പെണ്‍ ജോലികള്‍

( കുടുംബമാധ്യമത്തിലെ സ്വകാര്യത്തില്‍ 2014 ഫെബ്രുവരി  28  ന്  പ്രസിദ്ധീകരിച്ചത് )

ഉത്തരേന്ത്യന്‍ വാസക്കാലത്താണ്..

ഒരു തോട്ടക്കാരന്‍ വരുമായിരുന്നു... അടുത്ത വീട്ടില്‍. അവിടെ നയനാനന്ദകരമായ ഒരു പൂന്തോട്ടമുണ്ട്.. അതിനെ പരിപാലിച്ചിരുന്നത് അയാളാണ്.. വലിയ വിദ്യാഭ്യാസമൊന്നുമില്ല. എങ്കിലും തോട്ടത്തിലെ ജോലികള്‍ അയാള്‍ ഒരുവിധം ഭംഗിയായി ചെയ്തിരുന്നു.
ഒരു ദിവസം അയാള്‍ അവിടത്തെ വീട്ടമ്മയോട് ഒച്ചവെച്ച് സംസാരിക്കുന്നത് കേട്ട് ഞാനൊന്നു എത്തി നോക്കി.

അയാള്‍ തോട്ടം നനച്ച്  ചളി ചവിട്ടിക്കയറ്റി വരാന്ത വൃത്തികേടാക്കിയിരുന്നു.. അവിടെ മൂലയിലിരുന്ന, നീണ്ട  വടിയുടെ അറ്റത്ത്  പിടിപ്പിച്ചിട്ടുള്ള മോഡേണ്‍ മോപ്പെടുത്ത് വരാന്ത ഒന്നു തുടച്ചേക്കാന്‍ വീട്ടമ്മ പറഞ്ഞു..

അയാള്‍ അലറി. 

'ഈ പെണ്ണുങ്ങളെപ്പോലെ തറ തുടയ്ക്കുന്ന പണിയൊന്നും ഞാന്‍ ചെയ്യില്ല. കാരണം ഞാന്‍ ഒരു ആണാണ്..കാശുണ്ടെന്ന് കരുതി ഒരു പെണ്ണ് എന്നോട് തറ തുടയ്ക്കാന്‍ പറയാന്‍ പാടില്ല.. കാരണം ഞാന്‍ ഒരു ആണാണ്.'

അന്നു മുതല്‍ അയാള്‍ അവിടെ ജോലിക്കു വരാതായി.

പിന്നെ ദാ, കുറച്ച് നാള്‍ മുന്‍പ് കേരളത്തിലെ ഒരു സവര്‍ണ ഭവനം, ഞാന്‍ പതിവ് പോലെ കാഴ്ചക്കാരി , മൌനി.

അവരുടെ കാഴ്ചയില്‍ത്തന്നെ അതീവ സവര്‍ണനായ,  ഇംഗ്ലീഷ് പത്രമൊക്കെ  വായിക്കുന്ന ഡ്രൈവര്‍ അലറി... .' ഞാനൊരു  നായരാണ്... ആണൊരുത്തന്‍. എനിക്ക് ഗ്ലാസ് കഴുകേണ്ട ഗതികേടില്ല. അതൊക്കെ ബുദ്ധിയില്ലാത്ത പെണ്ണുങ്ങളുടെ പണിയാണ്. എന്‍ജിനീയറിംഗ് കോളേജില്‍ പ്രൊഫസറായതുകൊണ്ടൊന്നും കാര്യമില്ല, പെണ്ണുങ്ങള്‍ ആണുങ്ങളോട് പാത്രം കഴുകാന്‍ പറയരുത്. '

അവിടത്തെ വീട്ടമ്മ കേരളത്തിലെ പ്രശസ്തമായ ഒരു എന്‍ജിനീയറിംഗ് കോളേജില്‍ ഹെഡ് ഓഫ് ദി ഡിപ്പാര്‍ട്ട്മെന്‍റാണ്.

