കുറിപ്പ് 21
ആ യാത്ര കഴിഞ്ഞ് മടങ്ങിയെത്തിയപ്പോള് മുതല് എന്നും വഴക്കായിരുന്നു വീട്ടില്. ഇത്ര സന്തോഷകരമായ ഒരു ട്രിപ്പ് കഴിഞ്ഞുവന്നിട്ട് എന്തു മണ്ണാങ്കട്ടയ്ക്കാണ് ഈ വഴക്കെന്ന് മകനു മനസ്സിലായില്ല. അച്ഛന് പറഞ്ഞതു പോലെ അവന് അമ്മയെ കൃത്യമായി വാച്ച് ചെയ്തിട്ടുണ്ട്. അതും അവന് അച്ഛനോട് പറഞ്ഞിരുന്നു. അവന് രാത്രി ഉറങ്ങാതെയും ഭയന്നും കരഞ്ഞും എല്ലാം ഭയങ്കരമായി മടുത്തു. 'അമ്മേ നമുക്ക് ഈ വീടു വിട്ടു എവിടെങ്കിലും പോകാം, അമ്മ എന്നേം കൊണ്ട് പോകൂ, എന്നെ കൂട്ടാതെ അമ്മ തനിച്ച് എങ്ങും പോകരുത് എനിക്ക് പഠിക്കണ്ട. എവിടെയെങ്കിലും പോയി അമ്മേം കെട്ടിപ്പിടിച്ച് ഉറങ്ങിയാല് മതി' എന്ന് അവന് ഏങ്ങലടിച്ചു കരഞ്ഞപ്പോള്, അവള് പുറത്തിറങ്ങിയേക്കുമെന്ന് തോന്നിയപ്പോള് അയാള് വീടിന്റെ വാതിലടച്ച് അവരെ വെല്ലുവിളിച്ചു. ' തള്ളേം മോനും കൂടി ഇറങ്ങുന്നതൊന്നു കാണട്ടേ' എന്നായിരുന്നു അയാളുടെ വാശി. അവള് തോല്വി സമ്മതിച്ച ആ നിമിഷം അയാള് കലിയടക്കാന് കഴിയാതെ ഒരു ബക്കറ്റ് തണുത്ത വെള്ളം കൊണ്ടുവന്ന് അവളുടെ തല വഴിയെ കമഴ്ത്തി.
പിറ്റെ ദിവസം രാവിലെ അയാള് അവളേയും മകനേയും വിട്ടിട്ട് ദൂരെ ഒരു ആശ്രമത്തില് ചേരാന് പോയി. അവള് ഒരു തനി തേവിടിശ്ശിയാണെന്നും അവള്ക്കൊപ്പം ഇനി അയാള് പാര്ക്കില്ലെന്നുമായിരുന്നു അയാളുടെ നിലപാട്. പോകും മുമ്പ് കാറു കഴുകുന്ന പയ്യനോടും തേപ്പുകാരിയോടും ഗേറ്റില് നില്ക്കുന്ന സെക്യൂരിറ്റികളോടും അവള് വേശ്യയാണെന്ന് അറിയിക്കാന് അയാള് മറന്നില്ല.
അവള് എല്ലാ ബന്ധുക്കളേയും വിളിച്ചറിയിച്ചു. എന്ജിനീയറിംഗ് കോളേജില് അയാള്ക്കൊപ്പം പഠിച്ച രണ്ട് സുഹൃത്തുക്കളേയും വിവരമറിയിച്ചു. അയാള് ഒരിയ്ക്കലും തിരിച്ചു വരരുതേ എന്നായിരുന്നു അവളുടെ പ്രാര്ഥന, ചേട്ടത്തിയമ്മയോട് അതിനായി പ്രാര്ഥിക്കാനും വഴിപാട് കഴിക്കാനും അവള് പറയാതിരുന്നില്ല.
ഉച്ചയായപ്പോഴേക്കും അയാള് എവിടേക്കു പോകുന്നുവെന്ന് അയാളുടെ സുഹൃത്തുക്കള് കണ്ടെത്തി .അവര് അവളെ സമാധാനിപ്പിച്ചു. അവര് പോയി അയാളെ കാണാമെന്നും സംസാരിക്കാമെന്നും എല്ലാ പ്രശ്നങ്ങളും പരിഹരിക്കാമെന്നും വാക്കു കൊടുത്തു.
അവര് നിരന്തരമായി അയാളോട് സംസാരിച്ചു. ആദ്യമെല്ലാം താനാണ് ശരി എന്ന് വാദിച്ച് പിടിച്ച് നില്ക്കാന് നോക്കിയെങ്കിലും ഒരു സുഹൃത്ത് അയാള്ക്കിട്ട് ഒന്നു പൊട്ടിച്ചപ്പോള് അയാള് ഒതുങ്ങി. അയാള് തെറ്റ് ചെയ്തുവെന്നും ചെയ്യുന്നത് തെറ്റാണെന്ന് അയാളോട് ആരും പറഞ്ഞു കൊടുത്തില്ലെന്നുമായിരുന്നു ന്യായമായി പറഞ്ഞത്.
ഭാര്യയായിരുന്നതുകൊണ്ട് അവള് പറയുന്നതൊന്നും കാര്യമാക്കേണ്ടതില്ലെന്നായിരുന്നു അയാളുടെ വിചാരം എന്നും ഒരു ന്യായം അയാള് പറഞ്ഞു നോക്കി. അവസാനം ഒത്തിരി പണിപ്പെട്ട് കാര്യങ്ങളില് അവര് ഒരു ഒത്തുതീര്പ്പുണ്ടാക്കി. അയാള് കൂട്ടുകാരുമായി ചേര്ന്ന് ഒരു ഓഫീസ് ശരിയാക്കി അതില് ജോലി ചെയ്തു തുടങ്ങും. അതിനു കുറച്ച് സ്ഥലം അവള് അയാള്ക്കായി വാങ്ങിക്കൊടുക്കണം. അതില് പലതരം കെട്ടിടനിര്മ്മാണരീതികളുടെ സ്ഥിരം പ്രദര്ശനവും അതു കാണുവാന് വരുന്ന ആള്ക്കാരുടെ കെട്ടിടനിര്മ്മാണ പ്രോജക്റ്റുകളും അവര് ഏറ്റെടുത്ത് ചെയ്യും. അയാള്ക്ക് ഒരു മുഴുവന് സമയ എന്ഗേജ്മെന്റ് ഉണ്ടാവും. അയാള് അവളെ നിരീക്ഷിക്കുന്ന, എന്നിട്ട് അനാവശ്യ ചോദ്യങ്ങള് ചോദിക്കുന്ന ചീത്തസ്വഭാവം ഉപേക്ഷിക്കും. മകനെ അമ്മയ്ക്കെതിരേ ഉപദേശിക്കുകയോ അമ്മയെ തല്ലാനോ ഉപദ്രവിക്കാനോ പ്രേരിപ്പിക്കുകയോ ഇല്ല. മകന് കേള്ക്കെ തെറി പറയില്ല....അങ്ങനെ എല്ലാം അയാള് അക്കമിട്ട് സമ്മതിച്ചു.
കൂട്ടുകാര്ക്ക് നല്ല ആത്മവിശ്വാസം ഉണ്ടായിരുന്നു. കുറെ ഏറെ അവിശ്വാസം രേഖപ്പെടുത്തിയെങ്കിലും കഴിയുന്നത്ര പ്രതിഷേധം പ്രകടിപ്പിച്ചുവെങ്കിലും മുന് പരിശ്രമങ്ങളിലെ പരാജയങ്ങളെ അവര്ക്ക് മുന്നില് നിരത്തിവെച്ചുവെങ്കിലും ഒടുവില് അവള് വഴങ്ങി.
അങ്ങനെ അയാളുടേയും ഒരു കൂട്ടുകാരന്റേയും പേരില് ഭൂമി വാങ്ങാന് അവള് പണം മുടക്കി. കൂട്ടുകാരനെ വിശ്വസിച്ചാണ് അവള് അതിനു തയാറായത്. അതോടെ അവളുടെ ബാങ്കില് പണത്തിന്റെ തൂക്കം നന്നേ ശോഷിച്ചു.
മകന് അച്ഛനോട് ചോദിയ്ക്കാതിരുന്നില്ല. ' ഇതൊക്കെ എല്ലാവരുടേയും മുന്നില് സമ്മതിച്ചിട്ട് കുറച്ച് കഴിയുമ്പോള് അച്ഛന് മാറുമോ? പിന്നേം വഴക്കു തുടങ്ങുമോ? '
അയാള് ഒരു ചമ്മിയ ചിരി ചിരിച്ചു.
പിന്നെ അയാള് ജോലി കണ്ടുപിടിക്കുന്നതിനായി ശ്രമിക്കുന്നുവെന്ന് തന്നെയാണ് അവള്ക്ക് തോന്നിയത്.
അയാള് നിരീക്ഷണം കുറച്ചിരുന്നു. അവള് അല്പം നേരം വൈകിയാലും അയാള് കാരണം ചോദിച്ചില്ല. എന്നും രാവിലെയും വൈകുന്നേരവും വഴക്കില്ലാതെ അവളെ ഓഫീസില് കൊണ്ടുവിട്ടിരുന്നു.
അവന്റെ അമ്മ മിടുക്കിയാണെന്ന് പറയുന്ന ആന്റിയുടെ വീട്ടില് ട്യൂഷനു പോകുന്നത് അയാള് കര്ശനമായി വിലക്കിയിരുന്നെങ്കിലും അവരുടെ കുട്ടികളുമൊത്ത് അവന് കളിച്ചിരുന്നു. ഇപ്പോള് അയാള് അത് കണ്ടില്ലെന്ന് വെച്ചു. അവളെ മാളില് കൊണ്ടുപോയി , അവള്ക്ക് ഒരു നല്ല ഹെയര് കട്ട് ചെയ്യിച്ചു. വീടിനടുത്ത ചില ടൂറിസ്റ്റ് സ്പോട്ടുകളില് അവര് മൂന്നുപേരും ഒന്നിച്ചു പോയി. അച്ഛനു കാര്യമായ മാറ്റം വന്നിട്ടുണ്ടെന്ന് മകന് അവളോട് പറഞ്ഞു.
വീട്ടില് കൃത്രിമമായ ഒരു സമാധാനം കൊടുങ്കാറ്റു വീശുന്നതിനു മുന്പുള്ള ഒരു ശാന്തത പോലെ എപ്പോള് വേണമെങ്കിലും തകര്ന്നു പോകുമെന്ന് അവള് സദാ ഭയന്ന ഒരു സമാധാനം കളിയാടി.
( തുടരും )
നോവല് 20
യാത്ര കഴിഞ്ഞ് മടങ്ങിയെത്തിയപ്പോള് അയാള് പലവട്ടം അവളെ തെറി വിളിച്ചു. അവളുടെ മൊബൈല് ഫോണ് അനേകം തവണ പരിശോധിച്ചു. അവളുണ്ടാക്കിയ ചായയും ഭക്ഷണവും തൊട്ടു നോക്കിയില്ല. തെറിവിളിക്കു ശേഷം പതിവുള്ള മൌനവ്രതവും ഉണ്ണാവ്രതവും അയാള് പാലിച്ചു.
