രണ്ട് പ്രഭാതനടത്തക്കാര്‍

- സ്ഥലം ഇന്‍ സ് പെക്ടര്‍ക്ക് ചുമ്മാ വായിക്കാനൊരു ആത്മഹത്യാക്കുറിപ്പ് .

എപ്പോഴാണ് രാവിലെകളിലെ ഒരു മണിക്കൂര്‍ നീളുന്ന ഞങ്ങളുടെ ഉശിരന്‍ നടത്തമാരംഭിച്ചതെന്ന് ഓര്‍മ്മയില്ല. കുറെക്കാലമായിട്ടുണ്ടാവും.. ചുരുങ്ങിയത് പതിനെട്ട് പത്തൊമ്പതു കൊല്ലമായിട്ടുണ്ടാവും..

രാത്രി ഉറക്കം കുറഞ്ഞുപോകുന്നതിനു ഒരുപാട് കാരണങ്ങള്‍ ഉണ്ടായിരുന്നു.. ആ കാരണങ്ങളെ പരിഹരിക്കാന്‍ എനിക്കു സ്വയം കഴിയുമായിരുന്നില്ല. അതുകൊണ്ട് പ്രഭാതത്തില്‍ ഉണരുന്നത് വളരെ എളുപ്പമായിത്തീര്‍ന്നു. ഉറങ്ങാത്തയാള്‍ക്ക് ഉണരാന്‍ ബുദ്ധിമുട്ടില്ല.. അലാറങ്ങളോ വിളിച്ചുണര്‍ത്തലുകളോ ഒന്നും ആവശ്യമില്ല.. ഒരു കോട്ടുവാ ഇടുന്ന മാതിരി രാത്രി ഉറങ്ങാത്തയാള്‍ പ്രഭാതത്തിലേക്ക് എത്തിച്ചേരും..

പിന്നെ ധിറുതിയില്‍ പ്രഭാതകര്‍മ്മങ്ങള്‍, ബര്‍മുഡയും ബനിയനും സോക്സും ഷൂസും ധരിയ്ക്കല്‍, കതകു പൂട്ടി പുറത്തിറങ്ങല്‍ ഇതൊക്കെയായി .... അതും കഴിഞ്ഞ് കൈകള്‍ വീശിവീശി നടപ്പു ആരംഭിക്കുകയായി.. ശ്രദ്ധിച്ച് സൂക്ഷിച്ച് ഷൂ നിലത്തുരയാതെ.. അതു നിലത്തുരഞ്ഞാല്‍ എന്‍റെ ഭര്‍ത്താവിനു ദേഷ്യം വരും. വര്‍ഷങ്ങളായി ഇത് തുടരുന്നു.. താമസസ്ഥലങ്ങള്‍ പലത് മാറി , നഗരങ്ങളും പട്ടണങ്ങളും ഗ്രാമങ്ങളും മാറി.. പ്രഭാതത്തിലെ നടപ്പ് മാത്രം മാറിയില്ല. തന്നെയുമല്ല ഞാനിപ്പോള്‍ മടുപ്പ് സഹിക്കാന്‍ വയ്യാതെ വൈകുന്നേരവും നടക്കാന്‍ തുടങ്ങിയിരിക്കുന്നു.

വ്യായാമം ചെയ്യുകയെന്നത് എന്‍റെ ഭര്‍ത്താവിനു നിര്‍ബന്ധമാണ്. നിര്‍ബന്ധമെന്നല്ല അങ്ങനെ ഒരു കാര്യം ചെയ്തില്ലെങ്കില്‍ അദ്ദേഹം നിയന്ത്രിക്കാനാവാത്ത വിധം അസ്വസ്ഥനായിത്തീരും. എന്തിനാണത് ചെയ്യുന്നതെന്ന് സത്യം പറഞ്ഞാല്‍ എനിക്കല്‍ഭുതമാണ്. വളരെ എളുപ്പത്തില്‍ ആഹ്ലാദം തരുന്ന ഒരു വ്യായാമത്തെ തീരെ ഒഴിവാക്കി നടത്തവും ഓട്ടവും ചാട്ടവും ഗരുഡാസനവും പവനമുക്താസനവും സൂര്യനമസ്ക്കാരവും ഒലക്കേടെ മൂടുമൊക്കെ ചെയ്തിട്ട് എന്താണ് പ്രയോജനം എന്ന് എനിക്കറിയില്ല. വ്യായാമം ചെയ്ത് കിതയ്ക്കുന്ന ഭര്‍ത്താവിനെ കാണുമ്പോള്‍ എനിക്ക് ശരിക്കും അറപ്പാണ് തോന്നുക.