ഭര്‍ത്താവിന്‍റെ പിറന്നാള്‍ പ്രമാണിച്ച് അവര്‍ വീട്ടില്‍ പായസം വെച്ചു. ഡ്രൈവര്‍ക്കും ഒരു ഗ്ലാസ് പായസം കൊടുത്തു. ' പായസം കുടിച്ചിട്ട് ആ ഗ്ലാസ് ഒന്നു കഴുകി പോര്‍ച്ചിന്‍റെ ജനല്‍പ്പടിയില്‍ വെച്ചോളൂ , ഞാന്‍ അത് പിന്നെ എടുത്തോളാം ' എന്ന് പറഞ്ഞു അവര്‍ അകത്തേക്ക് പോകാന്‍ തുനിഞ്ഞു.

അപ്പോഴാണ് അയാള്‍ അലറിയത്.

അയാള്‍ പായസം കുടിക്കാതെ പോയി. പിന്നീട് അയാള്‍ അവിടെ ജോലിക്കു വന്നില്ല.

അതിപുരോഗമനം പറയുന്ന പല പുരുഷന്മാരും വീട്ടില്‍ അതിഥികളായി വരാറുണ്ടായിരുന്നു, ' ഞങ്ങള്‍ ഈ പ്ലേറ്റ് കഴുകി വെച്ചോട്ടെ ' എന്നവര്‍ വിനയം പ്രകടിപ്പിക്കുമ്പോള്‍ എനിക്കതില്‍ അല്‍ഭുതം തോന്നാറില്ല. അവരവര്‍ ഭക്ഷണം കഴിച്ച പ്ലേറ്റ് കഴുകിവെക്കുന്നതില്‍ എന്താണിത്ര വലിയ കാര്യമെന്ന് ഞാന്‍ കരുതാറുണ്ടായിരുന്നു. നന്നെ ചെറുപ്പത്തില്‍ വീട്ടമ്മ വേഷം കെട്ടാന്‍ പോയതിന്‍റെ അറിവില്ലായ്മയും കുഴപ്പവുമായിരുന്നു എനിക്ക്.  മനുഷ്യര്‍ ഭംഗിവാക്കുകളായി  പറയുന്നതൊക്കെ തികച്ചും സത്യമാണെന്നും ആത്മാര്‍ഥമാണെന്നും തെറ്റിദ്ധരിച്ചു കളയുമായിരുന്നു ഞാന്‍. എന്നാല്‍ ' അയ്യോ! വേണ്ട, ഞാനുള്ളപ്പോള്‍ നിങ്ങള്‍ അതു കഴുകുകയോ ' എന്ന് പറഞ്ഞ് അവരെ വിലക്കുകയാണ് ഞാന്‍ ചെയ്യേണ്ടിയിരുന്നതെന്ന് പിന്നെയാണ് എനിക്ക് മനസ്സിലായത്. കാരണം പ്ലേറ്റ് കഴുകിക്കഴിഞ്ഞാല്‍ അവരുടെ വീട്ടിലെ സ്ത്രീകള്‍ പുരുഷന്മാരെക്കൊണ്ട് പ്ലേറ്റ് കഴുകിക്കുന്നത് മഹാപാപമായിക്കാണുന്നവരാണെന്ന് എന്നെ അറിയിക്കുന്നതില്‍ ഇടതുപക്ഷത്തിന്‍റെ ഇടത്തേ അറ്റത്താണെന്ന് സ്വയം ഭാവിക്കുന്നവര്‍ പോലും യാതൊരു മടിയും വിചാരിക്കാറുണ്ടായിരുന്നില്ല....

പെണ്ണിന്‍റെ  അടിപ്പാവാട കഴുകുന്നവന്‍ എന്ന് പറഞ്ഞാല്‍ പുരുഷനെ സംബന്ധിച്ച് ഇത്രമേല്‍ ഒരു  അപമാനം വരാനില്ലത്രേ. ഈ അപമാനത്തെപ്പറ്റി എണ്ണിയാലൊടുങ്ങാത്ത രചനകളില്‍ നമ്മള്‍ വായിച്ചിട്ടുണ്ട്. ആ പുരുഷ കഥാപാത്രത്തിന്‍റെ  ഗതികേടും അഭിമാനമില്ലാത്ത ജീവിതവും ഓര്‍ത്ത് വായനക്കാര്‍ വിങ്ങി നീറണമെന്ന് ആ രചനകള്‍ നമ്മോട് പറഞ്ഞിട്ടുണ്ട്. 