അവള് മാപ്പു പറയാന് ഒട്ടും കൂട്ടാക്കിയില്ല. ഈ ബന്ധം പൊട്ടിപ്പോക്കോട്ടെ എന്ന് അവളുടെ മനസ്സ് തീരുമാനിക്കുകയായിരുന്നു.
ശനിയാഴ്ച രാവിലെ മകന് ഓഫീസിലേക്ക് കൂടെ വരുന്നുണ്ടെന്ന് പറഞ്ഞപ്പോള് അവള്ക്ക് സന്തോഷം തോന്നി. അതും ഇടയ്ക്കൊക്കെ പതിവാണ്. അവന് അവിടെയുള്ള അവളുടെ എല്ലാ ജൂനിയര്മാരുമായും വലിയ കൂട്ടാണ്. വീഡിയോ ഗെയിം കളിച്ച് രസിക്കും. മൊബൈലില് സിനിമ കണ്ട് പൊട്ടിപ്പൊട്ടിച്ചിരിക്കും. അച്ഛന് വാങ്ങിച്ചു കൊടുക്കാത്ത പിറ്റ്സ വാങ്ങിക്കഴിക്കും. എന്നിട്ട് അത് തിന്ന ആഹ്ലാദം താങ്ങാന് പറ്റാതെ വീട്ടില് വന്ന് 'അമ്മ പിറ്റ്സ വാങ്ങിത്തന്നല്ലോ' എന്ന് അച്ഛനോട് പറയും.
ഉടനെ തുടങ്ങുകയായി വഴക്ക്... ഒടുവില് അവനു തന്നെ വിഷമമാവും..
പിന്നെപ്പിന്നെ അവള് അവനെ വിലക്കുമായിരുന്നു.. 'പിറ്റ്സ വാങ്ങിത്തരില്ല.. എനിക്ക് വയ്യ വഴക്ക് താങ്ങാന്.. '
അവന് ചിരിച്ചു മയക്കും.. വാഗ്ദാനം ചെയ്യും. ഒടുവില് അവള് വഴങ്ങും.
അന്നും അതൊക്കെ തന്നെയുണ്ടായി .
പക്ഷേ, വൈകീട്ട് വീട്ടിലെത്തിയപ്പോള് അവളെ അമ്പരപ്പിച്ചുകൊണ്ട് അവന് പറഞ്ഞു. ' 'അമ്മയെ ആരൊക്കെ ആണുങ്ങള് നോക്കിയെന്ന് ഞാന് കണ്ടുപിടിച്ചിട്ടുണ്ട് അച്ഛാ..' അവന്റെ ആ പ്രത്യേക കണ്ടുപിടുത്തത്തിലെ ത്രില്ലില് കഴിച്ച പിറ്റ്സയുടെ കാര്യവും അവന് വെളിപ്പെടുത്തി.
അവള് സ്തംഭിച്ച് നിന്നു പോയി. അവന് അയാളുടെ ചാരനായിട്ടാണ് കൂടെ വന്നത്. അവളുടെ മകനായിട്ടല്ല.
അവള്ക്ക് മരിയ്ക്കണമെന്ന് തോന്നി. ആരും വേണ്ട.. ഭര്ത്താവും മകനും കുടുംബവും ജോലിയും സ്വത്തും ഈ ലോകവുമൊന്നും വേണ്ട.
മരിയ്ക്കണം.. എട്ടാം നിലയില് നിന്ന് ചാടിയാലും വേണ്ടില്ല. അയാളുടെ അലര്ച്ചകള്ക്കും വഴക്കുകള്ക്കും ശേഷവും അവള് ഒന്നും സംസാരിച്ചില്ല. 'ഈ മകന് നിന്റെ വ്യഭിചാരത്തിനു സാക്ഷിയാണെടീ വേശ്യേ 'എന്നയാള് അലറീട്ടും അവളുടെ ഉടയാത്ത മൌനം ഒടുവില് മകനെ വേദനിപ്പിച്ചു.
അവന് അടുത്തു വന്നിരുന്നു കെഞ്ചി . ' അമ്മ എന്നോട് ദേഷ്യപ്പെടൂ , എന്നെ തല്ലൂ പക്ഷെ, എന്നെ മൈന്ഡ് ചെയ്യാതിരിക്കരുത്..പ്ലീസ്. '
അവള് അവനെ കെട്ടിപ്പിടിച്ച് പൊട്ടിക്കരഞ്ഞു.
അവള്ക്ക് ഭയങ്കര വാശി തോന്നുകയായിരുന്നു പിന്നീട്. ഇനി എന്തായാലെന്ത് എന്നൊരു വിചാരം. ഏതെങ്കിലും കൊള്ളാവുന്ന മറ്റൊരു പുരുഷനുമായി മാനസികവും ശാരീരികവുമായി അടുക്കണമെന്നും ഭര്ത്താവായ അയാളെ വഞ്ചിക്കണമെന്നും അവള്ക്ക് തോന്നി. അങ്ങനെ ആലോചിക്കുമ്പോള് ഒരു പ്രതികാരം ചെയ്യുന്ന ആനന്ദം അവള്ക്കനുഭവപ്പെട്ടു. അപ്പോഴാണ് രണ്ടാമത്തെ യാത്ര വന്നത്..
അതൊരു ഓഫീസ് ട്രിപ്പായിരുന്നു. അവളുടെ ടീമിലെ പന്ത്രണ്ട് എന്ജിനീയര്മാരുമൊന്നിച്ച് , അതില് പത്തുപേരും പുരുഷന്മാരായിരുന്നു. അവളുടെ ജൂനിയര്മാര്.. പത്തും പന്ത്രണ്ടും വയസ്സിനിളപ്പമുള്ളവര് , അവളുടെ മുന്നില് ഇരിയ്ക്കാത്തവര്, ഒരോ പുതിയ പ്രോജക്ട് ആരംഭിക്കുമ്പോഴും അവളുടെ കാല് തൊട്ട് തലയില് വെയ്ക്കുന്നവര് അവര്ക്കൊപ്പമാണ് അവള് വ്യഭിചരിക്കുന്നതെന്നായിരുന്നല്ലോ അയാളുടെ കണ്ടെത്തല്... അതിലൊരു ഇരുപത്തഞ്ചുകാരിയായ പെണ്കുട്ടിയുമുണ്ടായിരുന്നു. ആ കുട്ടി യാത്ര പോകാന് മോഹിച്ചതുകൊണ്ടാണ് അവളും അതിനിറങ്ങിത്തിരിച്ചത്. അല്ലെങ്കില് അവള് ഒരിയ്ക്കലും ആ ട്രിപ്പിനു പോകുമായിരുന്നില്ല.
മകനെ കാവലായി കൂടെക്കൊണ്ടുപോകണമെന്ന് അയാള് ശാഠ്യം പിടിച്ചു. അവള് ഒട്ടും തന്നെ എതിര്ത്തില്ല. അവള് ചേട്ടത്തിയമ്മയേയും ട്രിപ്പിനു ക്ഷണിച്ചിരുന്നു. അതയാള്ക്ക് അറിയാമായിരുന്നില്ല. ചേട്ടത്തിയമ്മ അവളുടെ അനിയത്തിയുടെ മകളുമൊത്താണ് വന്നത് . ആ ദിവസങ്ങളില് അവള് മതിമറന്നാഹ്ലാദിച്ചു. മകനെ അവളുടെ ജൂനിയര്മാര് ഒരു യുവരാജാവിനെപ്പോലെയാണ് കൊണ്ടുനടന്നത്. അവനും ആഹ്ലാദഭരിതനായിരുന്നു. അയാള് അവനു വിലക്കിയിരുന്ന എല്ലാ ഭക്ഷണവും പിറ്റ്സയും വേഫര് ബിസ്ക്കറ്റുകളും ഉള്പ്പടെ അവള് വാങ്ങിച്ചുകൊടുത്തു. ടീഷര്ട്ടുകളും ട്രൌസറുകളും അവനു പിടിച്ച ബെല്റ്റുകളും സിഡികളും വാങ്ങി. അവളും ഇഷ്ടമുള്ള ആഹാരമെല്ലാം വയറു നിറയെ വാങ്ങിക്കഴിച്ചു. ബാത് ടബ്ബില് ഫോമും പുരട്ടി പതപ്പിച്ച് വിശ്രമിച്ച് സ്വന്തം നഗ്നതയെ പാവം പാവം എന്ന് പറഞ്ഞു സ്വയം താലോലിച്ചു. മകനെ കെട്ടിപ്പിടിച്ചു കട്ടിലില് കിടന്ന് കിഷോര് കുമാറിന്റെ പാട്ടു കേട്ടു.. ഷാറൂഖ് ഖാന്റെ സിനിമകള് കണ്ടു. താമസിച്ച ഹോട്ടലിലെ ബ്യൂട്ടി സലൂണില് പോയി ഫേഷ്യലും ഹെയര് മസ്സാജും ഒക്കെ ചെയ്ത് ആഹ്ലാദിച്ചു.അയാള് വിലക്കുന്നതെല്ലാം ഒരോന്നാരോന്നായി ചെയ്യുമ്പോള് അവള്ക്ക് രതിമൂര്ച്ഛയോളം പോന്ന ആനന്ദമുണ്ടായി. ഇടയ്ക്കെല്ലാം കണ്ണില് പൊട്ടി വന്ന അനാഥത്വത്തെ അവള് പുറത്തുവരരുതെന്ന് കര്ശനമായി താക്കീതുചെയ്തു അകറ്റി നിറുത്തി.
അയാള് ഫ്ലാറ്റിലിരുന്ന് വെന്തുരുകി. അവളുടെ ചേട്ടത്തിയമ്മയും അനിയത്തിയുടെ മകളും ട്രിപ്പിനു വന്നിട്ടുണ്ടെന്നറിഞ്ഞപ്പോള് അയാള്ക്ക് പൊറുക്കാന് കഴിഞ്ഞില്ല. മകനെ ഇടയ്ക്കിടെ വിളിച്ച് അമ്മ എവിടെയാണ് കിടക്കുന്നത് ? നീ എവിടെയാണ് കിടക്കുന്നത് എന്നൊക്കെ അയാള് ചോദിച്ചുകൊണ്ടിരുന്നു. അമ്മയുടെ വലതു വശത്ത് അവനും ഇടതു വശത്ത് പിങ്കിചേച്ചിയും കിടക്കുമെന്നും വേറാരും മുറിയില് കിടക്കാറില്ലെന്നും അവന് എന്നും ഉത്തരം നല്കി. അവന്റെ അമ്മായിയും അമ്മയുടെ കൂട്ടുകാരിയും വേറൊരു മുറിയിലാണ് ഉറങ്ങുന്നതെന്നും അയാള് ചോദിച്ചറിഞ്ഞു.