ജീവിതം ഇങ്ങനെ കൃത്യമായി പോയതിനു പ്രധാനപ്പെട്ട കാരണം എന്‍റെ ഇളക്കമില്ലാത്ത അനുസരണാശീലമാണ്.

ഞാന്‍ എന്തിനാണ് ഒരു ഭാര്യയായി കഴിഞ്ഞു കൂടുന്നതാവോ? വേറെ ജോലിയൊന്നും ഇല്ലാത്ത തുകൊണ്ടാവണം, അല്ലെങ്കില്‍ പരിശ്രമിച്ച് ജോലി നേടിയെടുക്കാനുള്ള കഴിവ് കുറഞ്ഞു പോയതുകൊണ്ടാവണം, അതുമല്ലെങ്കില്‍ വീട്ടിലിരുന്ന് സുഖിച്ച് മടിയും അലസതയും പിടിച്ചതുകൊണ്ടാവണം.

എനിക്ക് ഒന്നും ചിന്തിക്കേണ്ടതില്ല, ഈ ജീവിതത്തില്‍. പറയുന്നതു കേട്ടാല്‍ മതി. പിന്നെ ഒരു പ്രശ്നവുമില്ല. ഭര്‍ത്താവ് പറയും. ഞാന്‍ കേള്‍ക്കും ... എന്നിട്ട് അതു ചെയ്യും. എത്ര എളുപ്പം. ഇത്ര എളുപ്പമുള്ള ഒരു ജോലി ഈ പ്രപഞ്ചത്തില്‍ വേറെ എവിടെ കിട്ടും?

കാര്യം പരമസുഖമാണ്. ഭര്‍ത്താവ് ഉയര്‍ന്ന ജോലിക്കാരനാണ്. നല്ല ശമ്പളമുണ്ട്. കാറും ഡ്രൈവറും വേലക്കാരുമുണ്ട്. അങ്ങനെ പണച്ചെലവിനെ പറ്റി വ്യാകുലപ്പെടാറില്ല . വല്ലപ്പോഴും ബാങ്ക് പാസ്സ് ബുക് നോക്കുമ്പോള്‍ ചോദിക്കുന്ന ചോദ്യങ്ങള്‍ക്ക് കൃത്യം ഉത്തരം കൊടുത്താല്‍ മതി പിന്നെ പ്രശ്നമൊന്നുമില്ല. എന്തിനു ചെലവാക്കി എന്ന് അറിയില്ലയെന്നോ ഓര്‍മ്മയില്ലയെന്നോ പറഞ്ഞാല്‍ അദ്ദേഹത്തിനു അസ്സലായിട്ട് ദ്വേഷ്യം വരും. അപ്പോള്‍ എനിക്ക് കണക്കിനു കിട്ടുകയും ചെയ്യും. മിക്കവാറും നാക്കുകൊണ്ട്... വല്ലപ്പോഴും കൈകൊണ്ടും..

കൈ കൊണ്ട് കിട്ടാന്‍ ഞാന്‍ അധികം നിന്നു കൊടുത്തിട്ടില്ല. എനിക്ക് നല്ല ഓര്‍മ്മശക്തിയാണ്. ഏത് ഏ ടി എം ല്‍ നിന്ന് പണമെടുത്തു എന്നു മുതല്‍ എന്തിനൊക്കെ ചെലവാക്കി എന്നെല്ലാം ശരിക്കും ഓര്‍മ്മയുണ്ടാവും. നോട്ടിന്‍റെ നമ്പര്‍ പോലും മറന്നു പോവില്ല. എന്‍റെ ഓര്‍മ്മശക്തിയെ ഭര്‍ത്താവ് എന്നും ഭയപ്പെട്ടിരുന്നു. അതുകൊണ്ടു തന്നെ ഓര്‍മ്മ കൂര്‍പ്പിച്ചു വെക്കുന്നതില്‍ ഞാന്‍ എന്നും ശ്രദ്ധിച്ചു പോരുകയും ചെയ്തിരുന്നു. വെറും വയറ്റില്‍ ബ്രഹ്മിനീരു കുടിക്കുക എന്‍റെ ഒരു പ്രധാന ദിനചര്യയായിരുന്നു. അടുക്കളത്തോട്ടത്തിലെ ബ്രഹ്മി പുഷ്ടിയായി നില്‍ക്കുന്നത് അതുകൊണ്ടാണ്. പിന്നെ ഇന്‍റര്‍നെറ്റിലെ ബ്രെയിന്‍ ഗെയിമുകള്‍ പറ്റാവുന്നതെല്ലാം ഞാന്‍ കളിക്കുമായിരുന്നു. മിക്കവാറും എല്ലാറ്റിലും ഉഷാറായി ജയിക്കുകയും ചെയ്യും.

