഥിക്കുന്നത്  സ്ത്രീകള്‍ക്ക്   അത്ര എളുപ്പമല്ലല്ലോ. 

സ്വന്തം വ്യക്തിപരമായ ലാഭങ്ങള്‍ക്കു  വേണ്ടിയല്ലാതെ, ഒരു പൊതുകാര്യത്തിനുവേണ്ടി  പ്രാര്‍ഥിക്കുവാനോ  വ്രതം നോല്‍ക്കുവാനോ   മനുഷ്യര്‍  തയാറാവുമോ  എന്ന  സംശയം  പല തരം  ആരാധനാലയങ്ങള്‍  സന്ദര്‍ശിച്ചിട്ടുള്ള, സന്ദര്‍ശിക്കാറുള്ള   എനിക്ക് എപ്പോഴുമുണ്ടാകാറുണ്ട് .  പൊതുകാര്യം പോകട്ടെ,  തൊട്ടയല്‍പക്കത്തുകാരനു   വീടുണ്ടാവാനോ അയാളുടെ കട  ബാധ്യതകള്‍  തീരാനോ പോലും  അധികം  ആരും വ്രതം നോല്‍ക്കുകയും  ആരാധനാലയങ്ങളില്‍  പോയി  പ്രാര്‍ഥിക്കുകയും  ചെയ്യാറില്ല .  മനുഷ്യര്‍ കൂടുതല്‍  കൂടുതല്‍  ദൈവത്തോട്  യാചിക്കുന്നത്  ഞാന്‍, എന്‍റെ  എന്ന വികാരം മാത്രം  അവരെ അടിമുടി  കീഴ്പ്പെടുത്തുമ്പോഴായിരിക്കുമോ?

ഈ വിചാരങ്ങളെല്ലാം  മനസ്സിലുണ്ടായിരുന്നതു  നിമിത്തമാണ്   കൂടംകുളത്തു നിന്നെത്തി  ആറ്റുകാലമ്മയ്ക്ക്  പൊങ്കാലയിട്ട, സമരോല്‍സുകരായ ആ  സ്ത്രീകളെ ഒരേ സമയം  അല്‍ഭുതത്തോടെയും എന്നാല്‍  തികഞ്ഞ വേദനയോടെയും മാത്രം  വീക്ഷിക്കേണ്ടി വന്നത് . തിരുവനന്തപുരത്ത് ദുഷ്ടജന ശിക്ഷകയും  ആശ്രിത വല്‍സലയുമായ  ഒരു  അമ്മനുണ്ടെന്നു കേള്‍വിപ്പെട്ട്  വന്നിരിക്കുകയാണവര്‍. അവരുടെ തികച്ചും ന്യായമായ  സമരത്തെ  അടിച്ചമര്‍ത്തുന്ന ഭരണാധികാരികള്‍ക്ക്  നല്ല ബുദ്ധികൊടുത്ത് ഈ  അണു ഉലൈയില്‍ നിന്ന്  അമ്മന്‍ അവരെയും അങ്ങനെ നമ്മുടെ രാജ്യത്തിനെ തന്നെയും  കാപ്പാത്തണമെന്നാണ്  ആ സ്ത്രീകളുടെ  പൊങ്കാല നേര്‍ച്ചയും പ്രാര്‍ഥനയും.

  

അണു ഉലൈ  വേണ്ടാം വേണ്ടാം എന്ന് ആണവ നിലയത്തിന്  എതിരേ  നിരന്തരമായി സമരം ചെയ്യുകയും പോലീസിനാല്‍ ദയാലേശമെന്യേ വേട്ടയാടപ്പെടുകയും ലോക്കപ്പുകളില്‍  പലവട്ടം പൂട്ടിയിടപ്പെടുകയും ചെയ്തിട്ടുള്ള ആ സ്ത്രീകള്‍  അവരുടെ  ബോധ്യങ്ങളില്‍  ഉറച്ചു   നില്‍ക്കുമ്പോഴും തികച്ചും നിസ്സഹായരും ഒറ്റപ്പെട്ടവരുമാണ്.  അവരുടെ സമരവും വേദനയും  കൂടംകുളത്തു നിന്ന് കഷ്ടിച്ച്  നൂറു കിലോ മീറ്റര്‍  ഇപ്പുറത്തുറങ്ങുന്ന തിരുവനന്തപുരത്തിനു പോലും  ഒരു ഉല്‍ക്കണ്ഠയാകുന്നില്ല.   കൂടംകുളത്ത്  എന്തെങ്കിലും  ആണവ ദുരന്തമുണ്ടാകുന്ന പക്ഷം, തിരുവനന്തപുരം എത്ര ഭീകരമായി വിലകൊടുക്കേണ്ടി വരുമെന്ന് ആര്‍ക്കും പ്രവചിക്കാന്‍  പോലും സാധിക്കുകയില്ലെങ്കിലും  കൂടംകുളത്തെ എല്ലാവരും  ബോധപൂര്‍വം  മറന്നു കളയുന്നു.  പകരം വൈദ്യുതി, വികസനം  എന്നു ജപിക്കുന്നു.  ഭാവിതലമുറകളെ  കൂടി കൊലയ്ക്കു കൊടുക്കുന്ന വിധമായിരിക്കണമോ വൈദ്യുതിയും വികസനവും നേടേണ്ടത് എന്ന ചോദ്യം  അധികം ആരേയും  സ്വപ്നത്തില്‍  പോലും അലട്ടുന്നില്ല.  

ആരുമില്ലാത്തവര്‍ക്ക്  ദൈവം തുണയെന്ന് ഞാന്‍  ചെറുപ്പം മുതലേ കേട്ടു  പഠിച്ചിട്ടുണ്ട്.   അങ്ങനെയാണെങ്കില്‍ നമ്മള്‍ മനുഷ്യര്‍  ബോധപൂര്‍വം  അനാഥരാക്കി തീര്‍ക്കുന്നവരെ പരിഗണിക്കാതെ   നമുക്ക് ആശിക്കുന്നത്രയും  വൈദ്യുതിയും വികസനവും  പുരോഗതിയും  ഇഷ്ടം പോലെ  നല്‍കുവാന്‍ ദൈവത്തിനു സാധിക്കുമോ? 

അങ്ങനെ സാധിക്കുകയില്ല  ദൈവത്തിനെന്ന് പൊങ്കാലയിട്ട്  പ്രാര്‍ഥിച്ച  കൂടംകുളത്തുകാര്‍  സ്ത്രീകളെപ്പോലെ  ഞാനും കരുതുന്നു.