കുട്ടിയായതുകൊണ്ട് എന്ത് എവിടെ എങ്ങനെ പറയണമെന്ന് അവനറിയില്ലായിരുന്നു. അച്ഛന് അവനെ അയച്ചിരിക്കുന്നത് അമ്മയോട് ആരൊക്കെ സംസാരിക്കുന്നു അമ്മയെ ആരൊക്കെ നോക്കുന്നുവെന്നറിയാനാണെന്നും അച്ഛന് അവന് എന്നും കൃത്യമായി റിപ്പോര്ട്ട് നല്കുന്നുണ്ടെന്നും അവന് പരസ്യമായി പറഞ്ഞു. അവളുടെ സഹപ്രവര്ത്തകര് അന്തംവിട്ട് പരസ്പരം നോക്കി. അവര് ഒറ്റയക്ഷരം പിന്നീട് ശബ്ദിച്ചില്ല. മാഡം ജീവിക്കുന്ന ദൈന്യവും നിന്ദയും അപമാനവുമെല്ലാം ഒരു മറയുമില്ലാതെ അവരുടെ മുന്നില് പൊടുന്നനെ അനാവൃതമായി. അവനെ പഴയതു പോലെ നിഷ്ക്കളങ്കമായി കൊഞ്ചിക്കാന് കൂടി അവരില് പലരും മടിച്ചു. എവിടെയാണ് അബദ്ധം പിണഞ്ഞതെന്ന് അവനും മനസ്സിലായില്ല. കുഞ്ഞല്ലേ അവന്..
( തുടരും )
നോവല് 19
അവള് ഡിസൈന് ചെയ്ത ഒരു ഫ്ലാറ്റ് സമുച്ചയം അവളുടെ അമ്മയും അനിയത്തിയും താമസിക്കുന്ന നഗരത്തില് നിര്മ്മാണം പൂര്ത്തിയാക്കിയപ്പോള് അതില് ഒരു ഫ്ലാറ്റ് അവള് വാങ്ങിച്ചു. അല്പം സഹായവിലയായിരുന്നെങ്കിലും അതിനും സാലറി സ്ലിപ് നല്കി ബാങ്ക് ലോണ് എടുത്തു. അതുകൊണ്ട് ആ ഫ്ലാറ്റും അവളുടെ പേരിലായിത്തീര്ന്നു.
അതിലൊന്നും അയാള്ക്ക് അന്നേരം പ്രയാസമുണ്ടായിരുന്നില്ല. അവള് ജോലി ചെയ്ത് സ്വത്ത് സമ്പാദിക്കുന്നതില് അയാള്ക്ക് വിഷമമില്ലായിരുന്നു. അയാള്ക്ക് ജോലിക്ക് പോവാന് വയ്യ എന്ന് മാത്രം.. അയാളെ ജോലി ചെയ്യാന് ആരും നിര്ബന്ധിക്കരുത്. കാരണം ഈ ലോകത്തില് നിലവിലുള്ള ഒരു അഴിമതിയോടും പൊരുത്തപ്പെടാനാവാത്ത ഒരു തീവ്ര വിപ്ലവകാരിയാണ് അയാള്. അയാള്ക്കെങ്ങനെ ഒരു ഓഫീസില് ഒതുങ്ങിക്കൂടാന് കഴിയും?
അവളുടെ അമ്മയും അനിയത്തിയും മകളും അവള് പുതിയതായി വാങ്ങിച്ച ഫ്ലാറ്റില് താമസിക്കുന്നതില് എതിര്പ്പുണ്ടായിരുന്നെങ്കിലും മറ്റേതെങ്കിലും കൂടിയ സാമര്ത്ഥ്യക്കാര്ക്ക് വാടകയ്ക്ക് കൊടുത്താല് അവരെ ഒഴിപ്പിക്കാന് ബുദ്ധിമുട്ടാകുമോ എന്ന ഭയത്തില് അയാള് അത് വല്ലവിധേനെയും സഹിച്ചു.
അവളുടെ അമ്മയ്ക്ക് എന്തു പെന്ഷന് കിട്ടുന്നുണ്ടെന്നോ അനിയത്തിയ്ക്ക് എന്തു ശമ്പളം കിട്ടുന്നുണ്ടെന്നോ അയാള്ക്ക് അറിയുമായിരുന്നില്ല. അമ്മയുടെ അസുഖം ഒരിയ്ക്കല് വല്ലാതെ മൂര്ച്ഛിക്കുകയും എല്ലാവരേയും അറിയിച്ചോളൂ എന്ന് ഡോക്ടര് പറഞ്ഞതനുസരിച്ച് അവളും മകനും അയാളും കൂടി അമ്മയെ കാണാന് വരികയും ചെയ്തപ്പോഴാണ് ആ ഫ്ലാറ്റില് സൌകര്യങ്ങള് എല്ലാമുണ്ടെന്നും അവര് സുഖമായി ജീവിക്കുകയായിരുന്നുവെന്നും അയാള്ക്ക് മനസ്സിലായത്.
അത് അയാള്ക്ക് പൊറുക്കാന് കഴിഞ്ഞില്ല.
അവളുടെ പണം അവര് വാങ്ങുന്നുണ്ടെന്ന് അതോടെ അയാള്ക്കുറപ്പായി. അവളുടെ അമ്മയ്ക്ക് നല്ല ശമ്പളമുള്ള സര്ക്കാരുദ്യോഗസ്ഥനായ ഒരു മകനുണ്ടെന്ന കാര്യം അയാള് മറന്നു പോയി. ചേട്ടന്റെ മകള്ക്കും ജോലിയുണ്ടെന്ന് ഓര്മ്മിക്കാന് അയാള് ഇഷ്ടപ്പെട്ടില്ല. അവര് അവളുടെ അമ്മയേയും അവളുടെ അനിയത്തിയേയും സഹായിച്ചേക്കുമെന്ന് അയാള്ക്ക് തോന്നിയതേയില്ല.
അയാളിലെ സംശയാലു അവളുടെ എല്ലാം പരിശോധിക്കാന് തുടങ്ങി. മൊബൈല് ഫോണും ഓഫീസില് നിന്നു കൊടുത്ത കമ്പ്യൂട്ടറും ഉള്പ്പടെ അവള് ഉടുത്തിരുന്ന വസ്ത്രങ്ങള് വരെ. അവളുടെ ബാഗുകളും അലമാരിയും ഒന്നും അയാള് വിട്ടില്ല. അയാള് സാങ്കേതികതയില് നല്ല കഴിവുള്ള ഒരാളായിരുന്നുവല്ലോ. അതുകൊണ്ട് കമ്പ്യൂട്ടറും മൊബൈലുമെല്ലാം അയാളുടെ പരിശോധനയ്ക്ക് എളുപ്പത്തില് വഴങ്ങി.
അവളുടെ പാസ്സ് വേര്ഡ് അയാള് തീരുമാനിച്ചു. അവളറിയാതെ അതുമാറ്റുന്നതും അതിനായി അവള്ക്ക് അയാളുടെ കാലു പിടിക്കേണ്ടി വരുന്നതും മിക്കവാറും എപ്പോഴും സംഭവിക്കാന് തുടങ്ങി.
ജീവിതം പരമനരകമാകാന് മറ്റു കാര്യങ്ങളൊന്നും വേണ്ടി വന്നില്ല. അവള് ഓഫീസ് ആവശ്യത്തിനു വിസിറ്റ് ചെയ്യുന്ന ഗൂഗിള് സൈറ്റുകള് അയാള് പരിശോധിച്ചു. റീ സൈക്കിള് ബിന് മുഴുവന് അരിച്ചു പെറുക്കി. അവള് ചെയ്യുന്ന സേവിംഗ്സിന്റെ പട്ടിക എഴുതി നല്കാന് ആവശ്യപ്പെട്ടു. അവളുടെ ഫോണിലെ നമ്പറുകളില് ആരൊക്കെയാണെന്ന് അവളോടു ചോദിച്ചു, എന്നിട്ടും വിശ്വാസം വരാതെ അവരെ വിളിച്ചുറപ്പ് വരുത്തി.
ഏതു വഴക്കുണ്ടാവുമ്പോഴും ഉറങ്ങിക്കിടക്കുന്ന മകനെ എഴുന്നേല്പ്പിച്ച് അവരുടെ ഇടയില് ഇരുത്തുന്നതും വഴക്കില് അവന്റെ അഭിപ്രായമെന്ത് എന്ന് ചോദിക്കുന്നതും അയാളുടെ പതിവായിരുന്നു. എന്തിനു ആ സൈറ്റില് പോയി ? എന്തിനു ആ ആളോട് ഇത്ര നേരം സംസാരിച്ചു? എന്തിനു ഈ നമ്പറില് അഞ്ചെട്ട് പ്രാവശ്യം വിളിച്ചു? മകന് ഉറക്കപ്പിച്ചില് അയാള് ചോദിക്കുന്നതെല്ലാം ആവര്ത്തിച്ചു. ചിലപ്പോള് സഹിക്കാന് വയ്യാതെ അവന് തേങ്ങിത്തേങ്ങിക്കരഞ്ഞു. അയാള് അന്നേരമെല്ലാം അവനെയും 'കഴുതേ, നിനക്കെന്തറിയാം തള്ളേടെ മോനേ, ബുദ്ധികെട്ടവനേ ' എന്നൊക്കെ വഴക്കു പറയുമായിരുന്നു.
എല്ലാ ദുരിതങ്ങള്ക്കും അപ്പുറത്ത് അവള്ക്ക് രണ്ട് അത്യാവശ്യയാത്രകള് വേണ്ടി വന്നു. നാലുമാസം മുമ്പ് അയാളെ അറിയിച്ചിട്ടും സമയം വന്നപ്പോള് അയാളുടെ മട്ടു മാറി.
ഡിഗ്രി കിട്ടിയിട്ട് ഇരുപത്തഞ്ചു വര്ഷമായതിന്റെ ആഘോഷമായിരുന്നു, പഠിച്ചിറങ്ങിയ എന് ജിനീയറിംഗ് കോളേജില്...
അവള് പോകണമെന്ന് ഉറപ്പിച്ചുതന്നെ പറഞ്ഞു.
സമ്മതിക്കില്ലെന്ന് അയാളും .. അവര് പോരുകോഴികളെ പോലെ പൊരുതി. അയാള് വേശ്യേ, തേവിടിശ്ശി, അറുവാണിച്ചി എന്നൊക്കെ വിളിച്ചു. എന്തു വിളിച്ചിട്ടും അവള് കുലുങ്ങിയില്ല. കൂടെ പഠിച്ചവരില് പലരും മരിച്ചു പോയെന്നും ഇനിയൊരു കൂടിച്ചേരല് ഇങ്ങനെ ഉണ്ടാവില്ലെന്നും ഉണ്ടായാല് തന്നെ ആരൊക്കെ ബാക്കിയാകുമെന്നറിയില്ലെന്നും അവള് അയാളോട് വിശദീകരിച്ചു. മകന് ഭയന്ന്, സങ്കടപ്പെട്ട് കരഞ്ഞുകൊണ്ട് 'പോകണ്ടാ അമ്മ പോകണ്ട' എന്ന് കെഞ്ചി. അവനെ ആവുന്ന മട്ടിലൊക്കെ സമാധാനിപ്പിച്ചിട്ട് അവള് പോകാന്തന്നെ തീര്ച്ചയാക്കി.
അയാള്ക്ക് അത് ഒരിയ്ക്കലും ക്ഷമിയ്ക്കാന് കഴിഞ്ഞില്ല. അവള് വ്യഭിചരിയ്ക്കാന് പോയതാണെന്ന് അയാള് മകനെ ധരിപ്പിച്ചു. അവനിത്ര മോശം തലേലെഴുത്തായല്ലോ, ഒരു വേശ്യയുടെ മകനായി ജനിക്കേണ്ടി വന്നല്ലോ എന്ന് അയാള് അവന്റെ മുന്നില് കണ്ണീരോടെ വിലപിച്ചു.