ജീവിതത്തിന്‍റെ തുടക്കത്തില്‍ ഞാന്‍ വളരെ വാം ആയ ഒരു ഭാര്യയായിരുന്നു. സ്നേഹപ്രകടനങ്ങള്‍ക്ക് ഒരു ലോഭവും ഞാന്‍ കാണിച്ചിരുന്നില്ല. എനിക്ക് അദ്ദേഹത്തെ തൊടാനും കെട്ടിപ്പിടിക്കാനും ഉമ്മവെയ്ക്കാനുമൊക്കെ വലിയ ഇഷ്ടമായിരുന്നു. കൈമുട്ടിലും മൂക്കിന്‍റെ തുമ്പത്തും കണ്‍പോളയിലും ചെവിക്കു പുറകിലും എന്നു വേണ്ട പറ്റാവുന്നിടത്തൊക്കെ ഞാന്‍ സ്നേഹ ചുംബനങ്ങള്‍ ചൊരിയുമായിരുന്നു.

പിന്നെപ്പിന്നെ എനിക്ക് മനസ്സിലായി അദ്ദേഹത്തിനു അതിലൊന്നും വലിയ താല്‍പര്യമില്ലെന്ന്.. പ്രകടനങ്ങള്‍ സ്നേഹം ഇല്ലാത്തവരാണ് കാണിക്കുകയെന്നതായിരുന്നു അദ്ദേഹത്തിന്‍റെ വിശ്വാസം. അങ്ങനെ ഞാന്‍ അതില്‍ നിന്ന് മെല്ലെ മെല്ലെ പിന്മാറി.

എനിക്ക് എന്‍റെ ഭര്‍ത്താവിനോട് അങ്ങനെ അത്ര വളരെ ഇഷ്ടമൊന്നുമില്ല ഈയിടെ ആയിട്ട് . കാര്യങ്ങള്‍ നടത്തിക്കൊണ്ടു പോവാന്‍ ഒരാളില്ലാതെ സാധിക്കില്ല എന്നതുകൊണ്ട് തോന്നുന്ന ഒരു ആശ്രിതത്വം മാത്രമാണെനിക്ക് സത്യം പറഞ്ഞാല്‍ ആദ്യം മുതലേ ഉണ്ടായിരുന്നതെന്നാണ് എനിക്കിപ്പോള്‍ തോന്നുന്നത്. അതിനെ സ്നേഹമെന്ന് ഞാന്‍ വിളിച്ചു പോന്നു. എങ്കിലും ഞാന്‍ ഒരു തികഞ്ഞ കള്ളിയായിരുന്നു. അത് അദ്ദേഹം അറിയാതിരിക്കാന്‍ ഞാന്‍ എപ്പോഴും കിണഞ്ഞു ശ്രമിക്കുമായിരുന്നു.

തുടക്കത്തിലേ സ്വയം ഒരു തികഞ്ഞ ഗുരുവായിച്ചമഞ്ഞു എന്നെയും എന്‍റെ വീട്ടുകാരേയും തീരെ ബുദ്ധിയും ബോധവും വിവരവും ഇല്ലാത്തവരാക്കിയും പണക്കൊതിയുള്ളവരായും കാണിക്കുന്നത് അദ്ദേഹത്തിന്‍റെ ഒരു ശിലമായിരുന്നു ഞാന്‍ പരിഭവിച്ചും പിണങ്ങിയും സങ്കടപ്പെട്ടും ഒക്കെ നോക്കി. കാര്യമില്ല എന്ന് തികച്ചും ബോധ്യമായപ്പോള്‍ ' ആ ഞങ്ങള്‍ ബുദ്ധിയും ബോധവും വിവരവും ഇല്ലാത്തവര്‍, പണക്കൊതിയുള്ളവര്‍ എന്ന് ഞാനങ്ങ് അംഗീകരിച്ചു. അതിന്മേലുള്ള വിഷമം അങ്ങനെ പെയ്തു തീര്‍ന്നു. ബുദ്ധിയും ബോധവും വിവരവും ഇല്ലാത്തവര്‍ക്കും പണക്കൊതിയുള്ളവര്‍ക്കും ഈ ഭൂമിയില്‍ ജീവിക്കണമല്ലോ. പിന്നെ അദ്ദേഹത്തിനു ഒത്തിരി ബുദ്ധിയുണ്ടല്ലോ . അതു മതിയെന്ന് ഞാനും നിശ്ചയിച്ചു. ഭര്‍ത്താവിനു എന്തേലും അബദ്ധം പറ്റിയാല്‍ അതുകൊണ്ടു തന്നെ ഞാന്‍ രഹസ്യമായി ആഹ്ലാദിച്ചിരുന്നു. വലിയ ബുദ്ധിമാനല്ലേ എന്നിട്ടും ഇങ്ങനെ പറ്റിയല്ലോ... കണക്കായിപ്പോയി

