നിയമപ്രകാരമുള്ള മുന്നറിയിപ്പ്

24/07/2020

കോവിഡ് കാലത്ത് കുറേ സിനിമ കണ്ടു.. സീരിയൽ കണ്ടു.. ടീ വി കാണലൊരു മാറാത്ത അസുഖം പോലെ ആയി…

ഒരേ ബുക്ക് പലവട്ടം വായിക്കുമ്പോൾ ഞാൻ അതിൽ ഓരോ തവണയും ഓരോ പുതിയ കാര്യങ്ങൾ കണ്ടുപിടിക്കും. എന്ന് വെച്ചാൽ ബ്രഹ്മാണ്ഡകാര്യങ്ങളൊന്നുമല്ല. ആദ്യത്തെ ആക്രാന്തവായനയിൽ വിട്ടു പോകുന്ന ചില വരികൾ, ചില വാക്കുകൾ, അങ്ങനെ കിട്ടുന്ന ചിത്രങ്ങൾ ഒക്കെ പിന്നത്തെ വായനകളിൽ ഞാൻ കണ്ടുപിടിക്കും. എന്നിട്ടിങ്ങനെ അതിശയം കൂറി ഇരിക്കും..

അപ്പോൾ നിയമപ്രകാരമുള്ള മുന്നറിയിപ്പ് ഞാൻ ഇങ്ങനെ ടീവിയിൽ കണ്ടുകണ്ടു കാര്യങ്ങൾ ഒക്കെ മനസ്സിലാക്കി വരികയാണ്.

മദ്യപാനം ആരോഗ്യത്തിന് ഹാനികരമാണ്.
പുകവലി ആരോഗ്യത്തിന് ഹാനികരമാണ്
സീറ്റ് ബെൽറ്റ് ഇടാതെ നാലുചക്രവാഹനം ഓടിക്കുന്നത് തെറ്റാണ്.
ഹെൽമറ്റ് വെക്കാതെ ഇരുചക്രവാഹനം ഓടിക്കുന്നത് തെറ്റാണ്. മൃഗങ്ങളെ ഉപദ്രവിക്കുന്നത് കുറ്റമാണ്.

ഇപ്പോഴത്തെ കോവിഡ് പകർച്ചവ്യാധി കാരണം മാസ്ക് ധരിക്കാത്തത് ശരിയല്ല എന്നും സിനിമാ സീരിയൽ രംഗങ്ങളിൽ എഴുതിക്കാണിക്കുന്ന പുതിയ രീതി വരുമായിരിക്കാം..

അറിയില്ല.

സിനിമക്കും സീരിയലിനും എഫ് എം റേഡിയോക്കും പൊതുജനങ്ങൾക്കിടയിൽ നല്ല സ്വീകാര്യതയാണ്. താരങ്ങളും ആർ ജെ മാരും ഒക്കെ മനുഷ്യമനസ്സിൽ അങ്ങനെ നിത്യമായി ജീവിക്കും..

മറ്റാർക്കും അത്തരം സ്ഥാനം ലഭ്യമല്ല.

അപ്പോൾ ഈ താരനിബിഡ സിനിമാ സീരിയൽ റേഡിയോ പരിപാടികളിൽ നിയമപ്രകാരമുള്ള അറിവുകൾ നല്കുന്ന ത് ഉഷാറായ കാര്യമാണ്.

അതു തുടരണം..

എന്നാൽ അതിൽ വിവേചനം പാടില്ല..

താരം ആഹാരം ഉപേക്ഷിച്ചു എണീക്കുമ്പോൾ, സാധനങ്ങൾ തല്ലിപ്പൊട്ടിക്കുമ്പോൾ താഴെ എഴുതി കാണിക്കണം. 'ആഹാരവും മററു വസ്തുക്കളും വെറുതെ നശിപ്പിച്ചുകളയുന്നത് പലതരത്തിലുള്ള ഊർജ്ജ നഷ്ടമുണ്ടാക്കും.'

താരം സ്ത്രീകളെ വാക്കാൽ അധിക്ഷേപിക്കുമ്പോൾ താഴെ എഴുതി വരണം..' സ്ത്രീകളെ അധിക്ഷേപിക്കുന്നത് ഭരണഘടന പ്രകാരം കുറ്റമാണ്'

ദളിതരെയും താഴ്ത്തപ്പെട്ട ജാതിക്കാരേയും വ്യത്യസ്ത മതക്കാരേയും പരിഹസിക്കുമ്പോൾ എഴുതിക്കാണിക്കണം. 'മതജാത്യധിക്ഷേപം ഭരണഘടനയനുസരിച്ച് കുറ്റകൃത്യമാണ്.'

സ്ത്രീകളെ അടിക്കുക, ബലാത്സംഗ ശ്രമം നടത്തുക, ബലാത്സംഗം ചെയ്യുക, കറുത്തവരെ പരിഹസിക്കുക ഇതൊക്കെ ഏതു താരം ചെയ്യുമ്പോഴും താഴെ എഴുതി വരണം.. 'നിയമമനുസരിച്ച് ഇതെല്ലാം ക്രിമിനൽ കുറ്റങ്ങളാണ്.'

കൊലപാതകരംഗങ്ങളിലും കൊലപാതക ആസൂത്രണരംഗങ്ങളിലും സ്ത്രീധന ചർച്ചാ, കൊടുക്കൽ വാങ്ങൽ രംഗങ്ങളിലും
വയലൻസിൻറെ വിളയാട്ട രംഗങ്ങളിലും പോലീസ് മർദ്ദനരംഗങ്ങളിലും ഇതെല്ലാം നിയമപരമായി വലിയ കുറ്റകൃത്യങ്ങളാണെന്ന് എഴുതി കാണിച്ചേ തീരൂ.

കുഞ്ഞുങ്ങളെ, ബൗദ്ധിക ശാരീരിക വെല്ലുവിളി നേരിടുന്നവരെ, ഇതരലിംഗക്കാരെ, വൃദ്ധരെ എല്ലാം ഉപദ്രവിക്കുന്നതും അധിക്ഷേപിക്കുന്നതും കാണിക്കുമ്പോഴും നിയമപ്രകാരമുള്ള മുന്നറിയിപ്പ് വേണം.

ഇത് പൂർവകാല പ്രാബല്യത്തിൽ തന്നെ നടപ്പിലാക്കേണ്ടതാണ്…

അന്നേരം പതുക്കെപ്പതുക്കെ, വളരെ വളരെ മെല്ലെ, ഒരുപക്ഷേ, നമ്മളറിഞ്ഞു തുടങ്ങും എത്രയെത്ര അധമത്വങ്ങളെയാണ് നമ്മളിങ്ങനെ താരമിടുക്കായും ആണത്തമായും സംരക്ഷണകവചമായും ഹാസ്യമായും നടനവൈഭവമായും ആരാധനയായും വാഴ്ത്തുന്നതെന്ന്…

സത്യത്തിൽ നമ്മളെത്ര അപരിഷ്കൃതരും അധമമായ ആത്മാവുള്ളവരുമാണെന്ന്…

കലാരൂപങ്ങൾ ജനാധിപത്യത്തിലേക്കും സമത്വത്തിലേക്കും വളരുമ്പോൾ സമൂഹത്തിൽ മെല്ലെയെങ്കിലും ചിലപ്പോൾ മാറ്റത്തിന്റെ ഇളംകാറ്റു വീശിയേക്കും.