അവന്റെ കുഞ്ഞുഹൃദയം തകര്ന്നുപോയി. വാചകങ്ങളുടെ അര്ഥമറിഞ്ഞിട്ടല്ല, അച്ഛന് കരയുന്നത് കണ്ടിട്ട്..
അമ്മയെ ഇനി അവന് ശ്രദ്ധിയ്ക്കണമെന്ന് അയാള് അവനു പറഞ്ഞുകൊടുത്തു. ഏതൊക്കെ ആണുങ്ങള് അമ്മയെ നോക്കുന്നുണ്ട് അമ്മയോട് സംസാരിക്കുന്നുണ്ട് എന്ന് കണ്ടുപിടിക്കേണ്ട ചുമതല മകനുണ്ട്. അവന് പലപ്പോഴും അമ്മയുടെ ഓഫീസില് പോകാറുണ്ടായിരുന്നു. ആ സമയമെല്ലാം അവിടെ വെറുതേ കളിച്ചു നടക്കാതെ അമ്മയെ നിരീക്ഷിക്കണമെന്ന് അയാള് അവനെ ഉപദേശിച്ചു.
( തുടരും )
നോവല് 18.
മകനെ സിറ്റിയിലുള്ള ജിംഖാന ക്ലബില് നീന്താന് കൊണ്ടു പോകണമെന്ന് അവള് അയാളോട് അപേക്ഷിച്ചു നോക്കി. അയാള്ക്കും നീന്താന് ഇഷ്ടമായിരുന്നു. വെറുതേ ഇരുന്ന് കുടവയര് ചാടുന്നതിലും നല്ലതല്ലേ..
അയാള് വല്ലപ്പോഴുമൊക്കെ അവനെ കൊണ്ടു പോയി. എന്നാല് അയാള് നീന്തിയില്ല. ആറുമാസം നീന്താന് മൂവായിരം രൂപ എന്നത് വളരെക്കൂടുതലാണെന്ന് അയാള് പറഞ്ഞു. അവന് ഒരു ഇന്സ് ട്രക്ടറെ വെച്ചുകൊടുക്കാനും അയാള് തയാറായില്ല.
അവള് ജോലിയില് പിന്നെയും ഉയര്ന്നു പോവുകയായിരുന്നു. സെമിനാറുകളില് ക്ലാസ് എടുക്കാന് ഇന്ത്യന് ആര്മി അവളെ ക്ഷണിച്ച ദിവസം അയാള്ക്ക് കലശലായ കോപം വന്നു. ബീക്കണ് ലൈറ്റ് വെച്ച ആര്മിയുടെ കാറില് അവള് പോയതും തിരിച്ചു വന്നതുമൊന്നും അയാള്ക്ക് പൊറുക്കാന് കഴിഞ്ഞില്ല. എങ്ങനെയാണ് എന്തിനാണ് അവളെപ്പോലെ ഒരു സ്ത്രീയെ ആര്മി ക്ഷണിച്ചതെന്ന് അയാള്ക്ക് മനസ്സിലായില്ല.
അന്ന് രാത്രി മുഴുവന് അയാള് അവളെ വേശ്യ എന്ന് വിളിച്ചു. മകനോട് നിന്റെ അമ്മ വേശ്യയാണെന്ന് പറയുന്നതില് പിന്നീട് അയാള് ഒത്തിരി ആനന്ദം കണ്ടെത്തി.
.
കാറില് അവളുടെ ഓഫീസിലേക്ക് പോവുമ്പോള് റോഡില് കാണുന്നവരെയെല്ലാം വണ്ടീലിരുന്ന് തെറി വിളിയ്ക്കുക അയാളുടെ ശീലമായിരുന്നു. പ്രത്യേകിച്ച് അയാളുടെ കാറിനെ ഓവര്ടേക്ക് ചെയ്യുന്നവരെ... അതെല്ലാം അവളെയാണ് അയാള് വിളിച്ചതെന്ന് അന്നൊന്നും അവള്ക്ക് മനസ്സിലായില്ല. വീട്ടിലിരുന്ന് ടി വി കാണുമ്പോഴും പത്രം വായിക്കുമ്പോഴും സാധിക്കുമ്പോഴെല്ലാം അയാള് തെറികള് പറയുമായിരുന്നു. അത് അയാള്ക്കിഷ്ടമില്ലാത്ത എന്തെങ്കിലും കാണുകയോ കേള്ക്കുകയോ ചെയ്യുമ്പോഴായിരുന്നു മകന് അതെല്ലാം കേട്ട് പഠിക്കുമെന്ന് അവള് ഭയന്നു. അവനോട് മറ്റുള്ളവരുടെ അമ്മമാരെ ചീത്ത പറയുന്ന ആ വാക്കുകള് മോന് പഠിക്കരുതെന്ന് അവള് ഉപദേശിച്ചു. അവന് അങ്ങനെ ചെയ്തു എന്നറിഞ്ഞാല് അവള് ഹൃദയം പൊട്ടി മരിക്കുമെന്ന് അവള് പറഞ്ഞു.
അവന് മദര് പ്രോമിസ് ചെയ്തു ഒരു ചീത്തവാക്കും ഒരിയ്ക്കലും പറയില്ലെന്ന്..
അവളുടെ നിറഞ്ഞ കണ്ണുകള് അവന് തുടച്ചു. അവളുടെ കവിളില് തെരുതെരെ ഉമ്മവെച്ചു.
ആയിടയ്ക്കാണ് അവളുടെ അമ്മ കഠിനമായി രോഗബാധിതയായത്. അനിയത്തിക്ക് ആ സമയത്ത് ഭേദപ്പെട്ട ഒരു ജോലി തരപ്പെടുകയും ചെയ്തു. അത് അമ്മയുടേ വീട്ടില് നിന്ന് അകലെ ഒരു പട്ടണത്തിലായിരുന്നു. അമ്മയുടെ വീട് ചേട്ടന്റെ പരിചയക്കാര്ക്ക് വാടകയ്ക്ക് കൊടുത്തിട്ട് അനിയത്തി വാടകവീട് എടുത്ത് അമ്മയേയും മോളേയും ഒരു പണിക്കാരിയേയും ഒപ്പം കൂട്ടി അവിടെ താമസമാക്കി.
അവള് അയാളറിയാതെ വലിയൊരു കള്ളത്തരം ചെയ്യാന് തുടങ്ങിയത് അപ്പോഴാണ്.
അവള്ക്ക് ചില്ലറ കാഷ് അലവന്സുകള് ലഭിച്ചിരുന്നു. അത് അവള് ഒരിയ്ക്കലും അയാളെ അറിയിച്ചിരുന്നില്ല. ലക്ഷങ്ങള് ശമ്പളം വാങ്ങിയിട്ടും ആ പണം മാത്രമേ അവളുടെ പക്കല് സ്വന്തമായി ഉണ്ടായിരുന്നുള്ളൂ. അവള്ക്ക് ആദ്യം ജോലി കിട്ടിയപ്പോള് തുടങ്ങിയ സ്റ്റേറ്റ് ബാങ്ക് എക്കൌണ്ടില് അവള് അതു പതുക്കി വെച്ചിരുന്നു. അതില് നിന്ന് പണം പിന് വലിയ്ക്കാന് അവള് അനിയത്തിയ്ക്ക് സൌകര്യം ചെയ്തു കൊടുത്തു. അമ്മയെ കൂടെ നിന്ന് പരിചരിയ്ക്കാന് കഴിയാത്തതിന്റെ കുറ്റബോധം അവള് അങ്ങനെയാണ് വീട്ടാന് ശ്രമിച്ചത്. അങ്ങനെ ഒരു എക്കൌണ്ട് ഉണ്ടെന്ന് അയാള്ക്ക് ഓര്മ്മ വന്നിരുന്നില്ല.
അവളെ എപ്പോഴും പരിശോധിച്ചുകൊണ്ടിരുന്നെങ്കിലും അവളുടെ ആയിരം രൂപകളുടെ സേവിംഗ്സും പോസ്റ്റ് ഓഫീസിലെ ആര് ഡിയും എന്ന കുറ്റങ്ങളല്ലാതെ മറ്റു കുറ്റങ്ങളൊന്നും അയാള്ക്ക് കിട്ടിയില്ല. അവള്ക്ക് ഓഫീസിലെ പ്യൂണ് മുതല് സി ഇ ഒ വരെ എല്ലാവരുമായും അവിഹിതബന്ധമുണ്ടെന്ന് അയാള്ക്ക് തോന്നിയിരുന്നുവെങ്കിലും ഒരു തെളിവും അയാള്ക്ക് ലഭ്യമായിരുന്നില്ല. തെളിവൊന്നും ഒന്നിനും കിട്ടാത്തതുകൊണ്ട് അയാള് പിന്നെയും പിന്നെയും അവളെ പരിശോധിച്ചുകൊണ്ടിരുന്നു.
അവര് താമസിക്കുന്ന ഫ്ലാറ്റ് സമുച്ചയത്തില് അയാള്ക്ക് സുഹൃത്തുക്കള് ആരുമില്ലായിരുന്നു. അവളുടെ ഭര്ത്താവ് എന്നും മോന്റെ അച്ഛന് എന്നുമാണ് അയാള് അറിയപ്പെട്ടിരുന്നത്.
മകന് അവന്റെ കൂട്ടുകാരന് അമലിന്റെ വീട്ടില് തന്നെ ട്യൂഷന് പഠിയ്ക്കാന് പോയിത്തുടങ്ങി. അവളായിരുന്നു അതിനു മുന്കൈ എടുത്തത്. അത് അയാള്ക്ക് തീരെ ഇഷ്ടമായില്ല. എങ്കിലും ആദ്യമൊക്കെ അയാള് മൌനിയായിരുന്നു. അമലിന്റെ അമ്മയായിരുന്നു ട്യൂഷന് പഠിപ്പിച്ചിരുന്നത്. ആ ആന്റിയാവട്ടെ മോനെ ചക്കരേ, രാജേ , കണ്ണേ, മുത്തേ എന്നൊക്കെ കൊഞ്ചിച്ചിരുന്നതുകൊണ്ട് മോന് ആ വീട്ടില് പോയി പഠിയ്ക്കാന് ഇഷ്ടമായിരുന്നു. ആന്റിക്ക് അവന്റെ അമ്മയെ വലിയ ബഹുമാനമായിരുന്നു.അവന്റെ അമ്മയുടെ വിദ്യാഭ്യാസം, ജോലി അതിലെല്ലാം സുഹൃത്ത് എന്ന നിലയില് ആ ആന്റി അഭിമാനം കൊണ്ടു. അത് അവര് എപ്പോഴും അവന്റെ മുന്നില് പ്രകടിപ്പിക്കുകയും ചെയ്തു പോന്നു.
മകന് ജീവിതത്തില് ആദ്യമായി അവന്റെ അമ്മ സത്യമായും ഒരു മിടുക്കിയാണോ എന്നൊരു സംശയം ജനിച്ചത് അവിടെ പോവാന് തുടങ്ങിയതു മുതലാണ്. അതുവരെ അമ്മയ്ക്ക് എന്തെങ്കിലും ഒരു കഴിവുണ്ടെന്നും അതില് അവന് അഭിമാനം കൊള്ളണമെന്നും അവനറിവുണ്ടായിരുന്നില്ല.
