ഉത്തർപ്രദേശ് പരിചയമുണ്ട്

30/09/2020

ഉത്തർപ്രദേശ് പരിചയമുണ്ട്. ദില്ലിയും സഫ്ദർജങ് ഹോസ്പിറ്റലും ഓൾ ഇന്ത്യാ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസും പരിചയമുണ്ട്...
ഉത്തർപ്രദേശിൽ സവർണർക്ക് അവർണരെ എന്തും ചെയ്യാം..തല്ലാം, കൊല്ലാം, ചുടാം, ബലാത്സംഗം ചെയ്യാം, അംഗഭംഗപ്പെടുത്താം..
മനീഷ വാത്മീകി അമ്മയുടെ ഒപ്പം വയലിൽ പുല്ലരിയുകയായിരുന്നു. ദുപ്പട്ടയുടെ രണ്ടറ്റവും ചേർത്ത് അവളെ വലിച്ചിഴച്ച് കൊണ്ടുപോയി ബലാത്സംഗം ചെയ്ത് നാവ് അറുത്തുകളഞ്ഞിട്ട് പതിനഞ്ചു നാൾ കഴിഞ്ഞു അവൾ മരിച്ചപ്പോഴാണ് പോലീസ് ആ അക്രമികളിൽ നാലുപേരെ അറസ്റ്റ് ചെയ്തത്.
ആരെ വേണമെങ്കിലും അറസ്റ്റ് ചെയ്തു വിചാരണ കൂടാതെ ജയിലിൽ ഇടാമെന്ന് ഗവൺമെന്റ് ഉത്തരവ് ഉള്ള നാടാണ് ഉത്തരപ്രദേശ്.
അവിടുത്തെ വലിയ പോലീസ് ഏമാൻ പറഞ്ഞു. ബലാത്സംഗം നടന്നതിന് തെളിവ് ഇല്ലാന്ന്..
കാവി ഉടുത്ത മുഖ്യമന്ത്രി പിന്നെ ദളിതരും മുസ്ലിമുകളും എങ്ങനേങ്കിലും ഒന്നവസാനിച്ച് കിട്ടാൻ എന്തും ചെയ്യാം...അതാണെൻറെ അവതാര ഉദ്ദേശം എന്ന മട്ടിലാണ്...
ചന്ദ്രശേഖർ ആസാദ് സഫ്ദർജങ് ആശുപത്രിയിൽ എത്താതിരിക്കാൻ കാറു തടഞ്ഞും ബൈക്ക് പിടിച്ച് എടുത്തും അധികാരികൾ പറ്റാവുന്നതെല്ലാം ചെയ്തു നോക്കി.
എന്തായാലും മിണ്ടാൻ പറ്റാതെ മനീഷ മരണത്തിന് കീഴടങ്ങി.
കേരളത്തിൽ ബലാത്സംഗം നടന്നാൽ നിങ്ങൾ കാണില്ലേ എന്ന ചോദ്യവുമായി ആരും ഇങ്ങോട്ട് വരേണ്ട.
ഭർത്താവ് ഭാര്യയെ ബലാത്സംഗം ചെയ്താൽ പെണ്ണിന് പരാതിപ്പെടാൻ പോലും ഒരു നിയമമോ കോടതിയോ ഇല്ലാത്ത രാജ്യത്ത് അന്നേരം മിണ്ടീലല്ലോ..ഇന്നേരം മിണ്ടീലല്ലോ എന്ന് ചോദിക്കുന്നവരെല്ലാം പൊട്ടൻഷ്യൽ ബലാത്സംഗികളാണ്.
ആണായിപ്പിറന്നവർക്ക് ലേശമെങ്കിലും അഭിമാനമുണ്ടെങ്കിൽ അവർ ഒന്നിച്ച് നിന്ന് സകല സ്ത്രീ പീഡനങ്ങൾക്കും എതിരേ പൊരുതണം. കാരണം അത്രമാത്രം ക്രൂരത ആൺവർഗത്തിലെ ചിലർ സ്ത്രീകളോട് ചെയ്തു കഴിഞ്ഞു.
ബലാത്സംഗികളേയും പീഡകരേയും ഏതെങ്കിലും തരത്തിൽ ന്യായീകരിക്കുന്ന ഏതു മനുഷ്യരും ഉള്ളിൽ പേറുന്നത് ബലാത്സംഗികളേയും പീഡകരേയുമാണ്