അദ്ദേഹം പറയുന്നതിനപ്പുറം പോയിട്ട് ഒരു കാര്യവുമില്ലെന്ന് എനിക്ക് ബോധ്യമായതിനു പല കാരണങ്ങളുമുണ്ടായിരുന്നുവെങ്കിലും എന്നെ ഏറ്റവും ഉലച്ചത് എന്‍റെ ശരീരം പോലും അദ്ദേഹത്തിനു വേണ്ട എന്ന തിരിച്ചറിവാണ്. ആദ്യമാദ്യം അങ്ങനെ ആയിരുന്നില്ല. വല്ലപ്പോഴുമൊക്കെ അദ്ദേഹം അതാവശ്യപ്പെട്ടിരുന്നു. ലൈംഗികബന്ധം കഴിയുമ്പോള്‍ ഞാന്‍ തൊടാതെ മാറിക്കിടക്കണം എന്ന നിര്‍ബന്ധം ഉണ്ടായിരുന്നു. സങ്കടവും കരച്ചിലും അനാഥത്വവും ഒക്കെ അന്നേരം തോന്നുമെങ്കിലും ഞാന്‍ അത് സഹിച്ചു പോന്നു. പിന്നെപ്പിന്നെ ആ ചെറിയ താല്‍പര്യം കൂടി അദേഹത്തിനു കുറഞ്ഞു വന്നു. ഞാന്‍ മുന്‍കൈ എടുത്താലും ഉണരാത്ത ശരീരമായി അദ്ദേഹത്തിന്‍റെ. അങ്ങനെ പ്രത്യേകിച്ച് അസുഖമൊന്നുമുണ്ടായിരുന്നില്ല ആ ശരീരത്തിനു കേട്ടൊ.

പ്രസവിക്കാത്തവള്‍ മച്ചി മലടി എന്നൊക്കെ അദ്ദേഹത്തിന്‍റെ ബന്ധുക്കള്‍ എന്നെക്കുറിച്ച് സ്വകാര്യമായി പറഞ്ഞിരുന്നു. പക്ഷെ, ആരും അത് തുറന്ന് പറഞ്ഞിരുന്നില്ല. കാരണം എല്ലാവരും പരിഷ്ക്കാരികളും മനോധര്‍മ്മമ്മുള്ളവരും പെരുമാറ്റമര്യാദകള്‍ ഏറ്റവുമധികം പഠിച്ചിട്ടൂള്ളവരുമായിരുന്നു.

അദ്ദേഹത്തെ എന്‍റെ ശരീരത്തിലേക്കാകര്‍ഷിക്കാന്‍ ഞാന്‍ വനിതാമാഗസിനുകളില്‍ കാണുന്ന നിര്‍ദ്ദേശങ്ങളൊക്കെ അനുസരിച്ചു നോക്കി. സീ ത്രൂ നൈറ്റി ധരിച്ചു. ബെഡ് റൂം കലാപരമായി ഒരുക്കി. പെര്‍ഫ്യും സ്പ്രേ ചെയ്തും മുല്ലമാലകള്‍ ചാര്‍ത്തിയും സുഗന്ധമുണ്ടാക്കി. പതിഞ്ഞ ശബ്ദത്തില്‍ മാദകമായ ഇംഗ്ലീഷ് ഗാനങ്ങള്‍ വെച്ചു. വസ്ത്രങ്ങള്‍ സ്ഥാനം തെറ്റി കിടക്കുന്നത് അറിയാത്തമട്ടില്‍ പാതി നഗ്നത വെളിപ്പെടുത്തിക്കൊണ്ട് ഉറക്കം നടിച്ചു കിടന്നു.