അവന്റെ ആ സംശയം അവന് മെല്ലെ മെല്ലെ പ്രകടിപ്പിച്ചു തുടങ്ങി.
അച്ഛന് രാത്രി വഴക്കുണ്ടാക്കിയാല് അവന് പറയും. ' ഉം. അച്ഛന് രാത്രിയൊക്കെ വഴക്കുണ്ടാക്കി പകല് ഇവിടെ കിടന്നുറങ്ങാമല്ലോ. ഞാനും അമ്മയും അല്ലേ പകല് പുറത്ത് പോകേണ്ടത് '
കാര് യാത്രയില് ഏതെങ്കിലും കാര് ഓവര് ടേക് ചെയ്യുമ്പോള് അവന് കളിയാക്കും..' ഉം, ഇപ്പോ തുടങ്ങും അച്ഛന്റെ വക തെറി മഴ'
അയാള് നിരന്തരമായി അവളെ കുറ്റപ്പെടുത്തുന്നത് കേട്ട് ഒരു ദിവസം അവന് അതിശയപ്പെട്ടു. 'ഇത്രേം ചീത്ത കേട്ട് അമ്മയെങ്ങനെയാണ് ഓഫീസില് പോയി ജോലി ചെയ്യുന്നത്? എനിക്ക് ഇവിടത്തെ ബഹളം കൊണ്ട് സ്കൂളില് പോണമെന്നോ പഠിയ്ക്കണമെന്നോ കളിയ്ക്കണമെന്നോ തോന്നുന്നില്ല.'
അവളുടെ മുഖം വാടിക്കാണുമ്പോള് അവന് അമ്മയെ ഉമ്മ വെയ്ക്കും.. താടിയ്ക്ക് പിടിച്ച് കൊഞ്ചിക്കും. മൈക്രോവേവ് അവനില് അമ്മയ്ക്കായി ചായ ഉണ്ടാക്കിക്കൊടുക്കും. ഇതൊക്കെയാണെങ്കിലും അവന് അച്ഛനെയും വലിയ കാര്യമായിരുന്നു.
അവളുടെ ചേട്ടനെയും ചേട്ടത്തിയമ്മയേയും മകളേയും ഒന്നും അയാള് ഒട്ടും കാര്യമായി എടുത്തിരുന്നില്ല. അനിയത്തിയെ ദരിദ്രയായ ഒരു വിധവ എന്ന നിലയില് അയാള്ക്ക് പരമപുച്ഛവുമായിരുന്നു. അവളുടെ അമ്മ മരുമകനായി ബഹുമാനിച്ചതു പോരാ എന്നൊരു പരാതി അയാള് എപ്പോഴും ഉന്നയിച്ചിരുന്നു. മുപ്പത്തിനാലുകാരിയായ പെണ്ണിനു ജീവിതം കൊടുത്ത പുരുഷന് എത്ര തന്നെ ബഹുമാനം കിട്ടിയാലാണ് അധികമാവുക.?
അതുകൊണ്ടു തന്നെ മോനും അവരും തമ്മില് കാര്യമായ ബന്ധം ഉണ്ടാകാതിരിക്കാന് അയാള് എപ്പോഴും ശ്രദ്ധ വെച്ചു പോന്നു. അയാള്ക്ക് നമ്മളെ ഇഷ്ടമാകുന്നില്ല എന്ന അറിവില്, നമ്മള് കൂടുതല് ഇടപെട്ട് അവളുടെ ജീവിതം പ്രയാസകരമാക്കേണ്ട എന്ന് നിശ്ചയിച്ച് അവളുടെ വീട്ടുകാരും ആവശ്യത്തിലുമധികം മൌനികളായി തന്നെ ജീവിച്ചു. അക്കാര്യത്തില് എതിര്പ്പുണ്ടായിരുന്നത് ചേട്ടത്തിയമ്മയ്ക്ക് മാത്രമായിരുന്നു. അതാരും തന്നെ വക വെച്ചതുമില്ല.... അവളുടെ ചേട്ടന് പോലും.
( തുടരും )
നോവല് 17.
അയാള് വീട്ടില് വെറുതേ ഇരിക്കുന്നതാണ് കുഴപ്പങ്ങള്ക്ക് വഴി വെയ്ക്കുന്നതെന്ന് അയാളുടെ വീട്ടുകാരുള്പ്പടെ എല്ലാവരും അഭിപ്രായപ്പെട്ടു. അവളുടെ ചേട്ടനും അനിയത്തിയും ആ അഭിപ്രായമുള്ളവരായിരുന്നു. ചേട്ടന് പക്ഷെ, അവളുടെ ഭര്ത്താവിനോട് ഇക്കാര്യത്തെപ്പറ്റി സംസാരിക്കാന് വിമുഖനായിരുന്നു. ചിലപ്പോഴൊക്കെ എന്തെങ്കിലും പറഞ്ഞാലും മുഖത്തടിച്ചതു പോലെ ' നീ ചെയ്യുന്നത് തെറ്റാണ് , നീ എന്റെ അനിയത്തിയോട് പെരുമാറുന്ന രീതി ഒട്ടും ശരിയല്ല, അതെനിക്ക് ഇഷ്ടപ്പെടുന്നില്ല ' എന്ന് തന്റേടത്തോടെ അവളുടെ രക്ഷാകര്ത്താവാണെന്ന മട്ടില് പറയാന് ഒരിയ്ക്കലുമൊരിയ്ക്കലും ചേട്ടന് കഴിഞ്ഞില്ല. ചേട്ടന് സത്യമായും ഒരു പരമഭീരുവായിരുന്നു. പ്രശ്നങ്ങള് വരുമ്പോള് ചേട്ടത്തിയമ്മയെ മുന്നോട്ടുന്തി സുരക്ഷിതമായ ഒരു അകലം പാലിയ്ക്കാന് ചേട്ടന് എപ്പോഴും ശ്രദ്ധിച്ചിരുന്നു. അവളുടെ ചുമതല ഏറ്റെടുക്കാനോ അവള്ക്കായി ബലമുള്ള ഒരു നിലപാട് എടുക്കാനോ ചേട്ടനു സാധിച്ചിരുന്നില്ല. ചേട്ടനെ നേരിട്ട് സ്പര്ശിയ്ക്കാത്ത കാര്യങ്ങള് മാത്രമേ അദ്ദേഹം ചെയ്തിരുന്നുള്ളൂ. അതുകൊണ്ടു തന്നെ എപ്പോഴും അവസാനിയ്ക്കാത്ത സമവായമായിരുന്നു ചേട്ടന്റെ രീതി.
ചേട്ടത്തിയമ്മയ്ക്കായിരുന്നു പിന്നെയും തന്റേടം. പക്ഷെ, 'നീ മിണ്ടല്ലേ, നീ മിണ്ടല്ലേ' എന്ന് അവരെ വാ തുറക്കാന് ചേട്ടന് സമ്മതിച്ചിരുന്നില്ല. ആദ്യമൊക്കെ ' നീ വിഷമിക്കരുത്, നിനക്ക് ചേട്ടനുണ്ട് ' എന്ന് പറഞ്ഞിരുന്ന ചേട്ടത്തിയമ്മ പിന്നെപ്പിന്നെ അങ്ങനെ പറയാതെയായി. സ്വന്തം ഭര്ത്താവിന്റെ ഭീരുത്വം അവര്ക്കും മനസ്സിലായിരുന്നിരിക്കണം.
അവളുടെ അനിയത്തി വിധവയും ഒരു പെണ്കുഞ്ഞിന്റെ അമ്മയുമായിരുന്നു. അനിയത്തിയുടെ കുഞ്ഞിന്റേയും അവളുടേയും ജാതകദോഷം കൊണ്ട് ഭര്ത്താവ് അകാലത്തില് മരണപ്പെട്ടു എന്ന് വിശ്വസിക്കുന്ന ഭര്തൃവീട്ടുകാര് അനിയത്തിയേയും കുഞ്ഞിനെയും ഓര്ക്കുക പോലും ചെയ്തിരുന്നില്ല. അവളുടെ അമ്മ അതുകൊണ്ട് അനിയത്തിയ്ക്കൊപ്പം മാത്രമേ പാര്ക്കുവാന് തയാറായുള്ളൂ. അനിയത്തി ചില്ലറ ജോലികള് ചെയ്ത് കുറച്ച് വരുമാനമുണ്ടാക്കിയിരുന്നു. എന്നാലും ഒരു സ്ഥിരം ജോലിയും വരുമാനവും അവള്ക്ക് കൈയെത്തിപ്പിടിയ്ക്കാന് പറ്റുന്ന തരത്തിലായിരുന്നില്ല. അമ്മയുടെ പെന്ഷനിലാണ് അവര്ക്ക് ആകെ ഒരു ഉറപ്പുണ്ടായിരുന്നത്.ആ അമ്മയേയും അനിയത്തിയേയും സഹായിക്കുന്നുണ്ടോ അവള് എന്ന് പരിശോധിക്കുന്നത് അയാളുടെ സ്ഥിരം പതിവായിരുന്നു.
പരിശോധന എളുപ്പമായിരുന്നു. അവളുടെ എ ടി എം കാര്ഡും ചെക്കു ബുക്കും അയാളുടെ പക്കലായിരുന്നു. എല്ലാ മാസവും ബാങ്ക് സ്റ്റേറ്റ്മെന്റ് അയാള്ക്ക് അവള് അയച്ചു കൊടുത്തിരുന്നു.
എന്നാലും ഏതെങ്കിലും സൂത്രമുപയോഗിച്ച് അവള് അവര്ക്ക് പണം നല്കുന്നുണ്ടാവുമോ എന്ന ആധി അയാളെ വല്ലാതെ അലട്ടി. ആരെയെങ്കിലും അവള് പുതിയതായി പരിചയപ്പെട്ടാല് അത് അവള് വീട്ടുകാര്ക്ക് പണമെത്തിക്കുന്ന ഏജന്റായിരിക്കുമെന്ന് തീര്ച്ചയാക്കി അയാള് അവളോട് ബഹളമുണ്ടാക്കി. 'മോനു മാത്രം കിട്ടേണ്ട പണം അമ്മ മറ്റാര്ക്കെങ്കിലും കൊടുക്കുന്നുണ്ടോ എന്ന് അച്ഛന് പരിശോധിക്കുന്നതില് എന്താണ് തെറ്റ് ' എന്നയാള് മോനോട് ചോദിച്ചപ്പോള് അവനും അത് ഗൌരവമായി തോന്നി.
'എന്റെ പണം അമ്മ ആര്ക്കും കൊടുക്കരുതെന്ന് ' അവന് അവളോട് പറഞ്ഞു.
അവന്റെ കുഞ്ഞു ഗൌരവം കണ്ടപ്പോള് അവള്ക്ക് ചിരിയാണ് വന്നത്.
'കൊടുത്താല് ഞാന് അമ്മയെ അടിക്കും' എന്നവന് കൂടുതല് ഗൌരവപ്പെട്ടപ്പോള് അവളുടെ ചിരി സാവധാനം മാഞ്ഞു.
മകന് അപകടകരമായി തെറ്റിദ്ധരിപ്പിക്കപ്പെടുന്നുണ്ടെന്ന് അവള്ക്ക് ബോധ്യമായി. അമ്മയെ അടിക്കുന്നതും മോശം വാക്കുകളില് ചീത്ത പറയുന്നതും ഒക്കെ തെറ്റാണെന്ന് അവള് അവനോട് പറഞ്ഞു.
