ഇന്ന് കർക്കടകം ഒന്നാണ്

16/07/2020 

അപ്പോൾ ഇന്ന് കർക്കടകം ഒന്നാണ്... രാമായണം വായിക്കലാണ്..

ഞാൻ അങ്ങനെ ദിവസം നോക്കാറില്ല... എന്നാൽ നോക്കി വായിച്ചിട്ടും ഉണ്ട്. എൻറെ അമ്മയ്ക്ക് വേണ്ടി വിളക്ക് കത്തിച്ചുവെച്ച് വായിച്ചു കൊടുത്തു.

'കുട്ടി, മലയാളം പഠിച്ചത് നന്നായി.. ഭംഗിയായി വായിച്ചു തന്നല്ലോ എനിക്ക് ' എന്ന് അമ്മ പറഞ്ഞപ്പോൾ എനിക്ക് വലിയ സന്തോഷമായി.

ഭാരതീ പദാവലീ തോന്നേണം കാലേകാലേ
വാരിധി തന്നിൽ തിരമാലകളെന്ന പോലേ

എന്ന് ഞാൻ എപ്പോഴും കൊതിക്കുകയും ചെയ്യും.

ശബരിമലയിൽ കർക്കടകം ഒന്നിനും ആരുമില്ല. മാളികപ്പുറത്തമ്മയുടെ കോപമാണ്. അയ്യപ്പനും അതിന് ഒത്താശ ചെയ്യുന്നുവെന്ന് വേണം കരുതാൻ...

കഴിഞ്ഞ വർഷം ശബരിമലയുടെ പേരും പറഞ്ഞ് ഈ ദരിദ്ര രാജ്യത്തെ ഒരുപാട് പൊതുമുതൽ നശിപ്പിച്ചു. പെണ്ണുങ്ങളെ ആണുങ്ങളും പെണ്ണുങ്ങളും ചേർന്ന് അപമാനിച്ചു രസിച്ചു. പ്രളയം വന്നത് പെണ്ണുങ്ങളെ ശബരിമലയിൽ കയറ്റാൻ നോക്കിയവരെ പാഠം പഠിപ്പിക്കാനാണെന്ന് പ്രതികാരം തുള്ളി...

അയ്യപ്പനും മാളികപ്പുറത്തമ്മയും കൂടി കൊറോണ ഇറക്കിക്കളിച്ച് സ്വൈരമായി ശബരിമലയിൽ കഴിഞ്ഞു കൂടാനായിരുന്നു പരിപാടിയെന്ന് അന്ന് ഇപ്പറഞ്ഞവർക്കൊന്നും അറിയുമായിരുന്നില്ലല്ലോ...

അയ്യപ്പൻ കൊറോണയായി അരുളിച്ചെയ്തു...

തത്വമസി എന്ന് എഴുതി വെച്ചത് ചുമ്മാ ആളെപ്പറ്റിപ്പാണല്ലേ... ആരും വരണ്ട... ഇങ്ങോട്ട്‌...

എല്ലാം ദൈവത്തിന്റെ തിരുവിഷ്ടം...