എന്നാല്‍ അതിലൊന്നും അദ്ദേഹം വഴുക്കി വീണില്ല.

ഞാനും തോല്‍ക്കാന്‍ തയാറായിരുന്നില്ല.

അതുകൊണ്ട് യാതൊരു നാണവും കൂടാതെ അദ്ദേഹത്തിനെ മുറുകെ കെട്ടിപ്പിടിച്ചും നഗ്നയായി ആ ശരീരത്തിലമര്‍ന്ന് കിടന്നും 'കമോണ്‍ ഡൂ ഇറ്റ്.. എനിക്ക് നിങ്ങളെ കൊതിയാകുന്നു. നിങ്ങളെ എനിക്ക് വേണ'മെന്ന് പുലമ്പി. ഒരിയ്ക്കലല്ല പലവട്ടം.

'കിടന്നുറങ്ങു പെണ്ണെ' എന്ന് അദ്ദേഹം എന്നെ അപ്പോഴെല്ലാം നിഷ്ക്കരുണം തൂത്തെറിഞ്ഞു.

വല്ലാതെ അപമാനിതയാവുമെങ്കിലും ഭാര്യ ഭര്‍ത്താവിനോട് എന്തായാലും പൊരുത്തപ്പെടുക എന്ന ദാമ്പത്യത്തിലെ സുവര്‍ണനിയമവുമായി ഒത്തു പോവുകയേ വഴിയുള്ളൂ എന്നെനിക്ക് ഒടുവില്‍ മനസ്സിലായി. വേലക്കാരെയെല്ലാം ഒഴിവാക്കി വീട്ടു പണികള്‍ മുഴുവന്‍ ഒറ്റയ്ക്ക് ചെയ്ത് ഞാന്‍ എന്‍റെ ദേഹത്തെ തളര്‍ത്താന്‍ ശ്രമിച്ചു. കാമമുണര്‍ത്തുമെന്ന് പറഞ്ഞ് കേട്ടിട്ടുള്ള എല്ലാ ആഹാരസാധനങ്ങളും വേണ്ടാ എന്നു വെച്ചു. ആസക്തികള്‍ ഉണരാതിരിക്കാന്‍ ഒരു വിധവയെപ്പോലെ അത്താഴവും ഉപേക്ഷിച്ചു. അഥവാ എന്നിട്ടും മനസ്സ് പാളിപ്പോയാല്‍ ഞാന്‍ പാതിരായ്ക്ക് തണുത്ത വെള്ളമൊഴിച്ചു കുളിക്കും.

സിനിമാതാരങ്ങളെ മനസ്സില്‍ സങ്കല്‍പിച്ച് സന്തോഷം കണ്ടെത്താന്‍ പരിശ്രമിച്ചെങ്കിലും അതില്‍ ഞാന്‍ ഒട്ടും വിജയിച്ചില്ല. അവരെയൊന്നും ജീവനുള്ള മനുഷ്യരായി എനിക്ക് പരിചയമില്ലല്ലോ. എല്ലാവരും വ്യത്യസ്ത കഥാപാത്രങ്ങള്‍... അവര്‍ക്കൊക്കെ പ്രണയിക്കാന്‍ വേവ്വേറെ സ്ത്രീകഥാപാത്രങ്ങളും... അതിനിടയില്‍ എന്നെ കൊണ്ടുവെയ്ക്കാന്‍ ഒട്ടും ഇടമില്ലായിരുന്നു.

പിന്നെ ലൈംഗികത ഭര്‍ത്താവിനു മാത്രമേ വേണ്ടൂ എന്നാണല്ലോ നമ്മുടെ രീതി. അതുകൊണ്ട് ഇക്കാര്യം ആരോടും പറയാന്‍ എനിക്ക് കഴിഞ്ഞിരുന്നില്ല. എല്ലാ സ്ത്രീകളും ഭര്‍ത്താവിനു വേണ്ടതുകൊണ്ട് കിടന്നു കൊടുക്കുന്നുവെന്ന മട്ടിലാണ് പറയുക. 'അതൊരു സുഖമല്ലേ എനിക്കും അതിഷ്ടമാണ്.. വേണമെന്ന് ആഗ്രഹം തോന്നാറുണ്ടെന്ന് ' സ്ത്രീകള്‍ പറയുകയേ ഇല്ല. 'എനിക്ക് അങ്ങനെ ആഗ്രഹമൊന്നുമില്ല. അദ്ദേഹത്തിനു വേണം അതുകൊണ്ട് വിരോധം പറയാറില്ല. അങ്ങനെ പറഞ്ഞാല്‍ കിട്ടുന്നേടം നോക്കിപ്പോയാലോ?' ഇത്ര സംയമികളായ സ്ത്രീകളോട് ചെന്ന് 'ഞാനിങ്ങനെ കൊതിക്കുന്നു'വെന്നൊക്കെ പറഞ്ഞാല്‍ ചീത്തപ്പേരു കിട്ടാന്‍ വേറെ കാരണം വല്ലതും വേണോ?