അപ്പോള് അവന് ചിരിച്ചു.
'ഞാന് അമ്മേടേ മോനാ.. ഞാന് അമ്മേ അടിക്കുമോ?'
സാധിക്കുമ്പോഴെല്ലാം അല്ലെങ്കില് തോന്നുമ്പോഴെല്ലാം അവളെ അടിയ്ക്കാനും കടിയ്ക്കാനും ഒക്കെ വരുമെങ്കിലും അവന്റെ ആ മറുപടി ആത്മാര്ഥമായിരുന്നു.
ഹോബികള് മുമ്പോട്ട് കൊണ്ടു പോയി അയാളെ മുഴുവന് സമയവും എന്തിലെങ്കിലും വ്യാപൃതനാക്കണമെന്നും കുട്ടിയെ തെറ്റിദ്ധരിപ്പിക്കുവാന് സമയമില്ലാതാക്കണമെന്നും അവള് വിചാരിച്ചു.
അയാള്ക്ക് തയിയ്ക്കാന് ഇഷ്ടമാണെന്ന്, കുക്കിംഗ് ഇഷ്ടമാണെന്ന്, കമ്പ്യൂട്ടര് പഠിപ്പിക്കാന് ഇഷ്ടമാണെന്ന്, കൃഷി ചെയ്യാന് ഇഷ്ടമാണെന്ന്, സംസ്കൃതം പഠിക്കാന് ഇഷ്ടമാണെന്ന്, സാമൂഹ്യ സേവനം ഇഷ്ടമാണെന്ന് അയാള് പറഞ്ഞു.
തയ്യല് മെഷീന് മേടിച്ചിട്ട് അവള്ക്കുള്ള വസ്ത്രങ്ങള് അയാള് തയിയ്ക്കാമെന്നും ഏതു ഫാഷന് വേണമെങ്കിലും അയാള്ക്ക് വഴങ്ങുമെന്നും അയാള് പൊങ്ങച്ചംകൊണ്ടു.
അവള്ക്ക് സന്തോഷം തോന്നി. വെറുതേ ഇരിക്കുന്നതിലും ഭേദമാണല്ലോ. ചുമ്മാ വല്ലതുമൊക്കെ ആലോചിച്ചു കൂട്ടുന്നതിലും ഭേദമാണല്ലോ.
അങ്ങനെ ഉശിരനൊരു തുന്നല് മെഷീന് വന്നു. അയാള് തന്നെ തെരഞ്ഞെടുത്തത്.
അവള് ഫ്ലാറ്റിനടുത്ത് തന്നെ ഒരു ചെറിയ കടമുറി വാങ്ങിയിട്ടു. അത് അയാളുടെ പേരില് ലോണെടുത്ത് വാങ്ങാന് ഒരു വഴിയുമുണ്ടായിരുന്നില്ല. ബാങ്കുകാര്ക്ക് സാലറി സ്ലിപ് വേണമല്ലോ കടം കൊടുക്കാന്.. അങ്ങനെ കടമുറി അവളുടെ പേരിലായി. അയാള് അതിന്റെ കടലാസ്സുകള് കൈവശം വെച്ചു. കടമുറി പൂട്ടി താക്കോലും അയാള് സൂക്ഷിച്ചു.
എന്നാല് അതില് സൂപ്പ് കടയോ കമ്പ്യൂട്ടര് ക്ലാസ്സോ ഒരുകാലത്തും അയാള് ആരംഭിച്ചില്ല.
തുന്നല് മെഷീന് മെല്ലെ തുരുമ്പ് പിടിച്ചു.
രഘുവംശവും സിദ്ധരൂപവും അമരകോശവും അലമാരിയില് ഇരട്ടവാലന്റെ ചുംബനങ്ങള് ഏറ്റു വാങ്ങി.
അമ്പതിനായിരം രൂപയ്ക്ക് കുറച്ച് ഭൂമി പാട്ടത്തിനെടുത്ത് കൃഷി ചെയ്യാമെന്ന് അവള് പറഞ്ഞപ്പോള് അയാള് കൂട്ടാക്കിയില്ല. കാരണം കൃഷി ചെയ്യുമ്പോള് അതൊക്കെ കിളികളും കീടങ്ങളും തിന്നു തീര്ക്കുമെന്ന ന്യായമായിരുന്നു അയാളൂടേത്.
കുട്ടികള്ക്ക് വേണ്ടി പ്രവര്ത്തിക്കുന്ന എന് ജി ഓകളിലും വൃദ്ധര്ക്ക് വേണ്ടി പ്രവര്ത്തിക്കുന്ന എന് ജി ഓ കളിലും എന്നിങ്ങനെ പറ്റാവുന്നിടത്തോളം സ്ഥലങ്ങളില് സാമൂഹ്യ സേവനത്തിനു യോജിച്ച മേഖലകള് അവള് അയാള്ക്ക് ചൂണ്ടിക്കാണിച്ചു കൊടുത്തു. അവിടെയെല്ലാം വെറും ചൂഷണമാണെന്ന് ആരോപിച്ച് അയാള് എങ്ങും പോയില്ല.
അവളുടെ ചില സഹപ്രവര്ത്തകരോട് ചേര്ന്ന് വല്ല പ്രോജക്റ്റുകളിലും അയാളെ ഉള്പ്പെടുത്താനാകുമോ എന്നും അവള് ശ്രമിക്കാതിരുന്നില്ല. ഒന്നും നടന്നില്ലെന്ന് മാത്രമല്ല, ഇതിനെയെല്ലാം ചൊല്ലി വീട്ടില് എപ്പോഴും വഴക്കുമുണ്ടായി. വിവരങ്ങള് അറിഞ്ഞ അയാളുടെ ചേട്ടനും ഉറപ്പിച്ചു പറഞ്ഞു. 'നീ എന്തെങ്കിലുമൊക്കെ ചെയ്തില്ലെങ്കില് നിന്റെ ജീവിതം നശിക്കുമെന്ന്.... '
അവന്റെ അച്ഛന് വീട്ടില് ചുമ്മാ ഇരിക്കുകയാണെന്ന് മകനു സങ്കടം തോന്നിത്തുടങ്ങി. അമ്മ ജോലിക്ക് പോയില്ലെങ്കില് ജീവിക്കാന് പ്രയാസമാകുമെന്ന് അവന് പതുക്കെപ്പതുക്കെ അറിയുകയായിരുന്നു. പണ്ടൊക്കെ അവളോട് ജോലിക്ക് പോവണ്ട എന്നവന് വാശി പിടിക്കാറുണ്ടായിരുന്നു. ഇപ്പോഴവന് അത് പൂര്ണമായും നിറുത്തി.
( തുടരും )
നോവല് 16
അസഹനീയമായതുകൊണ്ടാണ് അവള് കൌണ്സലിംഗിനു പോയത് . ജോലിയുടേയും വീടിന്റേയും സമ്മര്ദ്ദം അവള്ക്ക് താങ്ങാവുന്നതിനപ്പുറമായിക്കഴിഞ്ഞിരുന്നു.
ജോലിക്ക് പോകാതായപ്പോള് അവള് മാത്രമായി അയാളുടെ റ്റാര്ജെറ്റ്. അവള് എന്തു ചെയ്യുന്നു? ആരോടു മിണ്ടുന്നു.? ആരാണവളുടെ കൂട്ടുകാര്? അതില് ആണെത്ര? പെണ്ണെത്ര ? അവരോടെല്ലാം ഏതു വിഷയമാണവള് സംസാരിക്കുന്നത്? അവളുടെ അമ്മയോടും ബന്ധുക്കളോടും എപ്പോഴെല്ലാം സംസാരിക്കുന്നു ? എന്തൊക്കെ സംസാരിക്കുന്നു ? അവര് അവളൂടെ പണം അടിച്ചു മാറ്റുന്നുണ്ടോ? സഹപ്രവര്ത്തകരുമായി അവള്ക്ക് എത്ര അടുപ്പമുണ്ട്?
അയാള് ഓരോന്നിനായി കൂടുതല്ക്കൂടുതല് നിയന്ത്രണം വെച്ചു തുടങ്ങി. എപ്പോഴും നിരീക്ഷിയ്ക്കപ്പെടുന്നത്, ചോദ്യങ്ങള്ക്കുത്തരം നല്കേണ്ടത്, ആ ഉത്തരങ്ങളില് ഒട്ടും വിശ്വസിക്കാത്ത ഒരാളുടെ മുന്നില് ശിക്ഷയ്ക്കായി നില്ക്കേണ്ടത്, അവള്ക്ക് അലറാനും മതിവരുവോളം അയാളുടെ മുഖത്തിടിയ്ക്കാനും ചിലപ്പോള് അയാളെ കുത്തിക്കൊല്ലാനോ അല്ലെങ്കില് അവള്ക്ക് മരിക്കാനോ തോന്നുന്നത്..ഒന്നും നടക്കാതെ വരുമ്പോള് നിസ്സഹായത കൊണ്ട് ആത്മാഭിമാനത്തിലേല്ക്കുന്ന അറ്റമില്ലാത്ത ക്ഷതങ്ങള് അവളെത്തന്നെ നിന്ദിക്കുന്നത് .... ഇക്കാര്യമെല്ലാം അവള് കിതച്ചുകൊണ്ടും തോരാതെ കരഞ്ഞുകൊണ്ടും കൌണ്സിലിംഗില് വിശദമാക്കി.
അയാളുമൊത്ത് ചെലവാക്കിയ മധുര നിമിഷങ്ങള് അയവിറക്കാന് കൌണ്സിലര് അവളോട് ആവശ്യപ്പെട്ടു.
അവള് ആലോചിച്ചു തുടങ്ങി.
ഓഫീസിലെ പ്രശ്നങ്ങള് പങ്കു വെയ്ക്കുമ്പോള് കുറ്റമെല്ലാം അവളുടേതാണെന്ന് വാദിച്ചു സ്ഥാപിക്കുമെങ്കിലും അയാള് അത് കേട്ടിരിക്കുമായിരുന്നു. പിന്നെപ്പിന്നെ കുറ്റം കേട്ട് കേട്ട് അവള്ക്ക് മതി വന്നതുകൊണ്ട് അവള് പ്രശ്നങ്ങള് പറയാതെയായി. നല്ല വര്ത്തമാനങ്ങള് മാത്രമേ പങ്കു വെച്ചിരുന്നുള്ളൂ. അവളുടെ മിടുക്കിനെപ്പറ്റി അറിയാനോ അതില് ലേശമെങ്കിലും അഭിമാനം കൊള്ളാനോ അയാള്ക്ക് യാതൊരു താല്പര്യവുമുണ്ടായിരുന്നില്ല.
അവള് സ്വര്ണക്കടയില് ഇന്സ്റ്റാള്മെന്റ് ചേര്ന്ന് പണ്ടങ്ങള് വാങ്ങുന്നതില് അയാള്ക്ക് എതിര്പ്പുണ്ടായിരുന്നില്ല. അത് ഒരു നിത്യസമ്പാദ്യമാണെന്ന് അയാള്ക്ക് യോജിപ്പുണ്ടായിരുന്നു.
പിന്നെ അയാള് വീടിന്റെ കടം തീര്ത്തു.