നമ്മള്‍ പെണ്ണുങ്ങള്‍ നിത്യവും കഴുകിയിടുന്ന അടിവസ്ത്രങ്ങളുടെ കണക്ക് എത്രയാണ് ... മുകളില്‍ പറഞ്ഞ  നിലക്കാണെങ്കില്‍  പെണ്ണുങ്ങള്‍ക്ക് ബാക്കിയായി ഇനി  അഭിമാനത്തിന്‍റെ  തരി  പോലുമുണ്ടോ?

 ഭാര്യയുടെ കാല്‍ മുട്ടിനു കീഴെ ഭര്‍ത്താവ്  കൈ കൊണ്ട്  തൊടുന്നത് അയാളുടെ  പൌരുഷത്തിനു  കുറവാണെന്ന്  കരുതുന്ന  വിദ്യാസമ്പന്നരേയും  ഉന്നതോദ്യോഗസ്ഥരേയും  ഒക്കെ  വടക്കേ  ഇന്ത്യയില്‍  ഞാന്‍ കണ്ടിട്ടുണ്ട്. സ്വന്തം വ്യക്തി ജീവിതത്തില്‍  തന്‍റെ ഭാര്യയായ സ്ത്രീ   കാലു തടവിത്തരാമോ  എന്ന്  ചോദിച്ചത്  അയാളെ  ബഹുമാനമില്ലാത്തതുകൊണ്ടാണെന്ന് ഉറച്ചു  വിശ്വസിക്കുന്ന മൂഢന്‍മാര്‍ വലിയ പദവികളും  അധികാരങ്ങളും മറ്റും കൈകാര്യം ചെയ്യുന്ന  ഇടമാണ്  നമ്മുടെ  നാട്. ആണായി ജനിച്ചതുകൊണ്ട് മാത്രം സ്ത്രീയുടെ  അതിരില്ലാത്ത  പ്രീണനവും  അന്തമില്ലാത്ത സേവനവും  ലഭ്യമാകണമെന്ന്  മഹാഭൂരിപക്ഷം പേരും ഉറച്ചു വിശ്വസിക്കുന്നു. 

വേവിച്ച  ഭക്ഷണം  കഴിക്കാന്‍ ഇഷ്ടമുള്ളവെരെല്ലാം  ആഹാരം  പാകം ചെയ്യാന്‍  പഠിച്ചിരിക്കണമെന്നും  പാത്രങ്ങളില്‍ ഭക്ഷണം വേണമെന്നുള്ളവരെല്ലാം പാത്രങ്ങള്‍ കഴുകാന്‍ തയാറാവണമെന്നും തൂണിയുടുക്കുന്നവരെല്ലാം  അതു  കഴുകിയിടുവാനും  ഒരുങ്ങണമെന്നും  അതെല്ലാം ചെയ്യുന്നതല്ല പകരം  ചെയ്യാതിരിക്കുന്നതാണ് കുറവെന്നും മ്ലേച്ഛമെന്നും നമ്മള്‍  പഠിക്കേണ്ട  കാലം  കഴിഞ്ഞില്ലേ.. 

നമ്മുടെ  മക്കളെങ്കിലും  അങ്ങനെയുള്ള  തിരുമണ്ടന്‍ വിചാരങ്ങള്‍ക്ക് അടിമപ്പെടാതിരിക്കട്ടെ.  പാത്രം  കഴുകുന്നതും  തുണിയലക്കുന്നതും  കുഞ്ഞിന്‍റെ  നാപ്പി  മാറ്റുന്നതുമൊക്കെ താന്‍ ഭാര്യയോട്  ചെയ്യുന്ന ഒരു  ഔദാര്യമാണെന്ന് കരുതി വേദനപ്പെടുന്ന   ആണ്‍കുട്ടികള്‍ നമുക്ക് ഇനിയുള്ള കാലം  ജനിക്കാതിരിക്കട്ടെ.. 

നമുക്കൊപ്പം  എല്ലാം  പങ്കിടുന്ന  തോളോടുതോള്‍  ചേര്‍ന്ന് ‘ നീ വെറും പെണ്ണ് ‘ എന്ന്  നമ്മെ ഇകഴ്ത്താത്ത കൂട്ടുകാരായ  ആണ്‍കുട്ടികളെയും  പുരുഷന്മാരെയും കാണാന്‍ അടുത്ത  തലമുറയിലെ  പെണ്‍ കുട്ടികള്‍ക്കും സ്ത്രീകള്‍ക്കും അവസരമുണ്ടാകട്ടെ...