ഒരു സെക്സോളജിസ്റ്റ് ഡോക്ടറെ കാണാമെന്ന് ഞാന്‍ പറഞ്ഞതാണ് ഇന്ന് ആകെ കുഴപ്പമായത്. അദ്ദേഹം സ്വയം അത് ചെയ്യുമെന്നായിരുന്നു ഇത്രയും വര്‍ഷക്കാലം എന്‍റെ വിചാരം. എന്നാല്‍ എന്‍റെ ആഗ്രഹം അതും അദ്ദേഹത്തിനു മാത്രം സാധിച്ചു തരാന്‍ പറ്റുന്ന ആഗ്രഹം അതിനെക്കുറിച്ച് അദ്ദേഹത്തിനു ഒരു താല്‍പര്യവുമില്ലെന്ന് എനിക്ക് പതുക്കെപ്പതുക്കെ മനസ്സിലായി. അതുകൊണ്ടാണ് നാണം കെട്ട് ഞാന്‍ ഡോക്ടറെ കണ്ടു നോക്കാം നമുക്കെന്ന് ഒടുവില്‍ പറഞ്ഞത്.

അത് എന്‍റെ ഭര്‍ത്താവിനു ക്ഷമിക്കാന്‍ കഴിയുന്നതായിരുന്നില്ല. ഞാന്‍ അതികാമമുള്ളവളാണെന്നും അതി കാമം മഹാ ദൂഷ്യമാണെന്നും അദ്ദേഹം അലറി. എന്‍റെ കവിളിലേക്ക് പടര്‍ന്നിറങ്ങുന്ന മുടിയിഴകളും ഓറഞ്ചല്ലി പോലുള്ള ചുണ്ടുകളും മേല്‍ച്ചുണ്ടിനു മുകളിലെ നനുത്ത രോമങ്ങളും എഴുന്നു നില്‍ക്കുന്ന മുലഞെട്ടുകളും ഒരു സില്‍ക് നൂലു പോലും ഇറങ്ങാത്ത വിധം തിങ്ങി നിറഞ്ഞ മുലകളും ആഴം കൂടിയ പൊക്കിള്‍ക്കുഴിയും കാലുകള്‍ക്കിടയിലെ ത്രികോണത്തില്‍ കാണപ്പെടുന്ന കറുത്തു കരുത്തുറ്റ രോമരാജിയും നീണ്ടുരുണ്ട തുടകളും എല്ലാം അതികാമത്തിന്‍റെ ലക്ഷണങ്ങളാണെന്ന് അദ്ദേഹം വിളിച്ചു പറഞ്ഞു. എന്നെ തേവിടിശ്ശി എന്നും അറുവാണിച്ചി എന്നും വിളിക്കാനും എന്‍റെ കരണം മതിവരുവോളം അടിച്ചു പുകയ്ക്കാനും അദ്ദേഹം മടിച്ചില്ല.

അപമാനം കൊണ്ടും വേദന കൊണ്ടും ഞാന്‍ മരവിച്ചു നിന്നു പോയി.

ജീവിതത്തിലെ അധികകാലവും എന്നെ അപമാനിക്കുകയായിരുന്ന പുരുഷന്‍ നാണം മറയ്ക്കാന്‍ വാങ്ങിത്തന്ന ഉടയാടകള്‍ എനിക്കിനി ആവശ്യമില്ല. അതാണ് ഈ ഭൂമിയിലേക്ക് വന്ന രൂപത്തില്‍ ഞാന്‍ മടങ്ങിപ്പോകുന്നത്. നഗ്നയായി കുരുക്കിട്ട് തൂങ്ങി നില്‍ക്കുന്നത് .

മീര.