നന്നായി അത്താഴമൊരുക്കുന്നുണ്ട്...അയാള്ക്ക് മൂഡുള്ളപ്പോഴൊക്കെ.
ഓഫീസില് കൊണ്ടുവിടുകയും കൂട്ടിക്കൊണ്ടു വരികയും ചെയ്യുന്നുണ്ട്... വഴക്കില്ലാത്തപ്പോഴൊക്കെ.
വല്ലപ്പോഴുമൊക്കെ സിനിമയ്ക്ക് പോവാറുണ്ട്... മകന് വാശി പിടിയ്ക്കുമ്പോള് …
അയാള്ക്കിഷ്ടമുള്ള സമോസയല്ലാതെ മറ്റൊന്നും തിന്നരുതെന്ന് അവളെ കര്ശനമായി നിര്ബന്ധിക്കുമ്പോഴും ഇടയ്ക്ക് ബേക്കറികളില് കൊണ്ടു പോയി സമോസ വാങ്ങിക്കൊടുക്കാറുണ്ട്.
അയാള്ക്കിഷ്ടമുള്ള ഉടുപ്പുകളും അടിവസ്ത്രങ്ങളുമേ വാങ്ങാന് സമ്മതിക്കുകയുള്ളൂവെങ്കിലും ചിലപ്പോള് മാളുകളില് കൊണ്ടുപോവാറുണ്ട്.
വളരെ ദുര്ലഭം ചിലപ്പോള് ഒരു കുറ്റവും പറയാതെ വര്ത്തമാനം പറഞ്ഞിരിക്കാറുണ്ട്.
അയാള് കണക്കറ്റ് മദ്യപിക്കുകയോ മറ്റു സ്ത്രീകളെ തേടിപ്പോവുകയോ ചെയ്തിട്ടില്ല.
കൌണ്സിലര് അവളുടെ കിടപ്പറ ജീവിതത്തെ പറ്റി ചോദിച്ചു.
അവളെ മിക്കവാറും എന്നും അയാള് ഭോഗിക്കാറുണ്ട്. എന്നാല് അവള് സുന്ദരിയാണെന്ന് ഒരിക്കല് പോലും പറഞ്ഞിട്ടേയില്ല. എന്തുകൊണ്ട് ഈ നിമിഷങ്ങളില് പോലും അതു പറയാന് കഴിയുന്നില്ല എന്ന് അവള് ചോദിച്ചപ്പോള് അയാള് ഒരിയ്ക്കലും കള്ളം പറയില്ല എന്നാണ് മറുപടി കിട്ടിയത്. ഭോഗം തീര്ന്നാല് അയാള് ഉടനെ കൂര്ക്കം വലിച്ചു തുടങ്ങും. അപ്പോഴാണ് അവള്ക്ക് അയാളെ കൊല്ലാന് കലശലായ ആഗ്രഹമുണ്ടാവുക.. ഏതൊക്കെ മാര്ഗത്തില് അത് സാധിക്കാമെന്ന് ആലോചിച്ചുകൊണ്ട് ഒടുവില് അവള് ഉറങ്ങും.
'കുടുംബമാണ് സ്ത്രീയുടെ എല്ലാം.' കൌണ്സിലര് അഭിപ്രായപ്പെട്ടു. ' നിങ്ങള് ജോലി രാജി കൊടുത്ത് വീട്ടിലിരിക്കു. അണിഞ്ഞൊരുങ്ങി ഭര്ത്താവിനെ ആകര്ഷിക്കു. ഇരുണ്ട നിറമുള്ളവര്ക്ക് ചേരുന്ന വസ്ത്രങ്ങളും മേക്കപ്പും ധരിക്കു. അദ്ദേഹം ജോലിക്ക് പോകട്ടെ. മകന് നിങ്ങളോട് കൂടുതല് അടുപ്പവുമുണ്ടാകും. മകന് നിങ്ങളെ തിരിച്ചറിയേണ്ടതല്ലേ ജീവിതത്തിലെ ഏറ്റവും വലിയ സൌഭാഗ്യം. അല്ലെങ്കിലും പെണ്ണുങ്ങള്ക്ക് എന്തിനാണ് എന്ജിനീയറിംഗ് ബിരുദം ? പുരുഷന്മാര് കൂടുതല് ശോഭിക്കുന്ന ഒരു മേഖലയല്ലേ അത്? '
അവള്ക്ക് പെട്ടെന്ന് നെഞ്ചു കലങ്ങുന്ന സങ്കടം വന്നു. ജോലി കൂടി പോയാല്..
ജോലി കളയുന്നതിനോട് അവള്ക്ക് യോജിക്കാന് കഴിഞ്ഞില്ല. ജോലിയിലാണ് അവള് എല്ലാം മറക്കുന്നത്. പുതിയ പുതിയ ഡിസൈനുകളിലും അവയുടെ നിര്മ്മാണത്തിലുമാണ് അവള്ക്ക് സ്വയം ഒരു അഭിമാനവും ജീവിതത്തിനു ഒരു അര്ഥവും ഉണ്ടെന്ന് തോന്നുന്നത്. അതും ഇല്ലെങ്കില് മകന്റെ കൂടി പരിഹാസം താങ്ങേണ്ടി വരുന്ന സന്ദര്ഭങ്ങളില് എട്ടാം നിലയിലുള്ള ഫ്ലാറ്റില് നിന്ന് ചാടിയാലോ എന്നവള്ക്ക് തോന്നിപ്പോയേനേ.
''ഭര്ത്താവല്ലേ... അദ്ദേഹം നിങ്ങളുടെ എല്ലാം പരിശോധിക്കട്ടെ. ചോദ്യങ്ങള് ചോദിയ്ക്കട്ടെ ..അതിനൊക്കെ ഉത്തരം പറയാനെന്താ വിഷമം? നിങ്ങള് കള്ളത്തരമൊന്നും ചെയ്യുന്നില്ലെങ്കില്.. നിങ്ങള്ക്ക് ജോലി കളയാനും വയ്യ. അപ്പോള് അദ്ദേഹം പരിശോധിക്കുന്നതില് കുഴപ്പമൊന്നുമില്ല. അത് ഒരു സാധാരണ കാര്യമായി അങ്ങ് എടുത്താല് മതി. അദ്ദേഹത്തില് നിന്ന് വിരുദ്ധമായ ഒരു ആത്മാഭിമാനം നിങ്ങള് എന്തിനാണ് കാത്തു സൂക്ഷിക്കുന്നത്?'
'അദ്ദേഹത്തോട് കൂടുതല് ബഹുമാനം കാണിക്കുകയും അനുസരണയും സ്നേഹവും പ്രകടിപ്പിക്കുകയും ചെയ്യൂ.. എല്ലാം ഒ കെ ആവും.'
കൌണ്സിലറുടെ ഫീസ് കൊടുത്ത് ഇറങ്ങിപ്പോരുമ്പോള് ജോലി രാജി വെച്ചാല് അയാള്ക്ക് സന്തോഷം ഉണ്ടാകുമോ എന്ന് ചോദിച്ചു നോക്കാമെന്ന് അവള് കരുതി.
അങ്ങനെ അവള് ചോദിച്ചപ്പോള് അയാള് സത്യമായും ഞെട്ടിപ്പോയി.
അവള് ജോലിക്ക് പോകണമെന്ന് അയാള് തീര്ത്തു പറഞ്ഞു. ഇത്രയും വിദ്യാഭ്യാസമുള്ള ഉന്നത വരുമാനമുള്ള അവള് വീട്ടിലിരിക്കുന്നത് എന്തിനാണ്? അത്ര ചെലവൊന്നുമില്ലല്ലോ. വീട് സ്വന്തമല്ലേ? ഒരാള് ജോലി ചെയ്താല് മതി. അയാള്ക്ക് എന്ജിനീയറിംഗും ആ മേഖലയിലെ അഴിമതിയും ഒക്കെ മടുത്തു. മറ്റെന്തെങ്കിലും ചെയ്യാനാണ് ആഗ്രഹം. അയാള്ക്ക് കുറെ ഹോബികള് ഉണ്ട് . റാറ്റ് റേസ് അയാള്ക്ക് ഇനി വയ്യ.
പിന്നീടുള്ള കുറച്ച് ദിവസങ്ങളില് അയാള് അവളുടെ മേലുള്ള നിരീക്ഷണം അല്പം കുറച്ചു. അവര് മൂന്നു പേരും കൂടി ഒരു സിനിമയ്ക്ക് പോയി. മകന് സന്തോഷം കൊണ്ട് തുള്ളിച്ചാടി. വീട്ടില് അതിഥികള് വരുന്നത്, പുറത്തേയ്ക്ക് പോവുന്നത് ഒക്കെ അവനു വലിയ ഇഷ്ടമായിരുന്നു. എന്നാല് അവന്റെ കൂട്ടുകാര് വന്നാല് പോലും അയാള് ദേഷ്യപ്പെടാറാണ് പതിവ്. ശന്തനുവിനോട് മാത്രമേ അയാള് അതില് തോറ്റിട്ടുള്ളൂ. എത്ര പ്രാവശ്യം ആട്ടിയോടിച്ചാലും അവന് പതിനഞ്ചു മിനിറ്റ് ഇടവിട്ട് വന്നു ചോദിക്കും അങ്കിള്, ഇപ്പോള് വരട്ടേ? ഒടുവില് അയാള് മടുപ്പോടെ അകത്തേ മുറിയിലേക്ക് പോവുമ്പോള് അവര് രണ്ടു പേരും കൂടി കളിയ്ക്കും. അതുപോലെ അമ്മയ്ക്കൊപ്പം എത്ര നേരം കളിയ്ക്കാനും അവനിഷ്ടമായിരുന്നു. അമ്മയ്ക്ക് ഒഴിവ് കിട്ടുമ്പോഴെല്ലാം അവന് കളിച്ചു സന്തോഷിച്ചു.
അപ്പോഴാണ് ഒരു ദിവസം അവിചാരിതമായി അവള്ക്ക് രാത്രി ഒമ്പതു മണി വരെ ഓഫീസില് ഇരിയ്ക്കേണ്ടി വന്നത്. അന്ന് എല്ലാം തകിടം മറിഞ്ഞു. അതുവരെ അയാള് കഷ്ടപ്പെട്ട് പ്രകടിപ്പിച്ചു പോന്ന നന്മ അവസാനിച്ചു. അവള് അവിടെ ആര്ക്കൊപ്പമോ കിടക്കുകയായിരുന്നു എന്ന് അയാള് തീര്ത്തു പറഞ്ഞു. അന്നാണ് അയാള് അവളെ തേവിടിശ്ശി എന്ന് വിളിച്ചത്. പിന്നീട് ഓഫീസില് എപ്പോഴെല്ലാം അധികം സമയം ചെലവാക്കിയോ അന്നെല്ലാം അവള്ക്ക് ആ വിളി കേള്ക്കേണ്ടി വന്നു.
( തുടരും )
നോവല് 15
അയാള് വീട്ടിലിരിക്കുന്നതുകൊണ്ട് അനാഥപ്പെണ്ണ് പകല് മുഴുവന് വീട്ടിലിരിക്കാന് പാടില്ലെന്നും വീടു വിട്ടു പോവണമെന്നും അയാള് നിര്ബന്ധം പിടിച്ചു. അവള് കരഞ്ഞു കാലു പിടിച്ചിട്ടും വഴക്കുണ്ടാക്കിയിട്ടും അയാള് ലേശം പോലും വഴങ്ങിയില്ല.
അനാഥപ്പെണ്ണിനെ അങ്ങനെ പറഞ്ഞു വിടാന് അവള്ക്ക് ഒട്ടും ഇഷ്ടമുണ്ടായിരുന്നില്ല. പക്ഷെ, നിത്യവുമുള്ള വഴക്കും നിദ്രാവിഹീനമായ രാത്രികളും അവളെ തകര്ത്തു.
ഹൈദരാബാദിലേക്ക് സ്ഥലം മാറിപ്പോകുന്ന മറ്റൊരു കൂട്ടുകാരിയുടെ ഒപ്പം ആ അനാഥപ്പെണ്ണിനെ പറഞ്ഞു വിടുമ്പോള് അവളുടെ ഹൃദയം പൊട്ടി. മകന് നിറുത്താതെ കരഞ്ഞു. കരഞ്ഞു കരഞ്ഞു അവന്റെ തൊണ്ടയടഞ്ഞു. ചേച്ചി ഇല്ലാതെ എങ്ങനെ ജീവിക്കുമെന്ന് അവന് അമ്മയോടും അച്ഛനോടും മാറിമാറിച്ചോദിച്ചു. ആരോടും ആശ്രയത്വം പുലര്ത്താതെ ജീവിക്കണം ആണ്കുട്ടികളെന്ന് അയാള് മകനെ മനസ്സിലാക്കി.എന്നിട്ടും അവന് തേങ്ങിക്കൊണ്ടിരുന്നു.
അയാള് അടുക്കള ജോലികള് ചെയ്യാമെന്നേറ്റു. അതിനു ശേഷം ഭക്ഷണവും അയാള് തീരുമാനിക്കുന്നതു പോലെയായി. രാവിലത്തെ ജോലികളെല്ലാം അവള് തന്നെ ചെയ്യണം. മകന് ഉച്ചയ്ക്ക് സ്കൂള് വിട്ട് വരുമ്പോള് അയാള് അവനു ഊണു ഉണ്ടാക്കി കൊടുക്കും. പിന്നെ വൈകീട്ട് ഏഴരമണിയ്ക്ക് അവള് വന്ന് അയാള്ക്ക് ചായ ഉണ്ടാക്കിക്കൊടുക്കണം. തുണി അലക്കണം, അടിച്ചു വാരിതുടയ്ക്കണം. മകനെ ഹോം വര്ക്ക് ചെയ്യിക്കണം. അയാള് ആ നേരം കൊണ്ട് അത്താഴമുണ്ടാക്കും. അത്താഴം അവള് വിളമ്പണം. മേശ വൃത്തിയാക്കണം, പാത്രങ്ങള് കഴുകി അടുക്കള വൃത്തിയാക്കി, അലക്കിയ തുണികള് മടക്കി വെച്ച് വീട് പറ്റാവുന്ന മാതിരി ഒന്ന് അടുക്കിപ്പെറുക്കി തികച്ചും അലങ്കോലമായിക്കിടക്കുന്ന അവന്റെ യൂണിഫോമും ബുക്കും ഷൂവുമൊക്കെ ശരിയാക്കി വെച്ചു വേണം അവള്ക്ക് ഉറങ്ങാന്...
ഓഫീസില് വലിയ മാഡമാണല്ലോ അവള്... വീട്ടില് വന്ന് സാധാരണ പെണ്ണുങ്ങളെപ്പോലെ പണിയെടുത്തില്ലെങ്കില് എന്താണ് പെണ് ജോലികള് എന്നവള് മറന്നു പോയെങ്കിലോ എന്നായിരുന്നു അയാളുടെ ഉല്ക്കണ്ഠ.
അടുക്കളപ്പണി അവള് ചെയ്തിട്ട് കാര്യമില്ല. അവളുണ്ടാക്കുന്നതൊന്നും പട്ടിയുടെ ആസനത്തിലൂടെ പോലും കയറ്റാന് കൊള്ളില്ല.
മകന് ആ ഉപമ കേട്ട് കൈ കൊട്ടിച്ചിരിച്ചു. സ്ഥാനത്തും അസ്ഥാനത്തും എല്ലാം അവനും അതുപയോഗിച്ചു തുടങ്ങി.
അവള് പാചകം എന്ന വിഷയത്തെപ്പറ്റി പിന്നീട് നിശ്ബദത മാത്രം പാലിച്ചു.അയാളുടെ പാചകത്തെ ആവോളം പുകഴ്ത്തി. വഴക്ക് ഒഴിവാക്കുക എന്നതായിരുന്നു അവളുടെ പ്രധാന അജന്ഡ. മകന് വലുതാകും എല്ലാം മനസ്സിലാക്കും എന്നതായിരുന്നു ഏക പ്രതീക്ഷ.
അവള് ഓഫീസില് നിന്ന് വൈകി വരുന്നതില് അയാള്ക്ക് ക്ഷോഭം വന്നു തുടങ്ങി. ' നീ വിളിക്കുമ്പോള് നിന്നെ ഓഫീസില് വന്ന് പിക്കപ്പ് ചെയ്യാന് ഞാനെന്താ നിന്റെ ഡ്രൈവറാണോ' എന്നായി അയാളുടെ ചോദ്യം. പലപ്പോഴും രാവിലെ അവളെ ഓഫീസില് കൊണ്ടുവിടാനും അയാള് തയാറായില്ല. അതിനാണ് മാസം നാല്പതിനായിരം രൂപ ബാങ്കില് വന്നു വീഴുന്നതെന്ന സത്യം അയാള് സൌകര്യപൂര്വം വിസ്മരിച്ചു. 'അത് നിനക്ക് ടാക്സ് ഇളവ് നല്കുന്നുണ്ടല്ലോ ഞാന് സമ്മതിച്ചില്ലായിരുന്നെങ്കില് നീ ആ ഇളവ് എങ്ങനെ നേടുമായിരുന്നു' എന്ന് പറഞ്ഞ് ആ തുകയെ അയാള് നിസ്സാരമാക്കി.
അച്ഛന് കൊണ്ടു വിടുന്നതുകൊണ്ടാണ്, അച്ഛന് ജോലിക്ക് പോകാന് അനുവദിച്ചതുകൊണ്ടാണ് അമ്മയ്ക്ക് ജോലിക്ക് പോകാന് കഴിയുന്നതെന്ന് അയാള് മകനെ പറഞ്ഞു മനസ്സിലാക്കുകയും ചെയ്തു. അതിനും പുറമേ അവന്റെ പല കൂട്ടുകാരുടേയും അമ്മമാര് പറയുന്നത് അവന് കേട്ടിട്ടുമുണ്ടായിരുന്നു..'അയ്യോ! പ്രവീണിന്റെ അച്ഛന് എന്നെ ജോലിക്ക് പോവാന് സമ്മതിക്കില്ല. ഞാന് വീട്ടിലിരുന്ന് പ്രവീണിനെ നോക്കുന്നതാണ് അദ്ദേഹത്തിനിഷ്ടം. അദ്ദേഹം അനുവദിക്കാതെ ഞാന് ഒന്നും ചെയ്യില്ല. '
അയാളാണല്ലോ വീട്ടിലിരിക്കുന്നത്. അവള് ജോലിയുമായി പുറത്ത് ഓഫീസിലും. കുട്ടിയെ അയാള്ക്കിഷ്ടമുള്ള കാര്യങ്ങള് എല്ലാം പറഞ്ഞു മനസ്സിലാക്കാന് ആവശ്യമുള്ളത്ര സമയം അയാളുടെ പക്കല് ഉണ്ടായിരുന്നു. അവളുടെ പക്കല് അതുണ്ടായിരുന്നില്ല. വളരെ സാധാരണക്കാരായ വീട്ടമ്മമാര്ക്ക് അവളുടെ ഈ വിഷമം അറിയാന് പറ്റിയിരുന്നില്ല. മക്കള്ക്കൊപ്പം അധികനേരം ചെലവാക്കുന്നവരെയല്ലേ മക്കള് അധികം കാര്യമായി എടുക്കുക. അല്ലെങ്കില് വീട്ടിലില്ലാത്ത ആളെക്കുറിച്ച് നല്ലതു പറഞ്ഞു കൊടുക്കുവാന് ഉള്ള ആള് ബോധപൂര്വം ശ്രദ്ധിക്കണം. വീട്ടമ്മമാര് അച്ഛന്റെ മിടുക്കിനേയും കഴിവിനേയും സമ്പാദ്യത്തേയും ജോലിയേയും പറ്റി അഭിമാനപ്പെട്ട് മക്കളിലും അത് വളര്ത്തും പോലെ. അച്ഛന് അസാന്നിധ്യത്തിലും ജീവിതത്തില് എത്ര പ്രധാനമാണെന്ന് പറഞ്ഞു കൊടുക്കും പോലെ. അവളുടെ ജീവിതത്തില് ഒരിയ്ക്കലും അങ്ങനൊരു കാര്യം ഉണ്ടായില്ല.
എന്തെല്ലാം അയാള് പറഞ്ഞാലും വൈകുന്നേരം അവളെ കണ്ടില്ലെങ്കില് മകനു സഹിക്കാന് പറ്റിയിരുന്നില്ല. അതുകൊണ്ടു തന്നെ ഒരു ഓഫീസ് ടൂറിനും അവള് പോയിരുന്നില്ല. സൈറ്റ് വിസിറ്റിനു പോവേണ്ടി വന്നാല് രാവിലെ പോയി രാത്രി തിരിച്ചെത്താന് അവള് ശ്രദ്ധിച്ചിരുന്നു. അങ്ങനെ ഒരിയ്ക്കല് കല്ക്കത്തയില് നിന്ന് മടങ്ങുമ്പോള് വിമാനം വൈകി രാത്രി ഒരു മണിയായി അവള് എയര്പോര്ട്ടില് വന്നപ്പോള്.അയാള്ക്ക് ഫോണ് ചെയ്ത നിമിഷം അയാള് പറഞ്ഞു, ' അവിടെ കിടന്നോ, നാളെ വെളുത്തിട്ട് നേരം പോലെ വന്നാല് മതി.' രാത്രി ഒരു മണിക്ക് ടാക്സി പിടിയ്ക്കാനുള്ള ധൈര്യം ഇന്ത്യയില് പൊതുവേ സ്ത്രീകള്ക്ക് ഇല്ലല്ലോ. അവള് എയര്പോര്ട്ടിലിരുന്ന് നേരം വെളുപ്പിച്ചു. അതിനു ശേഷം മോനെ വിട്ടിട്ട് അമ്മ എവിടേയും പോകരുതെന്ന് അവന് ഇടയ്ക്കിടെ സത്യം ചെയ്തു മേടിക്കുമായിരുന്നു. അവളെ കെട്ടിപ്പിടിയ്ക്കാതെ, അവളുടെ മുലയില് കുഞ്ഞിക്കൈ ചേര്ത്തു വെയ്ക്കാതെ അവനുറങ്ങാന് കഴിഞ്ഞിരുന്നില്ല. അപ്പോഴെല്ലാം അവന്റെ നിഷ്ക്കളങ്കമായ സ്നേഹം ഓര്ത്ത് അവളുടെ കണ്ണ് നിറയും.
( തുടരും )
